ភ្នំពេញ ៖ ធនាគារ អេស៊ីលីដា ភីអិលស៊ី ជា"ប្រជាធនាគារ ដែលលោកអ្នកជឿទុកចិត្ត" កាលពីរសៀលថ្ងៃទី២៨ ខែឧសភា ឆ្នាំ២០១៨ បានប្រាព្ធពិធីពិធីចម្រើនមង្គល ការិយាល័យធនាគារ អេស៊ីលីដា ភីអិលស៊ី សាខាសែនសុខ (ផ្សារអ៊ីអន២) ថ្មី ដែលមានទីតាំង ស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញជាមួយនឹងការបំពាក់ នូវប្រព័ន្ធស្វ័យប្រវត្តិកម្មទំនើបៗ។
លោក ឈិន ចាន់ណា នាយកសាខា ធនាគារអេស៊ីលីដា សែនសុខ បានឲ្យដឹងថា ធនាគារសាខាថ្មីនៅផ្សារទំនើបអ៊ីអនទី២នេះ មានវិនិយោគប្រមាណជាង៦០ម៉ឺនដុល្លារអាមេរិកនិងក្លាយជាសាខាពិសេសទី២ បន្ទាប់ពីសាខាសុធារស់នៅផ្សារទំនើបអ៊ីអនទី១។
ជាមួយនឹងការបើកថ្មីនេះដែរ លោកបានបន្តថា «យើងបានប្តេជ្ញាចិត្ត ខិតខំជាពិសេស បម្រើសេវាជួនដល់អតិថិជន និងផ្សព្វផ្សាយឲ្យអតិថិជនបានយល់ដឹងកាន់តែច្រើន អំពីសេវាឌីជីថល តាមរយៈស្វ័យសេវាដោយខ្លួនឯង ដែលមានបុគ្គលិកឆ្នើមរបស់យើងរង់ចាំទទួលស្វាគមន៍និងបម្រើអតិថិជន៧ថ្ងៃក្នុង១សប្តាហ៍ ចាប់ពីម៉ោង៩ព្រឹក ដល់ម៉ោង ៧យប់។
លោកបានបន្ថែមទៀតថា អគារការិយាល័យថ្មីនេះបានសាងសង់ឡើង តាមស្តង់ដារ ធនាគារ ដែលបំពាក់ ដោយឧបករណ៍ ប្រព័ន្ធឌីជីថលខ្ពស់ ផាសុភាព ធ្វើស្វ័យប្រតិបត្តិការ បានយ៉ាងងាយស្រួល និងសុវត្ថិភាពខ្ពស់ បន្ថែមលើសេវាធនាគារទូទៅ។ មិនតែប៉ុណ្ណោះមានបុគ្គលិក និងថ្នាក់គ្រប់គ្រង ពោរពេញទៅដោយ បទពិសោធន៍ខ្ពស់ និងទេពកោសល្យ ក្នុងការប្រឹក្សា ជូនអតិថិជន ក្នុងការធ្វើប្រតិបត្តិការ បច្ចេកវិទ្យា FinTech និងមានការផ្តល់ការគាំទ្រ ពីការិយាល័យទំនាក់ទំនង អតិថិជន ក្នុងម៉ោងធ្វើការបូករួម ទាំងថ្ងៃឈប់សម្រាក។
លោកស្រី សូ ផនណារី អនុប្រធានប្រតិបត្តិ ធនាគារអេស៊ីលីដា ភីអិលស៊ី បានឲ្យដឹងក្នុងឱកាស ធ្វើពិធីចម្រើនមង្គលនេះថា សាខានេះ មានទំហំធំទូលាយ ដោយយើងធ្វើការិយាល័យថ្មីនេះ មានបញ្ចូល សេវាទំនើបកម្ម ជាធនាគារលក្ខណៈ ឌីជីថល មានបំពាក់ ស្វាយទំនើបបកម្ម ឬបច្ចេកវិទ្យាទំនើប ដែលអតិថិជន អាចបម្រើសេវាខ្លួនឯង ២៤ម៉ោង។
លោកស្រីក៏បាន ឲ្យដឹងបន្ថែមថា ជាមួយនឹងការបើក ដំណើរការសាខាថ្មី ដែលជាសាខាទី២៦២ ទូទាំងប្រទេសកម្ពុជា ធនាគារ អេស៊ីលីដា បានកិច្ចសហប្រតិបត្តិការ ការប្រើប្រាស់ប្រព័ន្ធ អេស៊ីលីដាទាន់ចិត្ត នៅតាមបណ្តា ហាងលក់ទំនិញ ស្ទើរទាំងអស់ នៅក្នុងផ្សារទំនើប អ៊ីអន២នេះ ដោយផ្តល់ភាពងាយស្រួល ដល់អតិថិជន របស់ធនាគារ ក្នុងការទូទាត់ ការទិញទំនិញ និងសេវាផ្សេងៗ ព្រមជាមួយ អត្ថប្រយោជន៍ជាច្រើនទៀត ដោយពុំចាំបាច់ មានសាច់ប្រាក់ក្នុងដៃ។
គួរបញ្ជាក់ថា ធនាគារអេស៊ីភីអិលស៊ីបានបង្កើតបុត្រសម្ព័ន្ធចំនួន៥រួមមានធនាគារអេស៊ីលីដាឡាវលីមីធីត អេស៊ីលីដាអេឃ្យូរឹធីភីអិលស៊ី វិទ្យាស្ថានពាណិជ្ជសាស្ត្រអេស៊ីលីដា ស្ថាប័នមីក្រូហិរញ្ញវត្ថុអេស៊ីលីដាមីយ៉ាន់ម៉ា និង អេស៊ីលីដាប្រូភើធីភីអិលធិឌីព្រមទាំងការិយាល័យតំណាងនៅសាធារណរដ្ឋសហភាពមីយ៉ាន់ម៉ា។
ធនាគារអេស៊ីលីដាមានទ្រព្យសកម្មសរុបចំនួនជាង៥,៤៩ប៊ីលានដុល្លារអាមេរិក សមតុល្យឥណទានសរុបចំនួន៣,១៥ប៊ីលានដុល្លារអាមេរិក និង ប្រាក់បញ្ញើសន្សំសរុបចំនួន៣,៥៧ប៊ីលានដុល្លារអាមេរិកគិតត្រឹមខែមេសាឆ្នាំ២០១៨នេះ៕
Source: Kampuchea Thmey Daily
0 Comments