Ad Code

MCL 2018 ៖​ អង្គ​រថា​យ​ហ្គឺ​រ យកឈ្នះ​ក្រុម​បាត​តារាង​វេ​ស្ទើ​ន​ភ្នំពេញ ឡើងឈរ​លេខ​៧​ក្នុង​តារាង​រួម



ក្រុមបាល់ទាត់​អង្គ​រថា​យ​ហ្គឺ​រ បាន​យកឈ្នះ​ក្រុម​បាត​តារាង​វេ​ស្ទើ​ន​ភ្នំពេញ ២​ទល់​០ នៅ​ល្ងាច​ថ្ងៃ​អង្គារ ទី​២៩​ខែឧសភា ឆ្នាំ​២០១៨ លើ​ទីលាន​កីឡដ្ឋាន​ខេត្តសៀមរាប ប្រចាំ​សប្ដាហ៍​ទី​៧ នៃ​ពានរង្វាន់​លី​គ​កំពូល​កម្ពុជា Metfone Cambodian League 2018 ខណៈ​ជ័យជម្នះ​នេះ​បាន​រុញ​ឲ្យ​អង្គ​រថា​យ​ហ្គឺ​រ រំកិល​ខ្លួន​ពី​ចំណាត់ថ្នាក់​លេខ​៩ ឡើង​ដល់​លេខ​៧ ក្នុង​តារាង​រួម​ដែល​មាន​១២​ក្រុម​ជា​សមាជិក​។



ការប្រកួត​ដែល​ចាប់ផ្តើម​នៅ​វេលា​ម៉ោង​៣​ល្ងាច​ ក្រោម​ការ​កាត់សេចក្តី​ពី​សំណាក់​លោក ឃួន វីរៈ ជា​អាជ្ញាកណ្ដាល ក្រុម​អង្គ​រថា​យ​ហ្គឺ​រ បាន​បំប៉ោង​សំណាញ់​ទី​គូប្រកួត​២​គ្រាប់​និង​ទប់​មិន​ឲ្យ​របូត​គ្រាប់​បាល់​វិញ​បាន​នោះ​ទេ​។ ២​គ្រាប់​របស់​ក្រុម​ម្ចាស់ផ្ទះ​ក្នុង​ខេត្តសៀមរាប នេះ​រកបាន​ដោយ​កីឡាករ តាំង សុ​ភ័​ក្រ នៅ​នាទី​២៥ និង​កីឡាករ ពេជ្រ សុវណ្ណ​ខេ​ម​រិ​ន្ទ្រ នៅ​នាទី​៥៤​។

​សរុប​ចំណាត់ថ្នាក់​ត្រឹម​សប្ដាហ៍​ទី​៧ នេះ​ឃើញថា​ក្រុម​ណាហ្គា​វើ​ល ឡើងឈរ​កំពូល​តារាង ៤​សប្ដាហ៍​ជាប់​គ្នា​មាន​១៩​ពិន្ទុ តាម​ពីក្រោយ​ដោយ​ក្រុម​លេខ​២​បឹងកេត មាន​១៧​ពិន្ទុ​។ ក្រុម​លេខ​៣​គឺ​អគ្គស្នងការដ្ឋាន​នគរ​បាល​ជាតិ មាន​១៣​ពិន្ទុ ហើយ​ក្រុម​លេខ​៤​វិសាខា មាន​១៣​ពិ​ន្ទុ​ស្មើគ្នា​តែ​ឈ្នះ​តែម​ត្រង់ Head to Head​។ ក្រុម​លេខ​៥​គឺ​ព្រះខ័ន​រាជ​ស្វាយរៀង មាន​១១​ពិន្ទុ​ស្មើគ្នា​ជាមួយ​លេខ​៦ ភ្នំពេញ​ក្រោ​ន​។ ក្រុម​អង្គ​រថា​យ​ហ្គឺ​រ ឈរ​លេខ​៧ មាន​១០​ពិន្ទុ ក្រសួងការពារជាតិ លេខ​៨​មាន​៩​ពិន្ទុ ហើយ​ក្រុម​លេខ​៩ អាស៊ី​អឺរ៉ុប មាន​៨​ពិន្ទុ ក្រុម​ក្រុម​សូល​ទី​ឡូ​អង្គរ ឈរ​លេខ​១០ មាន​៤​ពិន្ទុ​ហើយ​ក្រុម​អគ្គីសនី​កម្ពុជា ឈរ​លេខ​១១ មាន​៤​ពិន្ទុ និង​ក្រុម​វេ​ស្ទើ​ន​ភ្នំពេញ ឈរ​លេខ​១២ មិនទាន់មាន​ពិន្ទុ។

