ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា ផ្លូវរថភ្លើង កម្ពុជា-ថៃ ត្រូវបានតភ្ជាប់ហើយ ដូច្នេះប្រទេសទាំងពីរ គប្បីពិនិត្យមើលបន្ថែមទៀត លើសក្តានុពល ដែលមានស្រាប់ ជាពិសេសជំរុញលើវិស័យទេសចរណ៍ ការវិនិយោគ ពាណិជ្ជកម្ម និងសេដ្ឋកិច្ច។
សម្តេចតេជោ បានលើកឡើងដូច្នេះ ក្នុងការដែលសម្តេចទទួលជួបពិភាក្សាការងារជាមួយ លោក ប៉ានយ៉ារ៉ាក់ ពុលថាប់ (Panyarak Poolthup ) ឯកអគ្គរាជទូតថ្មីនៃប្រទេសថៃ ប្រចាំកម្ពុជា កាលពីព្រឹកថ្ងៃទី២៩ ខែឧសភា ឆ្នាំ២០១៨។ សម្ដេចតេជោ ហ៊ុន សែន បានសម្តែងនូវមោទភាព ចំពោះទំនាក់ទំនងរវាងប្រទេសកម្ពុជា និងថៃ ដែលមាននៅពេលនេះ ដោយទំហំពាណិជ្ជកម្មទ្វេភាគី មានការកើនឡើង ហើយកម្លាំងទិញរបស់កម្ពុជា ក៏មានធំ។
សម្ដេចមានប្រសាសន៍ថា “ ផ្លូវដែក រវាងប្រទេសទាំងពីរ ត្រូវបានតភ្ជាប់ហើយ ដូចនេះប្រទេសទាំងពីរ គប្បីពិនិត្យមើលបន្ថែមទៀត លើសក្តានុពលដែលមានស្រាប់ និងមិនទាន់មាន ដែលអាចជំរុញ លើវិស័យទេសចរណ៍ផង និងជំរុញការវិនិយោគ ពាណិជ្ជកម្ម សេដ្ឋកិច្ច ផង”។
លោក Panyarak Poolthup ក៏បានជម្រាបជូនសម្តេចតេជោថា បេសកកម្មការទូតរបស់លោក មកកាន់កម្ពុជាពេលនេះ ធ្វើយ៉ាងណាពង្រឹងមិត្តភាព រវាងប្រទេសទាំងពីរ ឲ្យកាន់តែខ្លាំងឡើង ពង្រឹងនូវសុខសន្តិភាព ជាពិសេសទំនាក់ទំនងនៃការរស់នៅរវាងប្រជាជនឲ្យមានភាពជិតស្និទ្ធថែមទៀត។ ជាក់ស្តែងលោក ក៏បានជួបពិភាក្សាជាមួយ លោក ថោង ខុន រដ្ឋមន្ត្រីក្រសួងទេសចរណ៍ ដើម្បីស្វែងរកចំណុចរួម ក្នុងការជំរុញឲ្យវិស័យទេសចរណ៍ រវាងប្រទេសទាំងពីរ មានកំណើន តាមរយៈការធ្វើដំណើរទស្សនកិច្ចរវាងកម្ពុជា និងថៃ៕
Source: Kampuchea Thmey Daily
0 Comments