ស្វាយរៀង ៖ នៅវេលាម៉ោង១៤និង៣០នាទីរសៀល ថ្ងៃទី១៣ ខែវិច្ឆិកា ឆ្នាំ២០១៥នេះ លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចលោកជំទាវ ហៅ ច័ន្ទសេរីទេពី ចៅ ភិរុណ លោកជំទាវ ដួង វណ្ណា អនកតំណាងរាស្ត្រមណ្ឌលស្វាយរៀង និងមន្ត្រីរាជការ ព្រមទាំងពុទ្ធបរិស័ទជិតឆ្ងាយ បានឯកភាពផ្ដើមធ្វើបុណ្យកឋិនទាន ដើម្បីប្រមូលបច្ច័យយកទៅកសាងវត្តត្នោតជ្រុំ ស្ថិតនៅក្នុងភូមិឫស្សីព្រៃ ឃុំកំពង់ចំឡង ស្រុកស្វាយជ្រំ ដែលមានការខ្វះខាត និងដើម្បីប្រមូលបច្ច័យកសាងវត្តបន្តទៀត ព្រមទាំងលើកស្ទួយវិស័យព្រះពុទ្ធសាសនាឲ្យមានការរីកចម្រើននាបច្ចុប្បន្ន និងទៅថ្ងៃអនាគត។
កម្មវិធីផ្ដើមបុណ្យកឋិននេះបានប្រព្រឹត្តទៅនៅរសៀលថ្ងៃទី១៣ ខែវិច្ឆិកា ឆ្នាំ២០១៥ ត្រូវនឹងថ្ងៃសុក្រ ៣កើត ខែកត្តិក ឆ្នាំមមែ បញ្ចស័ក ពុទ្ធសករាជ២៥៥៩នេះ បានអញ្ជើញសូត្រមន្តនៅវត្តត្នោតតែម្ដង។ លុះព្រឹកឡើងថ្ងៃទី១៤ ខែវិច្ឆិកា ឆ្នាំ២០១៥ ត្រូវនឹងថ្ងៃ៤កើត ខែកត្តិក ដង្ហែអង្គកឋិនទានក្នុងវត្តត្នោតនេះឆ្លងជាកិច្ចបង្ហើយបុណ្យ។
អង្គកឋិនទាននេះដង្ហែវេរប្រគេនព្រះសង្ឃគង់ចាំព្រះវស្សាអស់ត្រីមាសក្នុងពទ្ធសីមាវត្តត្នោតជ្រុំ ស្ថិតនៅភូមិឫស្សីព្រៃ ឃុំកំពង់ចំឡង ស្រុកស្វាយជ្រំ ខេត្តស្វាយរៀង។
អង្គកឋិនទានកើតឡើងពីសទ្ធាជ្រះថ្លា ពីពុទ្ធបរិស័ទជិតឆ្ងាយ ដើម្បីប្រមូលបច្ច័យយកទៅកសាងវត្តឲ្យមានការរីកចម្រើនបន្ថែមទៀត បម្រើវិស័យព្រះពុទ្ធសាសនា ដែលមានការខ្វះខាត។
វត្តត្នោតនេះ គឺជាវត្តមួយ ក្នុងចំណោមវត្តជាច្រើនក្នុងស្រុកស្វាយជ្រំដែលមានបរិវេណធំទូលាយ ដូច្នេះ ពុទ្ធបរិស័ទបានមូលមតិគ្នាធ្វើអង្គកឋិនទានដើម្បីប្រមូលបច្ច័យកសាងវត្តនេះបន្ថែមបន្តទៀតឲ្យបានសមរម្យបម្រើវិស័យព្រះពុទ្ធសាសនា គឺសាសនារបស់រដ្ឋ។
លោកជំទាវ ម៉ែន សំអន មានប្រសាសន៍ថា ដោយមានគុណបំណាច់ដ៏ធំធេងរបស់គណបក្សប្រជាជនកម្ពុជា ក្រោមការដឹកនាំរបស់សម្ដេចតេជោ ហ៊ុន សែន ប្រធានគណបក្ស និងជានាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំប្រទេសជាតិឆ្ពោះទៅរកសុខសន្តិភាព និងការអភិវឌ្ឍទាំងវិស័យពុទ្ធចក្រ និងអាណាចក្រ ពិសេសធានាបាននូវស្ថិរភាពនយោបាយពន្លត់សង្គ្រាមរ៉ាំរ៉ៃបានទាំងស្រុងនៅកម្ពុជា។
នៅក្នុងពិធីអង្គកឋិនទាននេះ លោកជំទាវ ម៉ែន សំអន បានប្រសិទ្ធិពរជ័យដល់ពុទ្ធបរិស័ទ ដែលបានចូលបច្ច័យតាមសទ្ធាជ្រះថ្លាចូលរួមថវិកាក្នុងអង្គកឋិនទាននេះ ដើម្បីចូលរួមកសាងសមិទ្ធផលនានានៅវត្តត្នោតជ្រុំដើម្បីតម្កល់មហាកុសលផលបុណ្យទៅអនាគតជាតិ ពិសេសសូមឲ្យវត្ថុសក្ដិសិទ្ធិក្នុងលោកតាមជួយថែរក្សាប្រមុខដឹកនាំប្រទេស និងប្រជាជនខ្មែរទូទាំងប្រទេសជួបតែសុខសន្តិភាពជានិច្ចនិរន្តតរៀងទៅ៕
លោកជំទាវ ម៉ែន សំអន អញ្ជើញចូលរួមផ្ដើមអង្គកឋិនដង្ហែទៅកាន់វត្តត្នោតជ្រុំ ស្ថិតក្នុងឃុំកំពង់ចំលង
0 Comments