កំពង់ឆ្នាំង ៖ យុវជន២នាក់ ជាអ្នកបើកម៉ូតូដូចគ្នា ម្នាក់បានស្លាប់ពាក់កណ្ដាលផ្លូវពេលដឹកបញ្ជូនទៅពេទ្យទីក្រុងភ្នំពេញ និងម្នាក់ទៀតរងរបួសធ្ងន់ធ្ងរ ខណៈពួកគេបានបើកម៉ូតូក្នុងទិសដៅច្រាសគ្នា និងបានបុកគ្នាពេញទំហឹង នៅលើផ្លូវកៅស៊ូទើបតែអ៊ុតរួចថ្មីៗ នៅចំណុចផ្លូវកោងកៀនវត្តយាយទេព នៅក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង នៅម៉ោង១២ និង១០នាទី ថ្ងៃត្រង់ ថ្ងៃទី២៩ ខែឧសភា ឆ្នាំ២០១៨។
សមត្ថកិច្ចនគរបាលចរាចរណ៍ក្រុងកំពង់ឆ្នាំង បានឲ្យដឹងថា មុនពេលកើតហេតុយុវជនឈ្មោះ ណាំ ទិដ្ឋាកា អាយុ១៦ឆ្នាំ ជាសិស្ស រស់នៅភូមិចំការតាម៉ៅ ឃុំស្រែថ្មី ស្រុករលាប្អៀរ បានបើកម៉ូតូម៉ាកគុប ពណ៌ស្លែ ពាក់ស្លាកលេខ ក.០៩៧៦ ក.ឆ១ ពីផ្សារក្រោមមកផ្សារលើក្នុងល្បឿនយឺតៗ។
ចំណែកយុវជនឈ្មោះ អ៊ុល វុទ្ធី អាយុ២៤ឆ្នាំ រស់នៅភូមិត្រពាំងបី ឃុំផ្សារឆ្នាំង ក្រុងកំពង់ឆ្នាំង បានបើកម៉ូតូសេរី០១២ ម៉ាកហុងដាឌ្រីម ពណ៌ខ្មៅ ពាក់ស្លាកលេខ កំពង់ឆ្នាំង ១ដេ ៩៣៥៦ ក្នុងល្បឿនយ៉ាងលឿនចេញពីផឹកស៊ីនៅសង្កាត់ខ្សាមទៅផ្សារក្រោម លុះដល់ចំណុចផ្លូវកោងកៀនវត្តយាយទេព ក៏បានបើករំលោភផ្លូវគេមកពីមុខក៏បានបុកម៉ូតូគុបពេញទំហឹងតែម្តង ហើយម៉ូតូ០១២នៅល្បឿនជ្រុលទៅមុខជាង១០ម៉ែត្រទៀតទើបដួលនៅកៀនផ្លូវ។ ក្នុងហេតុការណ៍នេះបណ្តាលឲ្យគេទាំង២នាក់ អត់ពាក់មួកសុវត្ថិភាពដូចគ្នា រងរបួសក្បាលយ៉ាងធ្ងន់ធ្ងរដូចគ្នា។
ក្រោយពេលកើតហេតុអ្នករបួសទាំង២ ត្រូវបានគេដឹកទៅកាន់មន្ទីរពេទ្យបង្អែកខេត្តកំពង់ឆ្នាំងដើម្បីសង្គ្រោះព្យាបាល។ ដោយឡែកយុវជនឈ្មោះ ណាំ សិដ្ឋាកា ( ជាកូនលោក ហុង វាស្នា ភ្នាក់ងារទូរទស្សន៍បាយ័នប្រចាំខេត្តកំពង់ឆ្នាំង ) ដោយមានរបួសធ្ងន់ធ្ងរជាងគេត្រូវបានក្រុមគ្រូពេទ្យខេត្តបញ្ជូនទៅកាន់មន្ទីរពេទ្យកាល់ម៉ែតក្រុងភ្នំពេញ តែទៅដល់ពាក់កណ្តាលផ្លូវក៏បានស្លាប់ ហើយរថយន្តពេទ្យខេត្តក៏បានដឹកមកកាន់លំនៅឋានវិញ។
ចំណែកម៉ូតូទាំង២គ្រឿង ត្រូវបានសមត្ថកិច្ចដឹកយកទៅរក្សាទុកនៅក្នុងអធិការដ្ឋាននគរបាលក្រុងកំពង់ឆ្នាំង កសាងសំណុំរឿងតាមនីតិវិធីច្បាប់៕
Source: Kampuchea Thmey Daily
0 Comments