របួស​សាច់ដុំ​ភ្លៅ​របស់​អ្នកចាំទី ស៊ូ យ៉ា​ទី ក្នុង​បឹងកេត ត្រូវ​សម្រាក​រយៈពេល​លើសពី​១​ខែ

​នៅ​ពេលដែល​ក្រុម​បឹងកេត​អែ​ហ្វ​ស៊ី យកឈ្នះ​ក្រុម​ព្រះខ័ន​រាជ​ស្វាយរៀង សប្តាហ៍​ទី​៦ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018) កាលពី​ល្ងាច​ថ្ងៃអាទិត្យ ទី​២០ ខែឧសភា ឆ្នាំ​២០១៨ លើ​ទីលាន​កីឡដ្ឋាន​កងយោធពល​ខេមរភូមិន្ទ (​ស្តា​ត​ចាស់​) ដោយ​លទ្ធផល ៣​ទល់​១ កីឡាករ ស៊ូ យ៉ា​ទី ត្រូវ​បាន​សែង​ចេញពី​ទីលាន​ប្រកួត​ដោយសារ​រងរបួស​ភ្លាត់​សាច់ដុំ​ភ្លៅ​។

មួយថ្ងៃ​បន្ទាប់​ក្រុម​បឹងកេត បាន​ប្រកាស​នៅលើ​ហ្វេ​ស​ប៊ុ​ក​ផ្លូវការ​របស់ខ្លួន​ថា​កីឡាករ ស៊ូ យ៉ា​ទី អាច​នឹង​ត្រូវ​សម្រាក​រយៈពេល​ពី​១​ទៅ​២​សប្ដាហ៍​ក្រោយ​ទទួល​រងរបួស​ភ្លាត់​សាច់ដុំ​ភ្លៅ​ហើយ​ត្រូវ​ផ្លាស់ប្ដូរ​ចេញ​ភ្លាមៗ​នៅ​នាទី ៥៧ ក្នុងអំឡុងពេល​ប្រកួត​ទល់នឹង​ក្រុមព្រះ​ខ័ន​រាជ​ស្វាយរៀង​។



ក្រោយ​ក្រុម​គ្រូពេទ្យ​ធ្វើការ​ពិនិត្យ​លម្អិត​បន្ថែម បង្ហាញថា យ៉ា​ទី ភ្លាត់​សរសៃ​ពួរ​សាច់ដុំ​ភ្លៅ​ខាងក្រោយ​និង​ដាច់​ផ្នែក​តូចៗ​នៃ​ជាលិកា​ដូច្នេះ​ត្រូវ​ធ្វើការ​សម្រាក​និង​ធ្វើ​លំ​ហាត់​ឲ្យ​បាន​ត្រឹមត្រូវ​តាម​វេជ្ជបញ្ជា​របស់​គ្រូពេទ្យ​។

ប៉ុន្តែ​កីឡាករ ស៊ូ យ៉ា​ទី បាន​ប្រាប់​គណៈកម្មការ​ប្រកួត​បាល់ទាត់​ជាតិ (CNCC) កាល​ពី​ពេល​ថ្មីៗ​ថា​ របួស​របស់​គេ​ត្រូវ​សម្រាក​ព្យាបាល​អាច​លើស​ពី​១​ខែ​ទើប​អាច​ចូល​ប្រកួត​វិញ​បាន​។ កីឡាករ​រូបនេះ​បញ្ជាក់ថា «​ពី​ដំបូង​ពេទ្យ​គាត់​ថា សម្រាក​ត្រឹម​២​អាទិត្យ​អី​ទេ តែ​ដល់ពេល​ក្រោយមក​យើង​ដើរទៅ​ឈឺ សរសៃពួរ​ហ្នឹង​ឈឺចាប់​ផ្ដើម​ជាំ គាត់​ក៏​ប្រាប់​ថា អាច​ឈាន​ដល់​៣​អាទិត្យ ហើយ​គាត់​ឲ្យ​តាមដាន​ខ្លួនឯង ថា​នៅ​ឈឺ​ទៀត ឬ ក៏​អត់​អី​។ ប្រសិនបើ​លែង​សូវ​ឈឺ​ហើយ អាច​ចាប់ផ្ដើម​ចូល​ហ្វឹកហាត់​បាន តែ​មិនមែន​ដូច​រាល់ដង​ទេ គ្រាន់តែ​ដើរ និង ធ្វើតាម​លំ​ហាត់​របស់​ពេទ្យ​ដាក់​ឲ្យ​។ អញ្ចឹង​ប្រហែល​យូរ​ទៀត ទើប​អាច​ចូលចាប់​វិញ​បាន​»​។



