ភ្នំពេញ ៖ ប្រភពព័ត៌មានច្បាស់ការណ៍ បានឱ្យដឹងថា ចៅក្រមស៊ើបសួរសាលាដំបូងរាជធានីភ្នំពេញ លោក សាន សុផាត បានសម្រេច កាលពីថ្ងៃទី៩ ខែ វិច្ឆិកា ឆ្នាំ២០១៥ មិនឃុំខ្លួនមេឆ្នោតពីរនាក់ហើយដោះលែងឱ្យមានសេរីភាពឡើងវិញ តែដាក់ក្រោមការត្រួតពិនិត្យតាមផ្លូវតុលាការ ។ ការសម្រេចនេះ ត្រូវបានមជ្ឈដ្ឋានអ្នកច្បាប់ មើលឃើញថា មន្ត្រីតុលាការកំពុងអនុវត្តច្បាប់ស្តង់ដារពីរ ពោលគឺបទល្មើសដូចគ្នា ម្នាក់ត្រូវបានឃុំខ្លួន និង ម្នាក់ត្រូវបានដោះលែង។
ប្រភពព័ត៌មានបន្តថា មេឆ្នោតដែល ត្រូវបានតុលាការសម្រេចមិនឃុំខ្លួនមានឈ្មោះ ស៊ុន ធាន ភេទប្រុស អាយុ៤៥ឆ្នាំ ជាទាហាន និងឈ្មោះ ជ័យ ចិត្ត ភេទប្រុស អាយុ២៦ឆ្នាំ។
មេឆ្នោតទាំងពីរនាក់រួមនិងអ្នកចាក់ពីរនាក់ ត្រូវបានកម្លាំងការិយាល័យស្រាវជ្រាវប្រឆាំងបទល្មើសព្រហ្មទណ្ឌកងរាជអាវុធហត្ថរាជធានីភ្នំពេញ ឃាត់ខ្លួនកាលពីល្ងាចថ្ងៃទី៧ ខែ វិច្ឆិកា ឆ្នាំ២០១៥ នៅចំណុចផ្ទះគ្មានលេខ ផ្លូវ៧៣BT ក្រុម២ ភូមិចំរើនផល សង្កាត់បឹងទំពុន ខណ្ឌមានជ័យ ។ ក្នុងការបង្ក្រាបនេះ សមត្ថកិច្ចដកហូតបានវត្ថុតាងរួមមាន ម៉ាស៊ីនហ្វាក់ចំនួន០២គ្រឿង ក្រដាសកត់កន្ទុយលេខចំនួន១២សន្លឹកនិងក្រដាសចេញលទ្ធផលមួយចំនួន ប្រាក់ដុល្លារចំនួន២៨៨ដុល្លារ និង ប្រាក់រៀលចំនួន៣៧០,០០០០ រៀល ទូរស័ព្ទដៃចំនួន ០៣គ្រឿង និងត្រាចុះថ្ងៃខែចំនួន០១គ្រឿង៥ ម៉ាស៊ីនគិតលេខចំនួន០១គ្រឿងនិងប៊ិចសម្រាប់កត់មួយចំនួន និងម៉ូតូ ចំនួន០៥គ្រឿង។
ដោយឡែក ស្ត្រីម្នាក់ឈ្មោះ យួន ម៉ៅ អាយុ៤៩ឆ្នាំ ត្រូវបានសមត្ថកិច្ចខណ្ឌដង្កោឃាត់ខ្លួន និង ត្រូវតុលាការសម្រេចឃុំខ្លួនដាក់គុកព្រៃស រហូតមកទល់ពេលនេះ ពីបទភ្នាក់ងារល្បែងស៊ីសង ដែលដកហូតលុយជាក់ស្ដែងត្រឹម៣៩០០០ប៉ុណ្ណោះ ៕
ដោះលែងមេឆ្នោតពីរនាក់បង្ហាញការអនុវត្តច្បាប់ស្តង់ដារពីរ
0 Comments