រដ្ឋមន្ត្រីក្រសួងហិរញ្ញវត្ថុអាល្លឺម៉ង់លោក Wolfgang Schaeuble បានឲ្យដឹងកាលពីថ្ងៃអាទិត្យថា ប្រទេសអាល្លឺម៉ង់ចាំបាច់ត្រូវតែផ្ញើសារទៅកាន់ពិភពលោកថា ខ្លួនកំពុងឈានដល់ដែនកំណត់នៃសមត្ថភាពរបស់ខ្លួន ដើម្បីជួយដល់លំហូររបស់ជនចំណាកស្រុកនៅតំបន់អឺរ៉ុប ខណៈដែលលោកបានគាំទ្រចំពោះការរឹតបន្តឹងការជួបជុំគ្រួសារសម្រាប់ជនភៀសខ្លួនស៊ីរី។
អាល្លឺម៉ង់បានក្លាយជាប្រទេសទាក់ទាញសម្រាប់មនុស្សភៀសខ្លួនចេញពីសង្គ្រាម និងអំពើហិង្សានៅក្នុងមជ្ឈិមបូព៌ា។ ជនភៀសខ្លួន និងជនចំណាកស្រុកប្រមាណពី ៨០០ ០០០ នាក់ទៅមួយលាននាក់ត្រូវបានគេរំពឹងថា នឹងមកដល់នៅក្នុងឆ្នាំនេះ។
លោក Schaeuble បាននិយាយក្នុងបទសម្ភាសជាមួយទូរទស្សន៍ ARD ថា “យើងបានរៀបចំ យ៉ាងច្រើន ដើម្បីជួយប៉ុន្តែលទ្ធភាពរបស់យើងក៏មានកំណត់ផងដែរ”។
ល្បឿន និងទំហំនៃការហូរចូលនេះបានដាក់សម្ពាធលើសហគមន៍មូលដ្ឋាននិងធ្វើឲ្យបែកបាក់ក្នុងចំណោមគណបក្សចម្រុះដែលកំពុងកាន់អំណាចចំពោះវិធីក្នុងការដោះស្រាយវិបត្តិនេះ។
ការទាស់ទែងគ្នាជាថ្មីបានកើតឡើងកាលពីចុងសប្ដាហ៍បន្ទាប់ពីរដ្ឋមន្ត្រីក្រសួងមហាផ្ទៃលោក Thomas de Maiziere បាននិយាយថា នាពេលអនាគតជនភៀសខ្លួនស៊ីរីនឹងទទួលបានការកែប្រែស្ថានភាពជនភៀសខ្លួន ហើយនឹងត្រូវបានរារាំងមិនឲ្យមានសមាជិកគ្រួសារចូលរួមជាមួយពួកគេ។
គណបក្សសង្គមប្រជាធិបតេយ្យ (SPD) ដែលបានចែករំលែកអំណាចជាមួយគណបក្សអភិរក្សរបស់លោកស្រី Angela Merkel បានច្រានចោលសំណើនេះ។
ទោះបីជាយ៉ាងណាក៏ដោយ លោក Horst Seehofer មេដឹកនាំគណបក្ស សហភាពសង្គមគ្រិស្ដសាសនិក (CSU) បានគាំទ្រដល់ការលើកឡើងរបស់លោក Maiziere ដោយបានប្រាប់ថា ស្ថានភាពជនភៀសខ្លួនស៊ីរីគួរតែត្រូវបានពិនិត្យលក្ខណៈបុគ្គល។
គួរបញ្ជាក់ថា ជម្លោះនាពេលចុងក្រោយបំផុតនេះបានកើតឡើងបន្ទាប់ពីក្រុមចម្រុះបានបញ្ចប់ជម្លោះផ្ទៃជាច្រើនសប្ដាហ៍កាលពីល្ងាចថ្ងៃព្រហស្បតិ៍អំពីរបៀប ដើម្បីពន្លឿនការនិរទេសអ្នកស្វែងរកសិទ្ធិជ្រកកោនដែលមានឱកាសតិចតួចនៃការត្រូវបានអនុញ្ញាតឲ្យស្នាក់នៅ៕
Reuters
លោក Schaeuble ៖ សមត្ថភាពរបស់អាល្លឺម៉ង់ក្នុងការទទួលយកជនភៀសខ្លួនគឺមានកំណត់
0 Comments