អគ្គស្នងការដ្ឋាន​នគ​របាល​ជាតិ ជា​ក្រុមទី​២ ​ដែល​ធ្វើ​ឲ្យ​ក្រុម​ចំណូល​ថ្មី​វិសាខា ស្គាល់​រសជាតិ​បរាជ័យ

ឆ្លងកាត់​៧​ប្រកួត​នៅក្នុង​ពានរង្វាន់​លី​គ​កំពូល​កម្ពុជា (Metfone Cambodian League 2018) ឃើញថា ​ក្រុម​ចំណូល​ថ្មី​វិសាខា ដែល​មហាជន​គិតថា​ជា​បេក្ខជន​មួយ​មិនអាច​រំលង​បាន​ក្នុងការ​ប្រជែង​យក​ជើងឯក​នៅ​រដូវ​កាល​នេះ​ បាន​ស្គាល់​បរាជ័យ​ជា​លើក​ទី​២​ហើយ ដោយ​ថ្វី​ជើង​ក្រុម​អគ្គស្នងការដ្ឋាន​នគរ​បាល​ជាតិ ថ្មីៗ​នេះ បន្ទាប់ពី​ធ្លាប់​ចាញ់​ក្រុម​អាស៊ី​អឺរ៉ុប កាលពី​ខែមេសា កន្លងទៅ។



​ការប្រកួត​ដែល​ធ្វើឡើង​នៅ​ទីលាន​កីឡដ្ឋាន AEU Park ម្តុំ​អរិយ​ក្សត្រ កាលពី​រសៀល​ថ្ងៃអាទិត្យ កន្លងទៅ​ក្រុម​អគ្គស្នងការដ្ឋាន​នគរ​បាល​ជាតិ បាន​បើក​ការ​នាំ​មុខមុន​ក្នុង​នាទី​ទី​២២ ថ្វី​ជើង​កីឡាករ នួន បូរី តែ​ខ្សែបម្រើ​វ័យក្មេង សាន គឹម​ហេង ស៊ុត​តាម​ស្មើ​ឱ្យ​ក្រុម​វិសាខា​វិញ មុន​ចប់​តង់​ទី​១​។ ចូល​តង់​ទី​២ អគ្គស្នងការដ្ឋាន​នគ​របាល​ជាតិ បា​នរក​គ្រាប់​បាល់​២​គ្រាប់​បន្ថែម​ដោយ​ថ្វី​ជើង​កីឡាករ​កូរ៉េខាងត្បូង Noh Sangmin និង​កីឡាករ ទិ​ត្យ ឌី​ណា​។



​ក្រោយ​យកឈ្នះ​ក្រុម​វិសាខា លោក សារ៉េត ស៊ីដន គ្រូ​ជំនួយ​របស់​ក្រុម​អគ្គស្នងការដ្ឋាន​នគរបាល​ជាតិ បាន​លើកឡើង​ថា «​យើង​សប្បាយចិត្ត​ដែល​យើង​យកឈ្នះ​ក្រុម​វិសាខា ដែល​អាច​ថា​ជា​ក្រុម​ខ្លាំង​មួយ​។ យើង​បាន​ប្រឹងប្រែង​ទាំងអស់គ្នា​។ វា​ជា​ការ​ខិតខំ​ទាំងអស់គ្នា ទាំង​១១​នាក់​លើ​ទីលាន ៧​នាក់​នៅ​បង់​បម្រុង និង​ក្រុម​គ្រូបង្វឹក​។ យើង​បាន​ឆែក​ចំណុចខ្លាំង​និង​ខ្សោយ​របស់​ពួកគេ ហើយ​យើង​បាន​ត្រៀមខ្លួន​ល្អ​។ យើង​សហការគ្នា​ល្អ សាមគ្គី​គ្នា ខ្ញុំ​សូម​សរសើរ​កីឡាករ​យើងទាំងអស់គ្នា​។ ប្រកួត​នេះ​យើង​ខ្លាំង​នៅ​ចំណុច​ការពារ បម្រើ និង​វាយបក ហើយ​យើង​វាយបក​បាន​លឿន នាំ​ឲ្យ​យើង​ឈ្នះ​»​។