សូម​រំលឹកថា ​ក្រោយពេល​សមាជិក​ក្រុម​ជម្រើសជាតិ​កម្ពុជា រូប​នេះ​រងរបួស​​លោក ហៅ សុជាតិ ដែល​ជា​គ្រូបង្វឹក​ស្តីទី​ប្រចាំ​ក្រុម​បានសម្រេច​ចិត្ត​ប្តូរ​អ្នកចាំទី​ដៃ​ទី​២ គឺ កឹម មករា ចូលចាប់​ជំនួស​ផង​ដែរ​។ អំឡុងពេ​ល​អវត្តមាន ស៊ូ យ៉ា​ទី មួយ​រយៈ​ខ្លី​នេះ កឹម មករា មាន​តួនាទី​សំខាន់​ក្នុង​ការ​ជួយ​ក្រុម​រារាំង​បាល់​នៅ​តំបន់​មុខ​ទី ស្រប​ពេល​ដែល​ក្រុម​ត្រូវការ​ពិន្ទុ​ជាខ្លាំង​ដើម្បី​ប្រជែង​កៅអី​កំពូល​តារាង​ក៏ដូចជា​ការពារ​តំណែង​ជើងឯក​។

និយាយ​ពី ស៊ូ យ៉ា​ទី រូបគេ​បាន​ចាប់​អាជីព​ជា​អ្នកចាំទី​ដំបូង​ជាមួយ​ក្រុម​បៀ​ល​ប្រាយ នៅ​ឆ្នាំ​២០១៦​ដល់​២០០៧ ខណៈ​នៅ​ឆ្នាំ​២០០៩ ដល់​២០១៣ រូបគេ​ចូលរួម​ជាមួយ​ក្រុម​ក្រសួង​ការពារជាតិ និង​ពី​ឆ្នាំ​២០១៣ ដល់​២០១៥ គេ​ផ្លាស់​ទៅ​ក្រុម​ភ្នំពេញ​ក្រោ​ន និង​ពី​ឆ្នាំ​២០១៥ ដល់​បច្ចុប្បន្ន ចូលរួម​ជាមួយ​បឹងកេត​។ ចាប់ពី​ឆ្នាំ​២០១២ ដល់​បច្ចុប្បន្ន​រូបគេ​ជាប់​ឈ្មោះ​ក្នុង​ក្រុម​ជម្រើសជាតិ​កម្ពុជា ពី​ឈុត U22 ដល់​ឈុត​ធំ​ផងដែរ​។

ស៊ូ យ៉ា​ទី ធ្លាប់​ឈ្នះ​ពានរង្វាន់​សម្តេច​តេ​ជោ ហ៊ុន សែន ឆ្នាំ​២០១០ ជាមួយ​ក្រសួងការពារជាតិ ហើយ​នៅ​ឆ្នាំ​២០១៤ ឈ្នះ​ជើងឯក​ពានរង្វាន់​លី​គ​កំពូល​កម្ពុជា ជាមួយ​ភ្នំពេញ​ក្រោ​ន ខណៈ​នៅ​ឆ្នាំ​២០១៦​និង​២០១៧ ឈ្នះ​ជើងឯក​លី​គ​កំពូល​កម្ពុជា ជាមួយ​បឹង​កេត​ម្តង​។ នៅ​ឆ្នាំ​២០១៥ គេ​ធ្លាប់​ឈ្នះ​ជើងឯក​រង​ពានរង្វាន់ 2015 Mekong Club Championship ជាមួយ​បឹងកេត ក្រោយ​ចាញ់​ក្រុម​ថៃ Buriram United ១​ទល់​០​។ ចំណែក​ពានរង្វាន់​ឯកត្តជន​វិញ​គេ​ធ្លាប់​ឈ្នះ​ពានរង្វាន់​ស្រោមដៃ​មាន​លី​គ​កំពូល​កម្ពុជា​ឆ្នាំ​២០១៤ និង​២០១៧ ផង​ដែរ ខណៈ​ក្នុង​ពាន 2015 Mekong Club Championship ឈ្នះ​ស្រោមដៃ​មាស​ដូចគ្នា​៕

  

Source: Kampuchea Thmey Daily