បន្ទាយមានជ័យ ៖ ដោយយោងតាមរបាយការណ៍ការិយាល័យនគរបាលប្រឆាំងការជួញដូរ និងការពារអនីតិជនខេត្តបន្ទាយមានជ័យ បានប្រាប់អ្នកយកព័ត៌មានឲ្យដឹងថា ក្នុងខែឧសភា ឆ្នាំ២០១៨នេះ សមត្ថកិច្ចថៃបានបញ្ជូនពលករធ្វើការនៅស្រុកថៃដោយខុសច្បាប់ មានចំនួន៤.២៦៨នាក់ ក្នុងនោះស្រី១.៤៧៣នាក់ កុមារចំនួន៤៣៩នាក់ (កុមារី១៦៧នាក់) ដឹកតាមរថយន្តភាគីថៃចំនួន១០២គ្រឿង តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ។
លោក សួន បវរ អភិបាលខេត្ត និង ជាគណៈបញ្ជាការឯកភាពខេត្តបន្ទាយមានជ័យបានលើកឡើងជារឿយៗក្នុងកិច្ចប្រជុំដល់កម្លាំងសមត្ថកិច្ច ដែលឈរជើងតាមបន្ទាត់ព្រំដែន និងកម្លាំងជំនាញត្រូវលុបបំបាត់ច្រករបៀងខុសច្បាប់ និងទប់ស្កាត់ពលករចំណាកស្រុកដោយខុសច្បាប់ ការពារសុវត្ថិភាពដល់បងប្អូនប្រជាពលរដ្ឋ។
លោក សួន បវរ បានធ្វើការដាស់តឿននិងដាក់វិធានការត្រូវចាប់មេខ្យល់ និងអប់រំណែនាំដល់ប្រជាពលរដ្ឋឲ្យមានការយល់ដឹង ត្រូវបញ្ឈប់ការចាញ់បោកមេខ្យល់ ត្រូវស្វែងទៅរកការងារធ្វើដោយស្របច្បាប់វិញល្អជាង។
គួរបញ្ជាក់ផងដែរថា ពលករចំណាកស្រុកខុសច្បាប់សព្វថ្ងៃនេះ នៅតែបន្តលួចចេញតាមច្រករបៀងខុសច្បាប់នៅឡើយ គឺបណ្តាលមកពីកម្លាំងសមត្ថកិច្ចឈរជើងតាមបន្ទាត់ព្រំដែនឃុបឃិតជាមួយមេខ្យល់ ហើយកម្លាំង និងមន្ត្រីជំនាញដាក់ខែជាមួយមេខ្យល់ និងពលករម្នាក់បង់ប្រាក់ចំនួន១៥.០០០រៀលទៅ២០.០០០រៀល ដាច់១ខែ មេខ្យល់ម្នាក់បង់១លានទៅ២លានរៀលជាប្រចាំខែ បើមិនបង់លុយឲ្យទេ គឺចាប់ពលករអប់រំឲ្យត្រឡប់ទៅវិញ ចំណែកមេខ្យល់ត្រូវបង់លុយរាប់លានបើមិនបង់ត្រូវចាប់ដាក់គុកថែមទៀតផង៕
Source: Kampuchea Thmey Daily
0 Comments