ភ្នំពេញ ៖ សាលាមធ្យមសិក្សាបច្ចេកទេសហ្ស៊ី វ៉េ សេ ទទួលបានវិញ្ញាបនបត្រ ISO 9001-2015 ពីក្រុមហ៊ុន GIC ដែលជាក្រុមហ៊ុនវាយតម្លៃមួយ មានការទទួលស្គាល់លំដាប់ថ្នាក់អន្តរជាតិ មានទីស្នាក់ការនៅប្រទេសសិង្ហបូរី។
ថ្លែងនៅក្នុងពិធីប្រគល់វិញ្ញាបនបត្រ ISOនេះដែរ លោក ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា តាមរយៈការប្រគល់វិញ្ញាបនបត្រនៅពេលនេះ គឺជាម៉ែត្រវាស់មួយ ក្នុងការកំណត់នូវបទដ្ឋាន នៃការដឹកនាំរបស់គណៈគ្រប់គ្រង និងគុណភាព នៃការអប់រំ បច្ចេកទេស ជំនាញ និងការវិវត្តរបស់សាលាមួយនេះ ប្រកបដោយការទទួលខុសត្រូវ និងមានការកែលំអបំពេញបន្ថែម។
ក្រៅពីនេះ ក៏ជាការបង្ហាញអំពីកិច្ចខិតខំប្រឹងប្រែងរបស់ថ្នាក់ដឹកនាំ ក្នុងការបំពេញការងារ និងការជម្រុញលើកកម្ពស់ការអប់រំនៅកម្ពុជា ដើម្បីឆ្លើយតបនឹងតម្រូវការចាំបាច់ នូវកម្លាំងពលកម្ម ដែលមានជំនាញ ក្នុងទីផ្សារការងារនាពេលបច្ចុប្បន្ននេះផងដែរ។
លោកបានបន្តថា សមិទ្ធផលដែលសាលាទទួលបាននាពេលនេះ គឺឆ្លៀតតបទៅនឹងយុទ្ធសាស្ត្រអាទិភាពរបស់ក្រសួងការងារក្នុងការអភិវឌ្ឍន៍ការអប់រំបណ្តុះបណ្តាលបច្ចេកទេសនិងវិជ្ជាជីវៈជាពិសេសគាំទ្រដល់គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥ ២០២៥របស់រាជរដ្ឋាភិបាលកម្ពុជាដែលសំដៅជំរុញការកែប្រែនិងធ្វើទំនើបកម្មរចនាឧស្សាហកម្មកម្ពុជាពីអតិពលកម្មឈានទៅឧស្សាហកម្មលើផ្នែកជំនាញត្រឹមឆ្នាំ២០២៥។
លោកបន្ថែមថា ការអប់រំបណ្តុះបណ្តាលជំនាញ បច្ចេកទេស និងវិជ្ជាជីវៈ គឺជាកត្តាដែលមិនអាចខ្វះបាន ក្នុងការអភិវឌ្ឍន៍ សេដ្ឋកិច្ចសង្គម និងជំរុញឲ្យអ្នកសិក្សាទទួលបាននូវចំណេះដឹង ជំនាញបច្ចេកទេស ជាមួយសមត្ថភាពពិតប្រាកដ ដើម្បីក្លាយជាពលករជំនាញ អ្នកបច្ចេកទេស ក្នុងការបង្កើនធនធាន មនុស្ស សម្រាប់អភិវឌ្ឍសង្គម និងសេដ្ឋកិច្ចជាតិ ស្របពេលដែលប្រទេស កំពុងមានសុខសន្តិភាព និងស្ថេរភាពនយោបាយដ៏ពិតប្រាកដ។
លោក ស៊ឹម សូរិន ទីប្រឹក្សាក្រសួងការងារ និងបណ្តុះបណ្តាលវិជ្ជាជីវៈ និងជានាយកសាលាមធ្យមសិក្សា បច្ចេកទេស JVC បានមានប្រសាសន៍ឲ្យដឹងថា សាលាដែលមានទីតាំងនៅផ្លូវលេខ៦អា ភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញនេះ បានវិវត្តន៍ខ្លួន ពីមជ្ឈមណ្ឌលបណ្តុះបណ្តាលបច្ចេកទេស JVC មកជា សាលាមធ្យមបច្ចេកទេស JVC ហើយមានការឧបត្ថម្ភគាំទ្រ ពីអង្គការស្ម័គ្រចិត្ត ជនជាតិជប៉ុន និងរាជរដ្ឋាភិបាលជប៉ុន ទាំងអគារ ឧបករណ៍សម្ភារៈ ដែលបំពាក់ក្នុងសាលានិងរោងជាង សម្រាប់ធ្វើការបណ្តុះបណ្តាលទៅលើជំនាញ បច្ចេកទេសជួសជុលរថយន្ត ដែលស្ថិតនៅក្រោម ការគ្រប់គ្រងរបស់ក្រសួងការងារ និងបណ្តុះបណ្តាលវិជ្ជាជីវៈ។
លោកបានបញ្ជាក់ថា សាលាបានដំណើរការបណ្តុះបណ្តាលជំនាញ បច្ចេកទេសជាច្រើនដូចជា កម្រិតសញ្ញាបត្រជាន់ខ្ពស់បច្ចេកទេស កម្រិតសញ្ញាបត្របច្ចេកទេសវិជ្ជាជីវៈ កម្រិតវិញ្ញាបនបត្រវិជ្ជាជីវៈ និង កម្មវិធីស្ពានចម្លងបន្តជំនាញជាដើម៕
Source: Kampuchea Thmey Daily
0 Comments