ភ្នំពេញ ៖ លោកស្រី ប៉ូលីន ថាម៉េស៊ីស (Pauline Tamesis) អ្នកសម្របសម្រួលថ្មីរបស់អង្គការសហប្រជាជាតិ និងជាតំណាងអង្គការកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជា បានចាត់ទុកកម្ពុជាជាប្រទេសគំរូ និងជាប្រទេសទីមួយ ដែលបានបញ្ជូនកងទ័ពទៅបម្រើសន្តិភាព ក្រោមឆត្រអង្គការសហប្រជាជាតិច្រើនជាងគេបំផុតនៅក្នុងតំបន់អាស៊ាន។
លោកស្រី ប៉ូលីន ថាម៉េស៊ីស បានលើកឡើងបែបនេះនៅក្នុងជំនួបពិភាក្សា ជាមួយសម្ដេចតេជោ ហ៊ុន សែន នាយករដ្ឋមន្ដ្រីកម្ពុជា កាលពីព្រឹកថ្ងៃទី២៩ ខែឧសភា ឆ្នាំ២០១៨នេះ នៅវិមានសន្តិភាព ដោយលោកស្រី បានលើកឡើងថា អង្គការសហប្រជាជាតិ មានមូលដ្ឋានយ៉ាងរឹងមាំ នៅកម្ពុជាក្នុងការបំពេញការធ្វើកិច្ចសហប្រតិបត្តិការ។ ការវិវឌ្ឍន៍និងការទទួលបានជោគជ័យរបស់កម្ពុជា ជាពិសេស ការសម្រេចបាននូវការអភិវឌ្ឍសហវត្សរ៍ គោលដៅអភិវឌ្ឍន៍សហវត្សរ៍ ឆ្នាំ២០៣០។
លោកស្រី ប៉ូលីន លើកឡើង កម្ពុជា គឺជាប្រទេសមួយ ដែលបានបញ្ជូនកងទ័ព ទៅបម្រើសន្តិភាព ក្រោមឆ័ត្រអង្គការសហប្រជាជាតិ ច្រើនជាងគេបំផុត នៅក្នុងតំបន់អាស៊ាន ហើយអង្គការសហប្រជាជាតិ បានចាត់ទុកថាកម្ពុជា គឺជាប្រទេសគំរូមួយ ព្រោះកម្ពុជា ជាប្រទេសមួយធ្លាប់បានទទួល កងទ័ពអង្គការសហប្រជាជាតិ ដើម្បីស្វែងរកសន្តិភាព ប៉ុន្តែត្រឹមតែរយៈពេលខ្លីប៉ុណ្ណោះ កម្ពុជាបានក្លាយជាប្រទេសមួយ ដែលបានបញ្ជូនកងទ័ព ទៅជួយថែរក្សាសន្តិភាព ជាមួយនឹងប្រទេសដទៃទៀត។ លើសពីនោះ ទៅទៀត លោកស្រីថា អង្គការសហប្រជាជាតិ បានទទួលស្គាល់នូវរបៀបវារៈទី១៩ របស់កម្ពុជាដែល នៅក្នុងគោលដៅអភិវឌ្ឍន៍សហវត្សរ៍ប្រកបដោយចីរភាព របស់អង្គការសហប្រជាជាតិ គឺមានរបៀបវារៈតែ១៨ទេ ប៉ុន្តែកម្ពុជាបានបន្ថែមមួយទៀត គឺរបៀបវារៈទី១៩ នោះគឺពាក់ព័ន្ធនឹងបញ្ហាមីន។
លោកស្រីលើកឡើងថា អង្គការសហប្រជាជាតិ សូមទទួលស្គាល់ ជាពិសេសប្រព័ន្ធអង្គការនៅកម្ពុជា នឹងបន្តជួយដល់កម្ពុជា ក្នុងការជំរុញសម្រេចឲ្យ បាននូវរបៀបវារៈនៃគោលដៅ អភិវឌ្ឍន៍ដោយចីរភាព ឆ្នាំ២០៣០ខាងមុខ។ លោកស្រី ក៏បានជម្រាបជូន សម្តេចតេជោ ផងដែរថា ប្រព័ន្ធអង្គការសហប្រជាជាតិ គឺប្តេជ្ញាធ្វើការរួមជាមួយនឹងកម្ពុជា និងគាំទ្រកម្ពុជា ចំពោះការរៀបចំឲ្យ មានប្រព័ន្ធសុវត្ថិភាព សន្តិសុខ ដល់កម្មករកម្មារិនី ដែលសម្តេចបានប្រកាស កន្លងមកនេះ។
ជាការឆ្លើយតប សម្តេចតេជោ ហ៊ុន សែន បានមានប្រសាសន៍ថា កម្ពុជាមានមោទភាពណាស់ ដែលបានធ្វើការជាមួយ អង្គការសហប្រជាជាតិ ក្នុងការថែរក្សាសន្តិភាព មកដល់ពេលនេះកម្ពុជា បានបញ្ជូនកងទ័ពប្រមាណ ១ពាន់នាក់ហើយ ហើយវាជាកាតព្វកិច្ចរបស់កម្ពុជា ក្នុងការធ្វើការភាពជាដៃគូ ជាមួយអង្គការសហប្រជាជាតិ។
សម្តេចតេជោបានថ្លែងអំណរគុណ ដល់អង្គការសហប្រជាជាតិផងដែរ ដែលបានគាំទ្រ និងទទួលស្គាល់ របៀបវារៈទី១៩ របស់កម្ពុជា ព្រោះបញ្ហាមីន គឺជាបញ្ហាសំខាន់ណាស់ សម្រាប់កម្ពុជា។ សម្តេច លើកទឹកចិត្ត ឲ្យប្រព័ន្ធភ្នាក់ងារអង្គការសហប្រជាជាតិទាំងអស់ ធ្វើការជាមួយនឹងស្ថាប័នកម្ពុជា ព្រោះថាជារៀងរាល់ឆ្នាំ តែងតែមានកិច្ចជួបពិភាក្សាគ្នា ជាប្រចាំ ប៉ុន្តែមួយឆ្នាំម្តង គឺមានរយៈពេលវែងណាស់។
សម្ដេចតេជោ ហ៊ុន សែន បានលើកទឹកចិត្ត ឲ្យពិចារណា ធ្វើយ៉ាងណាអាចបង្កើតជាក្រុមការងារ របស់អង្គការសហប្រជាជាតិ ធ្វើការនៅចន្លោះមួយឆ្នាំ ជាមួយនឹងស្ថាប័នកម្ពុជា ដើម្បីធ្វើយ៉ាងណាជំរុញឲ្យ កិច្ចពិភាក្សាប្រចាំឆ្នាំនេះ មានគុណភាពផង និងប្រសិទ្ធភាពផង៕
Source: Kampuchea Thmey Daily
0 Comments