​ពានរង្វាន់​លី​គ​កំពូល​កម្ពុជា រដូវ​កាល​នេះ​នឹង​ប្រើប្រាស់​រូបមន្ត​ប្រកួត​សន្សំ​ពិន្ទុ​វិល​ជុំ​ចំនួន​២​ជើងមាន​២២​សប្ដាហ៍ ដើម្បី​ស្វែងរក​ក្រុម​ខ្លាំង​ដែល​មាន​ពិន្ទុ​ច្រើន​ជាង​គេ​ដណ្តើម​ជើងឯក​ប្រចាំឆ្នាំ​។ ការប្រកួត​ចាប់ផ្តើម​ពី​ថ្ងៃ​ទី​៣​ខែមីនា ដល់​ថ្ងៃទី​៣០​ខែកញ្ញា ឆ្នាំ​២០១៨ ដែល​មាន​សមាជិក​ចំនួន​១២​ក្រុម​។ ក្រុម​ជើងឯក​នឹង​ទទួល​បាន​កៅអី​ទៅ​ចូលរួម​ប្រកួត​ក្នុង​ពានរង្វាន់ AFC Cup 2019, ពានរង្វាន់ Mekong Club Championship និង​ពានរង្វាន់ Singapore Cup ជាដើម​។



ចំណែក​កម្មវិធី​ប្រកួត​សប្តាហ៍​ទី​៨ នៃ​ពានរង្វាន់​លី​គ​កំពូល​កម្ពុជា នឹង​បន្ត​ធ្វើឡើង​នៅ​ចុង​សប្ដាហ៍​នេះ​ដោយ​នៅ​ថ្ងៃ​សៅរ៍ ទី​២ ខែមិថុនា ក្រុម​អាស៊ី​អឺរ៉ុប ជួប​ក្រុម​អគ្គស្នងការដ្ឋាន​នគរ​បាល​ជាតិ នៅ​ម៉ោង​៣និង០០​នាទី​រសៀល​លើ​ទីលាន​កីឡដ្ឋាន AEU Park ហើយ​នៅ​ម៉ោង​តំណាលគ្នា​ក្រុម​បឹងកេត ប៉ះ​អង្គ​រថា​យ​ហ្គឺ​រ នៅ​លើ​ទីលាន​មជ្ឈមណ្ឌល​ហ្វឹកហ្វឺន​កីឡា​កងយោធពល​ខេមរភូមិន្ទ (​ស្តា​ត​ចាស់​) និង​នៅ​ម៉ោង​៦​ល្ងាច​ក្រុម​ណាហ្គា​វើ​ល ប៉ះ​ក្រុម​វិសាខា នៅ​លើ​ទីលាន​ជាមួយគ្នា​។ ចំណែក​នៅ​ថ្ងៃអាទិត្យ ទី​៣ ខែមិថុនា វិញ​ក្រុម​វេ​ស្ទើ​ន​ភ្នំពេញ ទទួល​ក្រុម​ភ្នំពេញ​ក្រោ​ន នៅ​វេលា​ម៉ោង​៣​រសៀល​លើ​ទីលាន​កីឡដ្ឋាន​វេ​ស្ទើ​ន ហើយ​ក្រុម​អគ្គីសនី​កម្ពុជា ប៉ះ​ក្រុម​សូល​ទី​ឡូ​អង្គរ នៅ​ម៉ោង​ដំណាលគ្នា​លើ​ទីលាន​កីឡដ្ឋាន​អគ្គីសនី​កម្ពុជា និង​ចុងក្រោយ​ក្រុម​ព្រះខ័នស្វាយរៀង​ ទទួលក្រុម​ក្រសួងការពារជាតិ​នៅម៉ោង៦ល្ងាច លើទីលានកីឡដ្ឋាន​ខេត្តស្វាយរៀង៕



Source: Kampuchea Thmey Daily

Post a Comment

0 Comments

Close Menu