កីឡាកររបស់ក្លិបស្វាយរៀងអែហ្វស៊ី ទាំង ៨ នាក់ដែលភាគច្រើនក្នុងឈុតយុវជនក្រោមអាយុ១៩ឆ្នាំ (U-19) រួមទាំងគ្រូបង្វឹក ២ នាក់ទៀតនោះ បានបញ្ចប់យុទ្ធនាការហ្វឹកហាត់ជាង ២ សប្ដាហ៍នៅប្រទេសអង់គ្លេស ហើយ គឺគិតចាប់តាំងពីថ្ងៃទី ១ ខែវិច្ឆិកា មកម្ល៉េះ។
លោក សុក វាសនា គ្រូបង្វឹកក្រុមយុវជនប្រចាំក្លិបស្វាយរៀងអែហ្វស៊ី ដែលជាគ្រូបង្វឹកដឹកនាំកីឡាករទៅប្រទេសអង់គ្លេស បានបង្ហាញពីសកម្មភាពរបស់កូនក្រុម ទាំងលើទីលាន និងទៅទស្សនកិច្ចក្លិបធំៗ ដូចជា Arsenal, Manchester United, Leicester ជាដើម។ នៅថ្ងៃចុងក្រោយក្រុមលោកបានប្រកួតមិត្តភាពឈ្នះក្រុម សាលា Brooke House College ដោយលទ្ធផល ២ ទល់ ១។
កីឡាករទាំង ៨ នាក់ដែលមានឈ្មោះចេញទៅហ្វឹកហាត់លើទឹកដីប្រទេសល្បីខាងបាល់ទាត់នៅតំបន់អឺរ៉ុបមួយនេះមានកីឡាករ អឿន ប៊ីលី, ផន ភារ៉ា, ឡាយ រស្មី, គន្ធា រ៉ាវ៉ាន់, គឹម ហាប់, អោម ឧត្តម, អ៊ុក វ៉ាន់ណេ និង ទេព វានាកុមារពិទូរ្យ ក្រោមការដឹកនាំពីសំណាក់លោក សុក វាសនា និងលោក សំអែល ណាសា អតីតកីឡាករជម្រើសជាតិកម្ពុជា។
កន្លងមកលោក សុក វាសនា បានសរសេរនៅលើហ្វេសប៊ុករបស់ខ្លួនថា «តាំងនាមខ្ញុំបាទតំណាងឲ្យគ្រូនិងកីឡាករស្វាយរៀងអេហ្វស៊ី ទាំងអស់ សូមថ្លែងអំណរគុណដល់ថ្នាក់ដឹកនាំក្លិបស្វាយរៀងអេហ្វស៊ី គ្រប់ជាន់ថ្នាក់ដែលមានឯកឧត្តម ឌី វិជ្ជា ជាប្រធានក្លិប រួមទាំងលោកជំទាវ ស៊ុយ សុផាន់ និង លោកជំទាវ ជុំ ស្រីទូច នាយកក្រុមហ៊ុន RTV Tours នឹងក្រុមគ្រួសារដែលបានជួយរៀបចំគម្រោងស្នើសុំ ហើយផ្តល់ឱកាស និងបានជួយឧបត្ថម្ភជាថវិកាផ្ទាល់ខ្លួនជូនដល់ក្រុមកីឡាកររបស់យើងខ្ញុំ។ ជាចុងក្រោយក្រុមយើងខ្ញុំទាំងអស់សូមជូនពរដល់ថ្នាក់ដឹកនាំទាំងអស់ព្រមទាំងលោកជំទាវនិងក្រុមគ្រួសារ សូមឲ្យជួបតែសំណាងល្អ សុខភាពល្អ និង មុខរបរជំនួញរឹតតែរីកចម្រើនទៅមុខជានិច្ច»។
យោងតាមប្រភពមកពីក្លិបស្វាយរៀងអែហ្វស៊ី បានលើកឡើងថា ក្រុមទាំងមូលនឹងត្រឡប់មកប្រទេសកម្ពុជា វិញនៅថ្ងៃទី ១៦ ខែ វិច្ឆិកា ឆ្នាំ ២០១៥ ខាងមុខ បន្ទាប់ពីបញ្ចប់ការហ្វឹកហាត់រួមគ្នានៅនៅទីនោះរយៈពេលជាង ២ សប្ដាហ៍រួចមក។ ការហ្វឹកហាត់នឹងធ្វើឡើងនៅក្នុងសាលា Brooke House College ដែលមានទីតាំងក្នុងទីក្រុង Leicester ប្រទេសអង់គ្លេស។
សម្រាប់គម្រោងស្នើសុំទៅខាងអង់គ្លេស គឺតាមរយៈក្រុមហ៊ុនRTV Tours ដែលមានកូនប្រុសរបស់លោកជំទាវ ស៊ុយ សុផាន់ឈ្មោះ តាន់ រិទ្ធីវិវឌ្ឍន៍។ រិទ្ធីវិវឌ្ឍន៍ ជាយុវជនថ្នាលស្វាយរៀង ហើយគេកំពុងសិក្សានិងហ្វឹកហាត់នៅទីនោះ ព្រមទាំងហ្វឹកហាត់ ផងបានស្នើសុំទៅសាលា ដើម្បីនាំមិត្តរួមក្រុមទៅហ្វឹកហាត់តែម្ដង។
នេះជាការបណ្ដុះបណ្ដាលធនធានកីឡាករកម្រិតអន្តរជាតិ របស់ក្លិបស្វាយរៀងអែហ្វស៊ី ក្រោមការជួយជ្រោមជ្រែងយ៉ាងសកម្ម ពីឯកឧត្តម ឌី វិជ្ជា ជាប្រធាន ខណៈនៅកម្ពុជាមិនទាន់មានក្លិបណាបញ្ជូនកីឡាករទៅហ្វឹកហាត់នៅតំបន់អឺរ៉ុបឡើយ នាពេលកន្លងមក៕
កីឡាករ ស្វាយរៀងអែហ្វស៊ី៨ នាក់បញ្ចប់យុទ្ធនាការហ្វឹកហាត់ ២ សប្ដាហ៍នៅអង់គ្លេស
0 Comments