ភ្នំពេញ ៖ សមត្ថកិច្ចនគរបាលព្រហ្មទណ្ឌខេត្តកំពង់ធំ កាលពីរសៀលថ្ងៃទី២៦ ខែមិថុនា ឆ្នាំ២០១៨នេះ បានបញ្ជូនអ្នកយកព័ត៌មានរបស់ស្ថានីយទូរទស្សន៍កងយុទ្ធពលខេមរភូមិន្ទ ប៉ុស្តិ៍លេខ៥ម្នាក់មកសាលាដំបូងរាជធានីភ្នំពេញ ប្រគល់អោយអយ្យការអមសាលាដំបូង។
បន្ទាប់មកលោកខាំ សុផារី ព្រះរាជអាជ្ញារងអមតុលាការ បានបង្គាប់អោយសមត្ថកិច្ចបញ្ជូនពិរុទ្ធជនទៅឃុំខ្លួននៅពន្ធនាគារព្រៃសតាមដីកាសម្រេចរបស់តុលាការ។
នគរបាលព្រហ្មទណ្ឌខេត្តកំពង់ធំ បានឃាត់ខ្លួនលោក ហ៊ាង លីហាក់ អាយុ៤៣ឆ្នាំ កាលពីព្រឹកថ្ងៃទី២៦ ខែមិថុនា ឆ្នាំ២០១៨ ខណៈពេលអ្នកយកព័ត៌មានរូបនេះ កំពុងធ្វើដំណើរមកភ្នំពេញ។
យោងតាមសមត្ថកិច្ចបានអោយដឹងថា លោក ហ៊ាង លីហាក់ អាយុ៤៣ឆ្នាំ ត្រូវចាប់ខ្លួនតាមដីកា បង្គាប់របស់លោក ខាំ សុផារី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ពាក់ព័ន្ធនឹងបទល្មើស ឆបោក ជាច្រើនករណី ប្រព្រឹត្តនៅ ខេត្តកំពង់ធំ ខេត្តសៀមរាប និងរាជធានីភ្នំពេញ ដែលសំណុំរឿងឆបោកនេះត្រូវបានតុលាការសម្រេចសេចក្ដីរួចហើយ នៅក្នុងឆ្នាំ២០១៤ បន្ទាប់មកតុលាការកំពូលបានកាត់ក្ដីរក្សាទុកបទចោទប្រកាន់នោះដដែល ហើយសាលដីកាបានចូលស្ថាពរនៅឆ្នាំ២០១៧ ទើបសមត្ថកិច្ចបានអនុវត្តតាមសេចក្ដីសម្រេចចាប់ខ្លួនពិរុទ្ធជនតាមអំណាចសាលដីកាស្ថាពរនោះ។
យោងតាមឯកសាររបស់តុលាការតាំងពីថ្នាក់ក្រោមរហូតដល់តុលាការកំពូល តុលាការបានសម្រេចផ្ដន្ទាទោសលោកហ៊ង លីហាក់ ដាក់ពន្ធនាគារមួយឆ្នាំ ក្រោមបទចោទប្រកាន់ ឆបោក៕
Source: Kampuchea Thmey Daily
0 Comments