ភ្នំពេញ ៖ ក្រុមជំនាញការអង្គការJICAបានអះអាងថា ការផ្ទៀងផ្ទាត់នាឡិកាស្ទង់របស់ JICA និងអាជ្ញាធរអគ្គិសនីកម្ពុជាដែលបានធ្វើឡើងនៅតាមបណ្តាខេត្តចំនួន១៣ទៅលើនាឡិកាស្ទង់សរុបចំនួន ៥៦៩គ្រឿងនោះគឺមិនមានខុសប្រក្រតីច្រើននោះទេ។
សូមជម្រាបជូនថា ចាប់ពីខែតុលា ឆ្នាំ២០១៧ ដល់ខែមេសា ឆ្នាំ២០១៨ កន្លងមក ក្រុមការងារចម្រុះអាជ្ញាធរអគ្គិសនីកម្ពុជា ដែលមានការចូលរួមពីជំនាញការជប៉ុនJICA និងអគ្គិសនីកម្ពុជាបានចុះផ្ទៀតផ្ទាត់នាឡិកាស្ទង់ជូនអ្នកប្រើប្រាស់មួយចំនួនស្ថិតនៅខេត្តចំនួន១៣ រួមមាន ខេត្តតាកែវ ខេត្តកំពត ខេត្តព្រះសីហនុ ខេត្តកំពង់ធំ ខេត្តសៀមរាប ខេត្តព្រះវិហារ ខេត្តពោធិ៍សាត់ ខេត្តស្វាយរៀង ខេត្តព្រៃវែង ខេត្តស្ទឹងត្រែង ខេត្តមណ្ឌលគិរី ខេត្តរតនគិរី និងខេត្តក្រចេះ។
ក្រុមការងារបានធ្វើការផ្ទៀងផ្ទាត់នាឡិកាស្ទង់សរុបចំនួន ៥៦៩គ្រឿង ដោយប្រើប្រាស់ម៉ាស៊ីនថ្លឹងចល័ត២គ្រឿងដាច់ដោយឡែក ១គ្រឿងជារបស់ JICA និង១គ្រឿង ជារបស់អាជ្ញាធរអគ្គិសនីកម្ពុជា។ ក្រោយពីការពិនិត្យផ្ទៀងផ្ទាត់ ម៉ាស៊ីនទាំងពីរផ្តល់លទ្ធផលដូចគ្នាគឺ ក្នុងចំណោមនាឡិកាស្ទង់ទាំង ៥៦៩គ្រឿង មានតែ ៣១គ្រឿង ប៉ុណ្ណោះស្មើនឹង ៥.៤៦% ដើរខុសប្រក្រតី(លឿន ឬយឺតលើសពី២%)។
យោងតាមផេកហ្វេប៊ុករបស់អាជ្ញាធរអគ្គិសនី ដែលបានចេញផ្សាយកាលពីពេលថ្មីៗនេះបានឲ្យដឹងថា ក្រោយពីបានឃើញនូវលទ្ធផលខាងលើ ក្រុមជំនាញការជប៉ុនJICA បានកត់សម្គាល់ឃើញថា ប្រជាពលរដ្ឋអ្នកប្រើប្រាស់ដែលបានមកទទួលសេវាផ្ទៀងផ្ទាត់នាឡិកាស្ទង់ដោយឥតគិតថ្លៃនេះ ទទួលយកលទ្ធផលនៃការផ្ទៀងផ្ទាត់ដោយអស់ចិត្តសង្ស័យ និងដោយក្តីរីករាយ។
អាជ្ញាធរអគ្គិសនីកម្ពុជា សូមអំពាវនាវដល់ប្រជាពលរដ្ឋអ្នកប្រើប្រាស់អគ្គិសនីទាំងអស់ ដែលមានបញ្ហាសង្ស័យថា នាឡិកាស្ទង់អគ្គិសនីរបស់ខ្លួនដើរមិនប្រក្រតី សូមធ្វើការស្នើសុំមកអាជ្ញាធរអគ្គិសនីកម្ពុជាដើម្បីធ្វើការផ្ទៀងផ្ទាត់រកភាពខុសត្រូវជូនដូចដែលបានអនុវត្តជាមួយជំនាញការជប៉ុនJICAកន្លងមករួចហើយ អាជ្ញាធរអគ្គិសនីកម្ពុជាធានាថា នឹងធ្វើការងារនេះបន្តទៀតជូនអ្នកប្រើប្រាស់ដោយយុត្តិធម៌ និងតម្លាភាពបំផុត។
ប្រសិនបើផ្ទៀងផ្ទាត់រួចហើយ អ្នកនោះនៅតែសង្ស័យមិនជឿលើការផ្ទៀងផ្ទាត់របស់អាជ្ញាធរអគ្គិសនីកម្ពុជានេះទេ អ្នកនោះអាចទៅទិញនាឡិកាណាដែលគេយល់ថា ត្រឹមត្រូវ ទោះជាទិញពីកន្លែងណា និងប្រទេសណាក៏ដោយ អាល្លឺម៉ង់ បារាំង ជប៉ុន អង់គ្លេស អាមេរិក ។ល។ រួចស្នើសុំមកអាជ្ញាធរអគ្គិសនីកម្ពុជា យើងខ្ញុំនឹងពិនិត្យព្រមទាំងអនុញ្ញាតឲ្យដាក់នាឡិកានោះវាស់និងកត់ត្រាទន្ទឹមគ្នាជាមួយនាឡិកាចាស់របស់អ្នកផ្គត់ផ្គង់ក្នុងរយៈពេល ៣ខែ ដើម្បីផ្ទៀងផ្ទាត់ធ្វើសាក្សីមើលទាំងអស់គ្នាថាតើនាឡិកាចាស់ដែលអ្នកផ្គត់ផ្គង់តំបន់នោះកំពុងប្រើ វាស់ខុសពីនាឡិកាដែលអ្នកសង្ស័យទិញមកនោះទេ។ បើដាក់វាស់ទន្ទឹមគ្នារួចឃើញថាវាខុសគ្នាមែន យើងខ្ញុំនឹងរកខុសត្រូវជូនអ្នកសង្ស័យនោះភ្លាម។
ដូច្នេះបើចង់បានភាពត្រឹមត្រូវ សូមធ្វើតាមនីតិវិធីខាងលើ ប៉ុន្តែបើចង់តែឃើញគីឡូតិចដោយមិនសំអាងលើជញ្ជីងអគ្គិសនីទេ យើងជាអាជ្ញាកណ្តាលពិតជាមិនអាចធ្វើជូនបានទេ ពីព្រោះការទិញលក់អគ្គិសនីត្រូវតែឈរលើមូលដ្ឋាននៃជញ្ជីងវាស់អគ្គិសនី មិនអាចសំអាងលើការប្រៀបធៀបថា គីឡូខែនេះតិចឬច្រើននោះទេ៕
Source: Kampuchea Thmey Daily
0 Comments