ភ្នំពេញ ៖ កម្លាំងល្បាត និងកម្លាំងជំនាញកងរាជអាវុធហត្ថ ខណ្ឌព្រែកព្នៅ បានឃាត់ខ្លួនមនុស្សចំនួន០២នាក់ពីបទពាក់ព័ន្ធដោយខុសច្បាប់នូវសារធាតុញៀន កាលពីថ្ងៃទី២៩ ខែឧសភា ឆ្នាំ២០១៨ នៅត្រង់ចំណុចផ្លូវបេតុងមុខបុរីកម្ពុភូមិផ្សារលិច សង្កាត់ព្រែព្នៅ ខណ្ឌព្រែកព្នៅរាជធានីភ្នំពេញ។
កងរាជអាវុធហត្ថខណ្ឌព្រែកព្នៅ បានឲ្យដឹងថា ជនសង្ស័យទី១ឈ្មោះ ចន វាសនា ហៅសូ ភេទប្រុស អាយុ៣១ឆ្នាំ ជនជាតិខ្មែរ មុខរបរធ្វើនំបញ្ចុករស់នៅភូមិគ្រួស សង្កាត់សំរោង ខណ្ឌព្រែកព្នៅរាជធានីភ្នំពេញ។ ជនសង្ស័យទី២ឈ្មោះម៉ាប់ តៃម៉ូ ភេទប្រុស អាយុ១៩ឆ្នាំ ជនជាតិខ្មែរ មុខរបរធ្វើនំបញ្ចុករស់នៅភូមិ ជាមួយគ្នា។ វត្ថុតាងចាប់យកបានមានម្សៅក្រាមពណ៌សថ្លាចំនួន០២កញ្ចប់តូចម៉ូតូចំនួន០១គ្រឿងម៉ាក សង់កូរ៉េពណ៌ក្រហមគ្មានខោអាវគ្មានស្លាកលេខ។
ប្រភពដដែលបានឲ្យដឹងទៀតថា មុនពេលកើតហេតុកម្លាំងល្បាត និងកម្លាំងជំនាញអាវុធហត្ថខណ្ឌព្រែកព្នៅ បានចេញល្បាតក្នុងភូមិសាស្ត្ររបស់ខ្លួន។ លុះដល់វេលាម៉ោង ខាងលើ ក៏ប្រទះឃើញម៉ូតូ០១គ្រឿងម៉ាកសង់កូរ៉េ ពណ៌ក្រហមគ្មានខោអាវ គ្មានស្លាកលេខជិះគ្នា០២នាក់ពីត្បូងទៅជើងដោយមានការសង្ស័យ កម្លាំងយើងក៏ហៅអោយឈប់ដើម្បីធ្វើការត្រួតពិនិត្យ ក៏រកឃើញថ្នាំម៉ាទឹកកក០២កញ្ចប់តូច ដែលអ្នកអង្គុយខាងមុខជាអ្នកបើកម៉ូតូឈ្មោះ ម៉ាប់ តៃម៉ូ កាន់នឹងដៃឆ្វេងឃើញដូចនោះកម្លាំងយើងក៏ឃាត់ខ្លួនជនសង្ស័យទាំង០២នាក់តែម្តង។
បច្ចុប្បន្នជនសង្ស័យទាំង០២នាក់រួមទាំងវត្ថុតាងបានបញ្ជូនទៅការិយាល័យប្រឆាំងបទល្មើសគ្រឿងញៀនកងរាជអាវុធហត្ថរាជធានីភ្នំពេញ ចាត់ការបន្តទៅតាមផ្លូវច្បាប់៕
Source: Kampuchea Thmey Daily
0 Comments