អ្នកការទូតជាន់ខ្ពស់របស់ចិនបាននិយាយនៅថ្ងៃអង្គារថា ប្រទេសចិនគឺមិនបានដឹងពីផែនការ ដើម្បីពិភាក្សាអំពីសមុទ្រចិនខាងត្បូងដែលមានជម្លោះជាមួយនឹងក្រុមមេដឹកនាំឡើយនៅឯជំនួបកំពូលប្រចាំតំបន់អាស៊ីប៉ាស៊ីហ្វិកនៅសប្ដាហ៍ក្រោយនេះក្នុងទីក្រុងម៉ានីលចំពេលមានភាពតានតឹងរវាងចិន និងហ្វីលីពីនលើបញ្ហាដែនទឹក។
លោក Xi Jinping ប្រធានាធិបតីចិននឹងចូលរួមក្នុងកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC)។
កិច្ចប្រជុំកំពូល APEC នឹងប្រព្រឹត្តទៅនៅទីក្រុងម៉ានីលចាប់ពីថ្ងៃទី១៧ដល់១៩ខែវិច្ឆិកា។ សមាជិករបស់ APEC រួមមានសហរដ្ឋអាមេរិក ចិន ជប៉ុន កូរ៉េខាងត្បូង ឥណ្ឌូណេស៊ី និងកាណាដា។
អនុរដ្ឋមន្ត្រីការបរទេសចិនលោក Li Baodong បានប្រាប់អ្នកកាសែតថា “មនុស្សគ្រប់គ្នាដឹងថា APEC គឺពិភាក្សាជាចម្បងអំពីកិច្ចសហប្រតិបត្តិការធ្វើពាណិជ្ជកម្ម និងហិរញ្ញវត្ថុក្នុងតំបន់អាស៊ីប៉ាស៊ីហ្វិក។
តាមដែលខ្ញុំបានដឹងគឺថា នៅឯជំនួបកំពូលនៅឆ្នាំនេះគឺមិនមានផែនការ ដើម្បីពិភាក្សាអំពីសមុទ្រចិនខាងត្បូងនោះទេ”។
កិច្ចប្រជុំកំពូលនៃសមាគមប្រជាជាតិអាស៊ីអាគ្នេយ៍នៅសប្ដាហ៍មុនដែលបានចូលរួមដោយទាំងសហរដ្ឋអាមេរិក និងប្រទេសចិននោះបានបរាជ័យក្នុងការបង្កើតសេចក្ដីថ្លែងការណ៍ចុងក្រោយមួយពីព្រោះគណៈប្រតិភូមិនអាចយល់ព្រមគ្នាថា តើគួរត្រូវនិយាយពីបញ្ហាជម្លោះសមុទ្រចិនខាងត្បូង ឬក៏អត់។
ប្រទេសចិនបានខឹងសម្បារជាពិសេសលើករណីដែលប្រទេសហ្វីលីពីនបានដាក់ពាក្យបណ្ដឹងដល់តុលាការនៅប្រទេសហូឡង់ចំពោះបញ្ហាសមុទ្រចិនខាងត្បូង។ ប្រទេសចិនបាននិយាយថា ខ្លួននឹងមិនទទួលស្គាល់ឬមិនចូលរួមនៅក្នុងករណីនេះទេ។
រដ្ឋមន្ត្រីការបរទេសចិនលោក Wang Yi បានធ្វើទស្សនកិច្ចទៅកាន់ប្រទេសហ្វីលីពីននៅថ្ងៃអង្គារដើម្បីពិភាក្សាពីការត្រៀមរៀបចំសម្រាប់ដំណើរទស្សនកិច្ចរបស់លោក Xi និងវិធីជួយធ្វើឲ្យប្រសើរឡើងនូវទំនាក់ទំនងរវាងរដ្ឋាភិបាលទីក្រុងប៉េកាំងជាមួយនឹងទីក្រុងម៉ានីល។
ដោយឡែកក្រសួងការពារជាតិរបស់ប្រទេសចិនបាននិយាយថា លោក Wu Shengli ប្រមុខកងទ័ពជើងទឹកបានចាកចេញសម្រាប់ដំណើរទស្សនកិច្ចទៅកាន់ប្រទេសម៉ាឡេស៊ី និងឥណ្ឌូណេស៊ី ខណៈប្រទេសម៉ាឡេស៊ីក៏បានទាមទារទឹកដីក្នុងសមុទ្រចិនខាងត្បូងផងដែរ៕
Reuters
ចិនមិនបានដឹងពីផែនការលើកឡើងបញ្ហាសមុទ្រចិនខាងត្បូងក្នុងកិច្ចប្រជុំ APEC
0 Comments