សហរដ្ឋអាមេរិកកាលពីថ្ងៃចន្ទបានស្វាគមន៍ចំពោះការបោះឆ្នោតរបស់ប្រទេសមីយ៉ាន់ម៉ាថា ជាជ័យជំនះមួយសម្រាប់ប្រជាជនហើយការបោះឆ្នោតនេះបានបង្ហាញខ្លួនឡើង ដើម្បីបង្កើនការរំពឹងទុកនៃការលើកលែងទណ្ឌកម្មរបស់អាមេរិកខណៈយោធាបានទទួលយកលទ្ធផល។
ខណៈពេលដែលមានសញ្ញានៃការលើកទឹកចិត្តចេញពីការបោះឆ្នោតកាលពីថ្ងៃអាទិត្យ រដ្ឋាភិបាលក្រុងវ៉ាស៊ីនតោននៅតែមានការប្រុងប្រយ័ត្ន ហើយបាននិយាយថា ខ្លួននឹងមើលសម្រាប់ដំណើរការប្រជាធិបតេយ្យ ដើម្បីឆ្ពោះទៅមុខមុនពេលដកទណ្ឌកម្មដែលនៅតែកំណត់គោលដៅលើបុគ្គលជាង១០០នាក់ និងក្រុមហ៊ុនអាជីវកម្មនិងវិនិយោគទុនពីសហរដ្ឋអាមេរិកនៅក្នុងប្រទេសមីយ៉ាន់ម៉ា។
គណបក្សកាន់អំណាចនៅក្នុងប្រទេសមីយ៉ាន់ម៉ាបានទទួលស្គាល់បរាជ័យនៅក្នុងការបោះឆ្នោតដោយសេរីជាលើកដំបូងរបស់ប្រទេសនេះនៅក្នុងរយៈពេល២៥ឆ្នាំចុងក្រោយ។គណបក្សប្រឆាំងដែលដឹកនាំដោយមេដឹកនាំលទ្ធិប្រជាធិបតេយ្យ លោកស្រី អ៊ុង សានស៊ូជី បានទទួលជ័យជម្នះភ្លូកទឹកភ្លូកដីដែលអាចធានាបានថា ខ្លួនអាចបង្កើតរដ្ឋាភិបាលថ្មីបាន។
អ្នកនាំពាក្យសេតវិមានលោក Josh Earnest បានឲ្យដឹងថា ដំណើរការបោះឆ្នោតនេះគឺជាការលើកទឹកចិត្ត និងតំណាងឲ្យជំហានដ៏សំខាន់មួយនៅក្នុងដំណើរការប្រជាធិបតេយ្យរបស់ប្រទេសមីយ៉ាន់ម៉ា។
អ្នកការទូតកំពូលរបស់អាមេរិកសម្រាប់តំបន់អាស៊ីលោក Daniel Russel បានលើកឡើងថា “ការបញ្ជាក់ជាបឋមគឺថាការបោះឆ្នោតនេះពិតជាដំណើរការបានយ៉ាងរលូន ប៉ុន្តែការផ្លាស់ប្ដូរដ៏គួរឲ្យទុកចិត្តចាំបាច់គឺត្រូវការក្នុងពេលនេះ”។
លោក Russel បាននិយាយថា វាជាការឆាប់ពេកដើម្បីវាយតម្លៃនៃការបោះឆ្នោតនេះ ឬនិយាយបានថា តើវាអាចនាំឲ្យមានការលើកលែងទណ្ឌកម្មរបស់សហរដ្ឋអាមេរិកដែលនៅសល់ឬក៏អត់។
មន្ត្រីអាមេរិកបាននិយាយថា ប្រធានាធិបតីមីយ៉ាន់ម៉ានិងមេដឹកនាំយោធាបានអះអាងម្តងទៀតជាសាធារណៈថា ពួកគេនឹងទទួលយកលទ្ធផលនៃការបោះឆ្នោតនេះ។
លោក Russel បានថ្លែងថា “សហរដ្ឋអាមេរិកហើយនឹងខ្ញុំជឿថា សមាជិកផ្សេងទៀតនៃសហគមន៍អន្តរជាតិមានគោលបំណងដូចគ្នាទាំងអស់ចំពោះរឿងដកទណ្ឌកម្មនេះ”។
គួរបញ្ជាក់ថា រដ្ឋាភិបាលទីក្រុងវ៉ាស៊ីនតោននិងសហភាពអឺរ៉ុបបានផ្អាកការដាក់ទណ្ឌកម្មសេដ្ឋកិច្ចច្រើនបំផុតលើប្រទេសមីយ៉ាន់ម៉ា បន្ទាប់ពីប្រទេសនេះបានបង្កើតរដ្ឋាភិបាលពាក់កណ្ដាលស៊ីវិលក្នុងឆ្នាំ២០១១៕
Reuters
ការបោះឆ្នោតមីយ៉ាន់ម៉ាបានបង្កើនក្តីសង្ឃឹមនៃការដកទណ្ឌកម្ម
0 Comments