ចំណែក​លោក ហុក សុ​ជី​វ័​ន្ត គ្រូបង្វឹក​របស់​ក្រុម​វិសាខា វិញ​បាន​ឆ្លើយតប​នឹង​បរាជ័យ​លើក​ទី​២​របស់​ក្រុម​ថា «​យើង​ទទួលស្គាល់​បរាជ័យ​នេះ​។ កំហុស​ធ្ងន់​ជាងគេ​គឺ​ការរៀបចំ​របៀប​លេង​និង​កីឡាករ​។ យើង​ជ្រើសរើស​កីឡាករ​ខុសពី​ទម្រង់​ដែល​យើង​ធ្លាប់​លេង​ពីមុន​។ ដោយសារ​កីឡាករ​ការពារ​ខ្មែរ​យើង​របួស យើង​បានដាក់​ខ្សែការពារ​កូរ៉េខាងជើង នៅ​តំបន់​ការពារ​ជំនួស ធ្វើ​ឲ្យ​តំបន់​កណ្ដាល​យើង​ពិបាក​មែនទែន​។ ទី​២​គឺ​វិន័យ​កីឡាករ​នៅលើ​ទីលាន​នៅមានកម្រិត ធ្វើឱ្យ​បាត់បង់​ភាព​ដឹកនាំ​(leadership)​លើ​ទីលាន​ច្រើន​។ ទី​៣​គឺ​ខ្ញុំ​តែង​រំឭក​កីឡាករ​គ្រប់​កីឡាករ​ថា​ក្រុម​ណាក៏ដោយ​ដែល​ប៉ះ​វិសាខា គេ​មិនដែល​ប្រហែស​ជាមួយ​វិសាខា​ទេ ព្រោះ​គេ​តែងតែ​ចង់​ឈ្នះ​វិសាខា​។ ដូច្នេះ​យើង​ខ្លួនឯង​ក៏ត្រូវ​តែ​ប្រយ័ត្ន​គ្រប់ពេល​។ ទីលាន​ក៏​ជា​កត្តា​មួយ​ប៉ុន្តែ​វា​មិន​ចោទ​ប៉ុន្មាន​ទេ គេ​លេង​បាន យើង​ក៏​លេង​បាន តែ​សំខាន់​ចិត្តសាស្ត្រ​គេ​ខ្លាំង​ជាង​យើង​នៅ​ប្រកួត​នេះ​។ វិន័យ​នៃ​ការលេង​និង​ឆន្ទៈ​គេ​ខ្លាំង​ជាង​យើង​ដាច់​តែម្ដង​»​។



តាម​កម្មវិធី​ប្រកួត​បន្ទាប់​ក្នុង​សប្ដាហ៍​ទី​៨ ក្រុម​អគ្គស្នងការដ្ឋាន​នគរ​បាល​ជាតិ ត្រូវ​ប៉ះ​ក្រុម​អាស៊ី​អឺរ៉ុប ម្តង​នៅវេលា​ម៉ោង​៣​រសៀល​ថ្ងៃ​សៅរ៍ ទី​២ ខែមិថុនា ឆ្នាំ​២០១៨ លើ​ទីលាន​កីឡដ្ឋាន AEU Park ដដែល ខណៈ​ក្រុម​វិសាខា វិញ​ត្រូវ​ប៉ះ​ក្រុម​ណាហ្គា​វើ​ល នៅវេលា​ម៉ោង​៦​ល្ងាច​ថ្ងៃ​ជាមួយគ្នា​លើ​ទីលាន​មជ្ឈមណ្ឌល​ហ្វឹកហ្វឺន​កីឡា​កងយោធពល​ខេមរភូមិន្ទ​៕

  

Source: Kampuchea Thmey Daily