បាត់ដំបង ៖ ក្មេងប្រុសចំនួន២នាក់ បានស្លាប់យ៉ាងអាណោចអាធ័មជាទីបំផុត នៅក្នុងទឹកនាដៃទន្លេសាប ខណៈដែលពួកគេទាំង២នាក់ បាននាំគ្នាចុះលេងទឹកនៅនឹងផ្ទះដែលជាផ្ទះបណ្តែតទឹក (របស់អ្នករស់នៅលើផ្ទៃទឹក ) ហើយបានប្រទាញគ្នាទៅក្នុងទឹកបណ្តាលអោយលង់ទាំង២នាក់តែម្តង។
ហេតុការណ៍ ដែលយើងទទួលបានពីរបាយការណ៍របស់លោក ណាប់ ស៊ីថា មេបញ្ជាការមូលដ្ឋាន កងរាជអាវុធហត្ថ ស្រុកឯកភ្នំ បានបញ្ជាក់ថា នៅវេលាម៉ោង ១ រសៀលថ្ងៃទី ២៩ ខែ ឧសភា ឆ្នាំ ២០១៨ មានការភ្ញាក់ផ្អើល និងឆោឡោមួយបានកើតឡើងនៅត្រង់ចំណុចភូមិអន្លង់តាអ៊ួ ក្នុងឃុំកោះជីវាំង ស្រុកកឯកភ្នំ ខេត្តបាត់ដំបង។
លោកមេបញ្ជាការបានបន្តថា ការភ្ញាក់ផ្អើលនេះ ដោយសារតែមានករណីក្មេងៗលង់ទឹកស្លាប់រហូតដល់ ២ នាក់ ដែលត្រូវជាបង ប្អូន បង្កើតនឹងគ្នា បន្ទាប់ពីពួកគេបានចុះលេងទឹកហើយមិនដឹងជាមានបញ្ហាអ្វីទើបបណ្តាលអោយពួកលង់ទឹកស្លាប់ព្រមៗគ្នាបែបនេះ។
គួរបញ្ជាក់ដែរថា វាជាទម្លាប់ប្រចាំថ្ងៃទៅហើយសម្រាប់អ្នករស់នៅលើផ្ទៃទឹកទន្លេ ព្រោះតំបន់នេះ គឺជាដៃទន្លេសាប ដែលតភ្ជាប់ពីស្ទឹងសង្កែ ទៅកាន់បឹងទន្លេសាប ដូច្នេះការចុះងូតទឹកមិនចាំបាច់ទៅណាឆ្ងាយទេ ព្រោះទឹកទន្លេនៅខាងក្រោមផ្ទះស្រាប់ ទើបមានការលង់បែបនេះ។
ក្មេងប្រុសទាំង២នាក់ មានឈ្មោះ ១. ចែ យូហាក់ អាយុ ១៣ ឆ្នាំ និង២.ឈ្មោះ ចែ យូហ៊ាង អាយុ ១១ ឆ្នាំ ត្រូវជាបងប្អូនបង្កើតនឹងគ្នា រស់នៅក្នុងភូមិ ឃុំកើតហតុខាងលើ ក្រោយពេលកើតហេតុ សមត្ថកិច្ចទាំងពីស្ថាប័ន បានចុះពិនិត្យ ព្រមទាំងបានប្រគល់សពក្មេងប្រុសទៅអោយក្រុមគ្រួសាររៀបចំធ្វើបុណ្យតាមប្រពៃណី និងទំនៀមទម្លាប់របស់អ្នករស់នៅលើផ្ទៃទឹកហើយ៕
Source: Kampuchea Thmey Daily
0 Comments