រាជរដ្ឋាភិបាល​កម្ពុជា​ គ្រោង​កាត់បន្ថយ​ការ​នាំ​ចូល​ផលិតផល​សម្រេច​ពី​បរទេស​ដើម្បី​លើកស្ទួយ SME​ក្នុងស្រុក

ភ្នំពេញ ​៖ ប្រធាន​សម្ព័ន្ធ​សហគមន៍​សហគ្រាស​ធុន​តូច និង​មធ្យម​កម្ពុជា​បាន​ឲ្យ​ដឹងថា​ រាជរដ្ឋាភិបាល​កម្ពុជា​គ្រោង​ដាក់ចេញ​យុទ្ធសាស្ដ្រ​កាត់បន្ថយ​ផលិតផល​សម្រេច​ពី​បរទេស​ដើម្បី​លើកស្ទួយ​វិស័យ​ឧស្សាហកម្ម​ធុន​តូច និង​មធ្យម​ឲ្យ​កាន់តែ​ប្រសើរឡើង​។
​
ថ្លែង​ក្នុង​កម្មវិធី ការជំរុញ​លក់​ផលិតផល​សហគ្រាស ធុន​តូច និង​មធ្យម​តាម​ប្រព័ន្ធ​អ៊ី​ធើ​ណិ​ត​រវាង​កម្ពុជា​-​ឥណ្ឌា​កាលពី​ថ្ងៃទី​២០ ខែមិថុនា ឆ្នាំ​២០១៨​លោក ឧកញ៉ា តែ តាំង​ប៉ ប្រធាន​សម្ព័ន្ធ​សហគមន៍​សហគ្រាស​ធុន​តូច និង​មធ្យម​កម្ពុជា​បាន​បន្ត ថា បច្ចុប្បន្ននេះ​កម្ពុជា តែងតែ​នាំចូល​ផលិតផល​សម្រេច ពី​បណ្ដា​ប្រទេស​ផ្សេងៗ​ដូចជា ប្រទេស​ថៃ​ជាដើម ដែល​ការ​នាំចូល ផលិតផល​នេះ នឹងធ្វើ​ឲ្យ​មានការ​ប៉ះពាល់​ដល់ SME ក្នុងស្រុក​។​
​
លោក​ឧកញ៉ា​បាន​បន្ថែមទៀតថា ​« ដើម្បី​លើកស្ទួយ SME រាជរដ្ឋាភិបាល​កម្ពុជា មាន​គោលការណ៍​ស្រ ប់​ហើយ​ក្នុងការ​កាត់បន្ថយ​ការនាំ​ចូល​ផលិតផល​សម្រេច​ពី​បរទេស ដើម្បី​ជួយ​ដល់ SME​ព្រោះថា SME​គឺ ជា​ឆ្អឹងខ្នង​នៃ​កំណើន​សេដ្ឋកិច្ចជាតិ ប្រសិនបើ​អ្នក​ទាំងអស់គ្នា មិន​កាត់បន្ថយ​ការនាំ​ចូល​ទេ នោះ SME មិនអាច​ងើប​រួច​នោះឡើយ​»​។​
​
លោក​ឧកញ៉ា​បានបញ្ជាក់​ទៀតថា ក្នុង​គោលបំណង​លើកស្ទួយ SME សម្ព័ន្ធ​សហគមន៍​សហគ្រាស​ធុន​តូច និង​មធ្យម​កម្ពុជា បានសម្រេច​សហការ​ជាមួយ​ក្រុមហ៊ុន​ឥណ្ឌា Sram&Wram Resources ដើម្បី​ជំរុញ​ផលិតផល​ខ្មែរ​ដែលមាន ទៅកាន់​ទីផ្សារ​ពិភពលោក តាម​ប្រព័ន្ធ​អន​ឡាញ​។​
​
លោក Sailesh Lachu Hiranandani ប្រធាន​ក្រុមហ៊ុន SRAM & MRAM បាន​ឲ្យ​ដឹងថា​«​ខ្ញុំ​រំពឹងថា ផលិតផល​របស់​កម្ពុ​ជា នឹងមាន​ទទួលស្គាល់​ច្រើន ព្រោះ​ដោយសារតែ​ប្រទេស​កម្ពុជា ដី​មាន​ជីវជាតិ​ល្អ អាច​ដាំ​ដំណាំ​បានល្អ ប្រទេស​ភាគច្រើន​ដូចជា វៀតណាម​-​ថៃ ក៏បាន​ទិញ​ផលិតផល​ខ្មែរ​យកទៅ​វេ​ច​ខ្ចប់ លក់ និង​មាន​ភាពល្បីល្បាញ​លើ​ទីផ្សារ​ពិភពលោក​ផងដែរ​»​។​
​
អាជីវករ​ខ្មែរ​ដែល​បាន​ចូលរួម​នៅក្នុង​កម្មវិធី​នោះបាន​បង្ហាញ​ពី​ភាព​សុទិដ្ឋិនិយម ចំពោះ​ការសហការ​វាង​សមាគម​សហគ្រិន​ធុន​តូច និង​មធ្យម និង​ក្រុមហ៊ុន​ឥណ្ឌា ចំពោះ​ការដាក់​លក់​ផលិតផល​ខ្មែរ​តាម​ប្រព័ន្ធ​អន​ឡាញ​នេះ ដោយ​ម្នាក់​គ្រោង​នឹង​បង្កើត​ផលិតផល​ផ្សេងៗ​បន្ថែមទៀត ដើម្បី​សម្រុក​ក្នុងការ​នាំចេញ​។​
​អ្នកនាង កែវ សុខ​ទៀង ប្រធាន​ក្រុមហ៊ុន សេង ហួត ហ្វា​ហ្វា បាន​ថ្លែង​ឲ្យ​ដឹងថា «​ខ្ញុំ​ពិតជា​សប្បាយរីករាយ ចំពោះ​ការសហការ​គ្នា​រវាង សមាគម​សហគ្រិន​ធុន​តូច និង​មធ្យម និង​ក្រុមហ៊ុន​ឥណ្ឌា Sram&Wram Resources ដែល​គ្រោង​នឹង​នាំ​ផលិតផល​ខ្មែរ ទៅ​លក់​លើ​ទីផ្សារ​អន្ដរជាតិ តាមរយៈ​ប្រព័ន្ធ​អ៊ី​ន​ធើ​ណេ​ត​នេះ​។ ខ្ញុំ​ពិតជា មាន​កម្លាំងចិត្ត​ក្នុង​ការផលិត ផលិតផល​ខ្មែរ​បន្ដទៀត​ណាស់ ព្រោះ​យើង​មាន​ទីផ្សារ​ទាំង​ក្នុងប្រទេស និង​ក្រៅប្រទេស​»៕​
​

Source: Kampuchea Thmey Daily