សម្តេចតេជោ ហ៊ុន សែន ជួបសំណេះសំណាលជាមួយកម្មករជាង២ ម៉ឺននាក់នៅខេត្តកំពង់ឆ្នាំង

ភ្នំពេញ ៖ នៅវេលាម៉ោង៧និង៣០នាទីព្រឹកថ្ងៃទី២៧ ខែមិថុនា ឆ្នាំ២០១៨នេះ សម្តេចតេជោ ហ៊ុន សែន បានអញ្ជើញជួបសំណេះសំណាលជាមួយបងប្អូនកម្មករ កម្មការិនីសរុបប្រមាណ ២៤.៣៧៥នាក់មកពីរោងចក្រចំនួន៥ ស្ថិតនៅ ស្រុកសាមគ្គីមានជ័យ ខេត្តកំពង់ឆ្នាំង។

ខេត្តកំពង់ឆ្នាំង ជាខេត្តទី៦ ហើយដែលសម្តេចតេជោ ហ៊ុន សែន បានអញ្ជើញចុះជួបសំណេះសំ ណាលជាមួយបងប្អូនកម្មករ កម្មការិនី បន្ទាប់ពីខេត្តកំពង់ចាម កំពង់ស្ពឺ កណ្តាល ស្វាយរៀង និងព្រះសីហនុ។

លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា រោងចក្រសហគ្រាសទាំង ៥ ដែលអនុញ្ញាតឲ្យកម្មករ កម្មការិនី ជួបសំណេះសំណាលជាមួយសម្តេចតេជោនាព្រឹកនេះ មកពីស្រុកសាមគ្គីមានជ័យចំនួន ៣ និងស្រុកកំពង់ត្រឡាចចំនួន២។ រោងចក្រទាំង៥នេះ មានរោងចក្រចំនួន ៤ ជារោងចក្រកាត់ដេរសម្លៀក បំពាក់ និងរោងចក្រ១ទៀត ជារោងចក្រផលិតស្បែកជើង ហើយផលិតផលផលិតចេញពីរោងចក្រទាំងនេះ ត្រូវបាននាំចេញទៅកាន់ទីផ្សារអន្តរជាតិ និងផ្គត់ផ្គង់ទីផ្សារក្នុងប្រទេស។

មកដល់ពេលបច្ចុប្បន្នខេត្តកំពង់ឆ្នាំងមានសហគ្រាស គ្រឹះស្ថានចំនួន ១៥២ មានកម្មករ និយោជិត ៤៣.៧៧២នាក់ ក្នុងនោះរោងចក្រកាត់ដេរសម្លៀក បំពាក់ និងផលិតស្បែកជើងមានចំនួន១៨ មានកម្មករ និយោជិតចំនួន ៤២.១២៦នាក់ ដែលមានប្រាក់ ឈ្នួលសរុបជាង៩៤លានដុល្លារអាមេរិកក្នុងមួយឆ្នាំ។

នេះគឺជាជំនួបលើកទី៤៦ ហើយ គិតចាប់តាំងពីថ្ងៃទី២០ ខែសីហា ឆ្នាំ២០១៧មក។ ជំនួបទាំង ៤៦ លើកនេះ មាន កម្មករ កម្មការិនីសរុប ៦០៥.២១២ នាក់៕