ភ្នំពេញ ៖ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា អង្គការJCIA ជាដៃគូ របស់កម្ពុជា ជាង២០ឆ្នាំមកហើយ ដោយបានរួមចំណែកយ៉ាងច្រើន ចំពោះការអភិវឌ្ឍជនពិការ និងជនក្រីក្រ ឲ្យទទួលបាននូវការបណ្តុះបណ្តាល និងឱកាសការងារ និងមុខរបរ។
ថ្លែងក្រោយជំនួបពិភាក្សាការងារជាមួយលោក Fumio Yamada ប្រធានអង្គការសមាគមសហប្រតិបត្តិការកម្ពុជា-ជប៉ុនដែលហៅកាត់ថាJCIAកាលពីព្រឹកថ្ងៃទី២៩ ខែឧសភា ឆ្នាំ២០១៨នៅទីស្តីការក្រសួងលោកបណ្ឌិតអ៊ិត សំហេង បានបន្តថា ជាងនេះទៀត អង្គការក៏មានគម្រោងមួយទៀតលើការបណ្តុះបណ្តាល និងបញ្ជូនកម្មសិក្សាការី ទៅធ្វើការនៅប្រទេសជប៉ុនផងដែរ។
តែយ៉ាងណាក៏ដោយលោកបណ្ឌិត អ៊ិត សំហេងបានសាទរចំពោះបណ្តុះបណ្តាលនេះតែស្នើឲ្យអង្គការសមាគមសហប្រតិបត្តិការកម្ពុជា-ជប៉ុនរៀបចំនីតិវិធីឲ្យសមស្របទៅតាមបញ្ញត្តិរបស់ក្រសួងនិងបណ្តុះបណ្តាលឲ្យបានល្អជាមុនសិននឹងបញ្ជូនទៅធ្វើការនៅប្រទេសជប៉ុនដើម្បីឲ្យពួកគាត់មានការយល់ដឹង និងអាចធ្វើការបានប្រកបដោយសុវត្ថិភាព។
លោក Fumio Yamada លើកឡើងថា «លោកពិតជាមានភាពរីករាយ ដែលអង្គការរបស់លោក មានការជួយជ្រោមជ្រែង និងជួយទំនុកបម្រុង ពីខាងក្រសួងការងារ និងក្រសួងសង្គមកិច្ចផងដែរ ទើបមកដល់ពេលនេះអង្គការJCIA ក្លាយទៅជាទីភ្នាក់ងារមួយ ដែលបានបញ្ជូនកម្មសិក្សាការីទៅធ្វើការនៅជប៉ុន។
លោកថា គម្រោងបណ្តុះបណ្តាល និងបញ្ជូនកម្មសិក្សាការី ទៅបម្រើការងារនៅប្រទេសជប៉ុន ត្រូវបានបញ្ចប់ ហើយខាងអង្គការរបស់លោកចង់បន្តនូវគម្រោងនេះបន្តទៀត»។
ជាការឆ្លើយតប លោករដ្ឋមន្ត្រី ក៏បានកោតសរសើរ ចំពោះ អង្គការJCIA ដែលបានអនុវត្តការងារកន្លងមក និងសូមស្វាគមន៍នូវការ បន្តគម្រោងថ្មីនេះទៀត ប៉ុន្តែខាងអង្គការត្រូវ រៀបចំនូវឯកសារមួយចំនួន ដើម្បីឲ្យស្រប ទៅនឹង បទបញ្ញត្តិ ដែលតម្រូវដោយច្បាប់។
លោករដ្ឋមន្ត្រី មានប្រសាសន៍ថា «JCIAគឺជាមិត្ត និងជាដៃគូដ៏ល្អរបស់កម្ពុជា ដែលបានប្រមូលផ្តុំនូវអ្នកវិនិយោគជប៉ុនយ៉ាងច្រើនចូលមកអភិវឌ្ឍន៍នូវគម្រោងផ្សេងៗ នៅកម្ពុជា។
ម្យ៉ាងវិញទៀត នាពេលបីខែខាងមុខនេះ ខាងអង្គការCJIA នឹងនាំសមាជិករបស់ខ្លួន ដែលជាអ្នកវិនិយោគធំៗ មកកាន់កម្ពុជាដើម្បីធ្វើការវិនិយោគលើផ្នែក ឧស្សាហកម្ម និងសេវាកម្ម នៅកម្ពុជាបន្ថែមទៀត»។
លោកបណ្ឌិតអ៊ិត សំហេង ក៏បាន កោតសរសើរផងដែរ ចំពោះលោកYamada ប្រធានមជ្ឈមណ្ឌលពោធិ៍សែនជ័យ ដែលបានបង្កើតគម្រោងបានយ៉ាងល្អ ក្នុងការបណ្តុះបណ្តាលធនធានមនុស្ស ទៅធ្វើការនៅប្រទេសជប៉ុនកន្លងមកនេះ ហើយក្រសួងនឹងបន្តកិច្ចសហប្រតិបត្តិការជាមួយគ្នាទៀតពាក់ព័ន្ធទៅនឹងគម្រោងនៃការបណ្តុះបណ្តាលនេះ។
សូមរំលឹកថា អង្គការសមាគមសហប្រតិបត្តិការកម្ពុជា-ជប៉ុនដែលបង្កើត២០ឆ្នាំមកហើយនោះបានផ្តោតការយកចិត្តទុកដាក់ទៅលើការបណ្តុះបណ្តាលមុខជំនាញបច្ចេកទេសនិងវិជ្ជាជីវៈ ដល់ប្រជាជនក្រីក្រ និងជនពិការ នៅមជ្ឈមណ្ឌលពោធិ៍សែនជ័យរាជធានីភ្នំពេញដើម្បីឲ្យពួកគេមានឱកាសទទួលបានការងារធ្វើនៅក្នុងស្រុក និងអាចទៅធ្វើការនៅប្រទេសជប៉ុន តាមរយៈ JCIA ផងដែរ៕
Source: Kampuchea Thmey Daily
0 Comments