បាត់ដំបង ៖ មានការភ្ញាក់ផ្អើលមួយបានកើតឡើងពីសំណាក់ប្រជាពលរដ្ឋថៃ រហូតដល់ក្រុមតម្រួតថៃ បន្ទាប់ពីពួកគេបានប្រទះឃើញសពមនុស្សម្នាក់ដែលត្រូវឃាតកសម្លាប់ ដោយបំបាត់អត្តសញ្ញាណ ហើយបោះទម្លាក់ចោលទៅក្នុងទឹកស្ទឹង ដែលការសម្លាប់នេះគឺឃាតកបានប្រើប្រាស់វិធីដ៏សែនឃោរឃៅជាទីបំផុត ដោយមិនឲ្យសមត្ថកិច្ចស្គាល់ថាជនរងគ្រោះជាសាសន៍ណានោះទេ។
ការភ្ញាក់ផ្អើលនេះបានកើតឡើងកាលពីវេលាម៉ោង១០និង២៥នាទីព្រឹក ថ្ងៃទី៨ ខែវិច្ឆិកា ឆ្នាំ២០១៥ តាមបណ្ដោយផ្លូវសុខុមវីត ក្បែរផ្លូវបំបែកព្រីឌីភ្នំយ៉ុង ក្នុងសង្កាត់ព្រះខ្នូង ខណ្ឌវណ្ណា ទីក្រុងបាងកក ប្រទេសថៃ។
តាមប្រភពព័ត៌មានពីក្នុងប្រទេសថៃបានឲ្យកម្ពុជាថ្មីដឹងថា នៅមុនពេលកើតហេតុនោះ គឺប្រជាពលរដ្ឋបានប្រទះឃើញតួខ្លួនសពមនុស្សម្នាក់បានអណ្តែតទឹកនៅក្នុងស្ទឹង តាមបណ្ដោយផ្លូវសុខុមវីត ដែលជាទីប្រជុំជនផង ទើបក្រុមតម្រួតថៃបានចុះភ្លាមៗទៅកាន់ចំណុចកើតហេតុ ដើម្បីត្រួតពិនិត្យលើស្ថានភាពសពដែលត្រូវជនមិនស្គាល់មុខសម្លាប់។
ប្រភពព័ត៌មានបានបន្តថា ក្រោយពីសមត្ថកិច្ចថៃបានស្រង់សពឡើងមកលើគោកដើម្បីពិនិត្យទើបសង្កេតឃើញថា សពនេះជាស្ត្រី ហើយត្រូវបានឃាតកកាត់ក្បាល កាត់ដៃ ជើង ព្រមទាំងបានវះពោះចេញពោះវៀនមកខាងក្រៅផង ដែលទង្វើនេះ គឺពិតជាសាហាវឃោរឃៅជាទីបំផុត ដែលការធ្វើរបៀបនេះហាក់បីដូចជាកំហឹងមានទំហំធំធេងផង និងធ្វើមិនឲ្យសមត្ថកិច្ចស្រាវជ្រាវរកអត្តសញ្ញាណឃើញឡើយ។
នៅពេលនោះដែរ ក៏មានប្រភពខ្លះបានសន្និដ្ឋានថា អាចជាពលករចំណាកស្រុកមកពីក្រៅប្រទេសក៏អាចថាបាន ប៉ុន្តែដោយឡែក សមត្ថកិច្ចមិនទាន់ហ៊ានអះអាងថាជនរងគ្រោះជាជនជាតិណានោះឡើយ ដោយបច្ចុប្បន្នកម្លាំងជំនាញថៃកំពុងធ្វើការស្រាវជ្រាវរកអត្តសញ្ញាណជនរងគ្រោះផង និងតាមរកមុខសញ្ញាដែលជាឃាតកដ៏ឃោរឃៅនេះផងក្នុងការនាំខ្លួនយកមកផ្ដន្ទាទោសតាមផ្លូវច្បាប់ បើទោះបីជាជនរងគ្រោះជាសាសន៍អ្វីក៏ដោយ៕
ប្រទះឃើញសពត្រូវឃាតកកាត់ក្បាល ដៃ ជើង និងវះពោះបោះចោលក្នុងទឹក
0 Comments