ភ្នំពេញ ៖ បុរសម្នាក់ ក្រោយពីចេញពីធ្វើការរោងចក្រ ក៏បានឆ្លៀតទៅយកអត្តសញ្ញាណប័ណ្ណនៅឯផ្ទះ លុះជិះទៅដល់ផ្លូវលំមានសភាពរអិលហើយជិះម៉ូតូយឺតៗ ស្រាប់តែមានជនសង្ស័យមានគ្នា៣នាក់ប្រដាប់ដោយកាំភ្លើងខ្លីមួយដើមមិនស្គាល់ម៉ាកបានភ្ជង់គំរាមប្លន់យកម៉ូតូនិងទូរស័ព្ទបានសម្រេច កាលវេលាម៉ោង៦និង១៥នាទីល្ងាចថ្ងៃទី២៩ ខែឧសភា ឆ្នាំ២០១៨នៅខាងកើតវត្តភ្នៀតស្ថិតនៅភូមិស្នោរ សង្កាត់ស្នោរ ខណ្ឌពោធិ៍សែនជ័យ។
ជនរងគ្រោះឈ្មោះសម្បត្តិ វណ្ណា ភេទប្រុស អាយុ២៨ឆ្នាំមុខរបរកម្មកររោងចក្រ ស្នាក់នៅសង្កាត់កំបូលខណ្ឌពោធិ៍សែនជ័យ មានភូមិកំណើតនៅភូមិក្នុងវាំង ឃុំវាំងចាស់ ស្រុកឧដុង្គ ខេត្តកំពង់ស្ពឺ។ ក្រុមជនសង្ស័យមានគ្នាបីនាក់ស្លៀកពាក់ស៊ីវិលប្រដាប់ដោយកាំភ្លើងខ្លី១ដើមមិនស្គាល់ម៉ាក។ សម្ភារៈ ដែលជនសង្ស័យប្លន់យករួមមានទូរស័ព្ទដៃអាយហ្វូនហ្ស៊ិក១គ្រឿង និងម៉ូតូម៉ាកហុងដាឌ្រីមសេ១២៥ស៊េរី២០១៧ពណ៌ខ្មៅពាក់ស្លាកលេខ ភ្នំពេញពេញ 1GE -2439 មួយគ្រឿង។
តាមប្រភពព័ត៌មានពីជនរងគ្រោះបានអោយដឹងថា នៅមុនពេលកើតហេតុ រូបគាត់ទើបចេញពីធ្វើការរោងចក្រ ហើយក៏ឆ្លៀតធ្វើដំណើរទៅយកអត្តសញ្ញាណប័ណ្ណ នៅឯស្រុកកំណើត នៅស្រុកឧដុង្គ ដោយជិះកាត់តាមភូមិសាស្ត្រ ភូមិកើតហេតុខាងលើ។ លុះជិះមកដល់ផ្លូវលំកន្លែងកើតហេតុ ដោយសារផ្លូវទើបនឹងឈូសឆាយថ្មី ពេលមានភ្លៀងធ្លាក់មួយមេផងនោះ បណ្តាលអោយរអិលប៉ប៉ិចប៉ប៉ាច់ ហើយរូបគាត់ជិះម៉ូតូយឺតៗ ស្រាប់តែលេចមុខជនសង្ស័យមានគ្នា៣នាក់មានអាវុធខ្លី១ដើមជិះម៉ូតូមួយគ្រឿងម៉ាកហុងដាឌ្រីមសេ១២៥មិនចាំស្លាកលេខ បានភ្ជង់គំរាមយកទូរស័ព្ ទរួចអោយជនរងគ្រោះចុះពីលើកម៉ូតូបើមិនចុះពួកគេនឹងបាញ់សម្លាប់ចោលតែម្ដង។ ពេលនោះជនរងគ្រោះភ័យខ្លាច ក៏ព្រមឲ្យអោយម៉ូតូទៅជនសង្ស័យតាមសម្រួល ហើយជនសង្ស័យនាំគ្នាជិះចេញទៅបាត់ដោយសុវត្ថិភាព។ បន្ទាប់មកជនរងគ្រោះបានដើរចេញពីកន្លែងកើតហេតុជាង១០០ម៉ែត្រមកដល់កន្លែងការដ្ឋានដីពុះឡូត៍លក់ ទើបបានប្រជាពលរដ្ឋតេប្តឹងសមត្ថកិច្ចអោយជួយអន្តរាគមន៍ភ្លាមៗផងដែរ តែមិនមានប្រសិទ្ធភាពឡើយ។ ប្រជាពលរដ្ឋបានប្រាប់ថា មុននេះបន្ដិចរូបគាត់ ក៏បានឃើញជនសង្ស័យមានគ្នា៣នាក់ដើរចុះឡើងៗនៅម្ដុំកន្លែងកើតហេតុជាងកន្លះម៉ោងមកហើយ មិនដឹងដើររកអីហើយក៏មិនដឹងថាពួកនេះជាចោរប្លន់ដែរ ព្រោះមុខចោរស្អាតដូចតែយើងដែរ។
ក្រោយពេលកើតហេតុជនរងគ្រោះ ត្រូវបានសមត្ថកិច្ចប៉ុស្តិ៍នគរបាលរដ្ឋបាលស្នោរ នាំទៅដាក់ពាក្យបណ្ដឹងដើម្បីងាយស្រួលក្នុងការស្រាវជ្រាវស្វែងរកចាប់ខ្លួនយកមកផ្ដន្ទាទោសតាមផ្លូវច្បាប់៕
Source: Kampuchea Thmey Daily
0 Comments