កំពង់ឆ្នាំង ៖ អ្នកធ្លាប់លេងល្បែងស៊ីសង៤នាក់ ក្នុងចំណោម៦នាក់ក្នុងស្រុកទឹកផុស ត្រូវបានអាជ្ញាធរស្រុក និងសមត្ថកិច្ចនគរបាលស្រុក កោះអញ្ជើញមកចូលរួមប្រជុំក្នុងអធិការដ្ឋាននគរបាលស្រុកទឹកផុសនាព្រឹកថ្ងៃទី១០ ខែវិច្ឆិកា ឆ្នាំ២០១៥ ដើម្បីធ្វើការអប់រំ ណែនាំ និងផ្សព្វផ្សាយអំពីច្បាប់បង្ក្រាបអ្នកលេងល្បែងស៊ីសង ហើយសំណូមពរឲ្យពួកគាត់បញ្ឈប់ប្រកបមុខរបរនេះ ផ្លាស់ប្ដូរយកមុខរបរស្របច្បាប់វិញ។
លោក វ៉ាន់ ប៊ុនថាត អភិបាលរងស្រុកទឹកផុសបានលើកឡើងក្នុងកិច្ចប្រជុំនេះថា ក្រោមការដឹកនាំរបស់សម្តេច ហ៊ុន សែន ប្រមុខរាជរដ្ឋាភិបាលកម្ពុជា បានធ្វើឲ្យស្រុកទឹកផុសមានការរីកចម្រើនលើគ្រប់វិស័យ និងធ្វើឲ្យជីវភាពរស់នៅរបស់ប្រជាពលរដ្ឋកាន់តែធូរធារឡើងជាលំដាប់។ ដោយឡែក នៅមានកើតឡើងនូវអំពើចោរកម្មមួយចំនួនផងដែរ ដោយសារតែមានប្រជាពលរដ្ឋមួយចំនួនតូចលេងល្បែងស៊ីសងខុសច្បាប់ មានបៀរ អាប៉ោង កន្ទុយលេខ។ល។ លោកអភិបាលរងស្រុកបានបញ្ជាក់ឲ្យដឹងថា នៅក្នុងមាត្រា៤, មាត្រា៥, មាត្រា៨, មាត្រា១០ និងតូចតាចតែប៉ុណ្ណោះ មិនធំដុំទេ។ កន្លងមក ដោយសារតែប្រពន្ធខឹងប្តី ឬកូនខឹងឪពុកម្ដាយលេងល្បែង គេបានលួចរាយការណ៍រឿងនេះទៅលោកអភិបាលខេត្តកំពង់ឆ្នាំងសុំឲ្យជួយអន្តរាគមន៍ទប់ស្កាត់ និងបិទកុំឲ្យមានល្បែងស៊ីសងនៅក្នុងស្រុកទឹកផុស។
លោកអធិការនគរបាលស្រុកបានបន្តថា កន្លងមក សមត្ថកិច្ចនគរបាលស្រុកក៏ធ្លាប់បានកោះហៅអ្នកលេងល្បែងស៊ីសងខាងលើនេះ មកធ្វើកិច្ចសន្យាឲ្យបញ្ឈប់ជាបន្តបន្ទាប់ផងដែរ តែអ្នកមួយចំនួនតូចនៅតែលួចលេង ហេតុនេះទើបសមត្ថកិច្ចកោះអញ្ជើញមកអប់រំណែនាំជាថ្មីម្តងទៀត។
លោក ឈីវ ទ្រី នាយរងការិយាល័យនគរបាលព្រហ្មទណ្ឌកម្រិតស្រាលខេត្តដែលបានមកចូលរួមប្រជុំ សហការជាមួយលោកនាយផ្នែកនគរបាលព្រហ្មទណ្ឌស្រុកទឹកផុសធ្វើកិច្ចសន្យាជាមួយអ្នកធ្លាប់លេងល្បែងទាំង៤នាក់ខាងលើឲ្យបញ្ឈប់ការលេងល្បែងគ្រប់ប្រភេទតទៅទៀត បើនៅតែបន្តលេងទៀត ពេលសមត្ថកិច្ចចាប់ខ្លួនបាន និងកសាងសំណុំរឿងតាមផ្លូវច្បាប់បញ្ជូនទៅតុលាការខេត្ត មិនអត់អោនឲ្យឡើយ។ កន្លងមក ដោយសារតែល្បែងស៊ីសងកើតមាន បាននាំឲ្យប្រជាពលរដ្ឋមួយចំនួនកើតមានអំពើហិង្សាក្នុងគ្រួសារ និងមានចោរកម្មលួចឆក់នៅក្នុងមូលដ្ឋាន។
ការអប់រំ ណែនាំ និងធ្វើកិច្ចសន្យាជាមួយអ្នកលេងល្បែងដូចខាងលើនេះ អាជ្ញាធរ និងសមត្ថកិច្ច បានអនុវត្ត៣ស្រុករួចមកហើយ គឺក្រុងកំពង់ឆ្នាំង ស្រុកកំពង់ត្រឡាច និងស្រុកទឹកផុសចុងក្រោយនេះ តាមការចង្អុលការណែនាំរបស់លោកស្នងការរងនគរបាលខេត្ត និងតាមការឯកភាពពីលោកអភិបាលខេត្ត និងជាគណៈបញ្ជាការឯកភាពខេត្ត៕
អាជ្ញាធរ និងសមត្ថកិច្ច កោះអញ្ជើញអ្នកលេងល្បែងស៊ីសងមកប្រជុំណែនាំ
0 Comments