ភ្នំពេញ៖ គិតត្រឹមអំឡុងពេលពីរថ្ងៃ គឺថ្ងៃទី២៨ និង ២៩ ខែឧសភា កម្លាំងអាវុធហត្ថរាជធានីបានកសាងសំណុំរឿងបញ្ជូនជនសង្ស័យមួយក្រុមទៅតុលាការជាបន្តបន្ទាប់ ក្រោយពីកម្លាំងល្បាតមូលដ្ឋានអាវុធហត្ថខណ្ឌជ្រោយចង្វារ និងព្រែកព្នៅ បានឃាត់ខ្លួនជនសង្ស័យ ០៥ នាក់ ជាក់ស្ដែងពាក់ព័ន្ធគ្រឿងញៀនរួចមក។
មន្ត្រីកងរាជអាវុធហត្ថរាជធានី បានអោយដឹងនៅថ្ងៃទី២៩ ឧសភា ថា ពួកជនសង្ស័យទាំង ០៥ នាក់ ដែលកម្លាំងអាវុធហត្ថឃាត់ខ្លួននេះមាន ១/ឈ្មោះ ផល រ៉ា ភេទប្រុស អាយុ២១ឆ្នាំ,២/ឈ្មោះ ទូច ចាន់បូរ៉ាម៉ី ភេទប្រុស អាយុ២៨ឆ្នាំ, ៣/ឈ្មោះ អាត សំបុក ភេទប្រុស អាយុ១៨ឆ្នាំ។
ប្រភពបន្តថា នៅថ្ងៃទី២៨ ខែឧសភា ឆ្នាំ២០១៨ វេលាម៉ោង ១៧ និង ៣០ នាទី កម្លាំងល្បាតអាវុធហត្ថខណ្ឌព្រែកព្នៅ បានឃាត់ខ្លួនជនសង្ស័យពីរនាក់ ពាក់ព័ន្ធករណីគ្រឿងញៀន នៅចំណុចផ្លូវបេតុង មុខបុរីកម្ពុ ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ពួកគេទាំងពីរនាក់ ដែលកម្លាំងអាវុធហត្ថខណ្ឌព្រែកព្នៅឃាត់បន្តទៀតនោះមាន ១/ឈ្មោះ វិបុល រិទ្ធីស័ក្ត ហៅច្រឹម ភេទប្រុស អាយុ២៧ឆ្នាំ, ២/ឈ្មោះ ចាន់ វិសាល ហៅអណ្ដើក ភេទប្រុស អាយុ៣០ឆ្នាំ។
បច្ចុប្បន្នពួកគេទាំង ០៥ នាក់ខាងលើ ត្រូវបានសមត្ថកិច្ចជំនាញនៃការិយាល័យប្រឆាំងបទល្មើសគ្រឿងញៀន កងរាជអាវុធហត្ថរាជធានីភ្នំពេញ កំពុងធ្វើការសួរចម្លើយ និងកសាងសំណុំរឿងបញ្ជូនទៅតុលាការ ដើម្បីចាត់ការតាមច្បាប់នៅថ្ងៃនេះ៕
Source: Kampuchea Thmey Daily
0 Comments