លោករដ្ឋមន្ត្រីក្រសួងសុខាភិបាល ចុះសួរសុខទុក្ខអ្នកជំងឺ ដែលមកទទួលសេវាព្យាបាលនៅមន្ទីរពេទ្យកាល់ម៉ែត

ភ្នំពេញ ៖ លោកម៉ម ប៊ុនហេង រដ្ឋមន្ត្រីក្រសួងសុខាភិបាល និងលោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត កាលពីព្រឹកថ្ងៃទី២៩ ខែឧសភា ឆ្នាំ២០១៨នេះ បានចុះសំណេះសំណាលសួរសុខទុក្ខជាមួយបងប្អូនអ្នកជំងឺ ដែលមកទទួលសាវាព្យាបាលនានានៅមន្ទីរកាល់ម៉ែត។

បន្ទាប់ពីចុះសួរសុខទុក្ខបងប្អូនអ្នកជំងឺ និងក្រុមគ្រូពេទ្យទៅតាមជំនាញនៅតាមអគារសង្គ្រោះនានានៅក្នុងមន្ទីរពេទ្យកាល់ម៉ែតហើយនោះ, លោករដ្ឋមន្ត្រីក្រសួងសុខាភិបាល និងលោកអគ្គនាយកមន្ទីរពេទ្យ បានបន្តចុះពិនិត្យពីដំណើរការ នៃការសាងសង់អគារសង្គ្រោះបន្ទាន់អាគារ១២ជាន់របស់មន្ទីរពេទ្យកាល់ម៉ែតដែលបុកគ្រឹះសាងសង់ផងដែរ។

ជាមួយគ្នានោះដែរ លោកម៉ម ប៊ុនហេង រដ្ឋមន្ត្រីក្រសួងសុខាភិបាល ក៏បានមានប្រសាសន៍ពីការវាយតម្លៃខ្ពស់ចំពោះការខិតខំប្រឹងប្រែងក្រុមគ្រូពេទ្យទាំងអស់របស់មន្ទីរពេទ្យកាល់ម៉ែត ក្នុងការពិនិត្យនិងព្យាបាលជូនប្រជាពលរដ្ឋ។ លោកបានកត់សម្គាល់ឃើញថា មានប្រជាពលរដ្ឋបានមកទទួលសេវា ពិនិត្យ និងព្យាបាល របស់មន្ទីរពេទ្យកាល់ម៉ែតជាច្រើននាក់ ដែលអាចបញ្ជាក់ពីកម្រិតនៃបច្ចេកទេសខ្ពស់ ក្នុងការព្យាបាល ទាំងបច្ចេកទេស និងសម្ភារៈ ទំនើបៗ នៅក្នុងប្រទេសកម្ពុជា។

លោករដ្ឋមន្ត្រីក្រសួងសុខាភិបាលបានកោតសរសើរដល់ថ្នាក់ដឹងនាំ មន្ត្រីបុគ្គលិក របស់មន្ទីរពេទ្យកាល់ម៉ែត ក៏ដូចជាមន្ទីរពេទ្យទាំងអស់នៅទូទាំងប្រទេស ដែលបានបំពេញភារកិច្ចក្នុងការបម្រើជូនប្រជាពលរដ្ឋ អស់ពីកម្លាំងកាយចិត្ត ក្នុងការព្យាបាល។

លោករដ្ឋមន្ត្រីក៏បានជំរុញឲ្យក្រុមគ្រូពេទ្យទាំងអស់បន្តយកចិត្តទុកដាក់ ពិនិត្យថែទាំ និងព្យាបាលអ្នកជំងឺឲ្យបានល្អបន្ថែមទៀត ប្រកបដោយក្រមសីលធម៌វិជ្ជាជីវៈពេទ្យឲ្យបានត្រឹមត្រូវ។

លោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត ក៏បានមានប្រសាសន៍ដែរថា អត្រាជាសះស្បើយ នៃអ្នកជំងឺដែលមកសម្រាកព្យាបាល នៅមន្ទីរពេទ្យនេះ មានប្រមាណ៩៨,៥ភាគរយ។ លោកអគ្គនាយកបានបន្ថែមថា នៅមន្ទីរពេទ្យកាល់ម៉ែត ប្រភេទជំងឺ ដែលមកសម្រាកព្យាបាល ច្រើនជាងគេនោះគឺ គ្រោះថ្នាក់ចរាចរណ៍ បន្ទាប់មកគឺជំងឺលើសឈាម និងទឹកនោមផ្អែម។

លោកអគ្គនាយកមន្ទីរពេទ្យ ក៏បានអំពាវនាវ ឲ្យប្រជាពលរដ្ឋទាំងអស់ ការពារសុខភាព កុំឲ្យកើតមានជំងឺដោយសារវាជាវិធីដ៏ប្រសើរបំផុត ព្រោះថាមន្ទីរពេទ្យ មិនអាចព្យាបាលជាសះស្បើយ លើគ្រប់មុខជំងឺនោះទេ ប្រសិនបើជំងឺ ឈានដល់ដំណាក់កាលធ្ងន់ធ្ងរ។ ក្នុងន័យនោះដែរ លោកអគ្គនាយកមន្ទីរពេទ្យកាល់ម៉ែត បានលើកទឹកចិត្ត ឲ្យប្រជាពលរដ្ឋ ទៅត្រួតពិនិត្យសុខភាព ឲ្យបានទៀងទាត់បើនៅក្មេងគួរតែទៅពិនិត្យសុខភាពយ៉ាងហោចណាស់៦ខែម្តង ឬក៏៣ខែម្តង ដោយគោរពទៅវេជ្ជបញ្ជារបស់គ្រូពេទ្យជំនាញដើម្បីឲ្យសុខភាពរបស់ទាំងអស់គ្នាល្អប្រសើរ៕