ភ្នំពេញ ៖ បុរសជាកម្មករសំណង់ម្នាក់ ត្រូវបានគេចាប់ខ្លួនយកមកប្រគល់ឲ្យសមត្ថកិច្ចនគរបាលមូលដ្ឋានចាត់ការតាមច្បាប់ ចោទពីបទលួចទ្រព្យសម្បត្តិក្នុងក្រុមហ៊ុនអ័រគីដេរ ដែលគាត់កំពុងធ្វើការនៅទីនោះមានទីតាំងនៅចំណុចអគារផ្ទះល្វែងស្ថិតនៅក្នុងភូមិអ័រគីដេរ សង្កាត់អូរបែកក្អម ខណ្ឌសែនសុខ កាលពីព្រឹកថ្ងៃទី២៩ ខែឧសភា ឆ្នាំ២០១៨។
សមត្ថកិច្ចបានឲ្យដឹងថា ជនសង្ស័យខាងលើឈ្មោះ ណុប ពន្លក ហៅចាម ភេទប្រុស អាយុ៣២ឆ្នាំ មុខរបរកម្មករសំណង់ ស្នាក់នៅភូមិទ្រា សង្កាត់ចោមចៅ ខណ្ឌមានជ័យ។
បើតាមបណ្តឹងរបស់ដើមចោទឈ្មោះ ហ៊ុន ផាន់ណា ភេទប្រុស អាយុ៣១ឆ្នាំ ជាតំណាងក្រុមហ៊ុនអ័រគីដេរ បានឲ្យដឹងថា មុនពេលកើតហេតុ ជនសង្ស័យខាងលើចូលមកធ្វើការធម្មតា ហើយបានចូលទៅលួចយកខ្សែភ្លើងចំនួន៦ដុំនិងប្រអប់កុងតាក់ភ្លើងចំនួន៦ប្រអប់ យកមកលាក់ទុកនៅក្នុងសួនច្បាររួចចូលទៅខាងក្នុងវិញ។
នៅពេលនោះខាងសន្តិសុខឃើញ និង ស្គាល់ក៏បានតាមទៅមើលក្នុងសួនច្បារជាទីកន្លែងគេបានចូលទៅនោះស្រាប់តែប្រទះឃើញខ្សែភ្លើងចំនួន៦ដុំ និង ប្រអប់កុងតាក់ភ្លើងចំនួន៦ប្រអប់ទៀតទើបតាមចាប់ខ្លួនកម្មកររូបនេះយកមកប្រគល់ឲ្យប៉ូលិសមូលដ្ឋានចាត់ការតាមច្បាប់តែម្តង។
ជនជាប់ចោទដំបូងបានបដិសេធថា ខ្លួនពុំបានលួចយកខ្សែភ្លើងនេះទេ ប៉ុន្តែខាងសន្តិសុខបានអះអាងថា ពួកគេបានឃើញច្បាស់ផ្ទាល់ភ្នែក ទើបទៅត្រួតពិនិត្យនៅនោះ រកឃើញវត្ថុតាងទើបមកឃាត់ខ្លួន។
ប៉ូលិសបានប្រគល់ខ្សែភ្លើងនោះឲ្យទៅខាងក្រុមហ៊ុនវិញ និងបានកសាងឯកសារបញ្ជូនជនសង្ស័យទៅតុលាការផ្តន្ទាទោសតាមច្បាប់៕
Source: Kampuchea Thmey Daily
0 Comments