ប្រទេសកាតារ កាលពីថ្ងៃចន្ទ បាននិយាយថា ខ្លួនបានដាក់ពាក្យបណ្តឹងមួយប្រឆាំង នឹងប្រទេសអារ៉ាប់រួមនៅឯតុលាការជាន់ខ្ពស់របស់អង្គការសហប្រជាជាតិ ដោយចោទប្រកាន់គូសត្រូវឈូងសមុទ្ររបស់ខ្លួនមួយនេះពីបទរំលោភបំពានសិទ្ធិមនុស្ស និងប្រកាន់ពូជសាសន៍។
កាលពីថ្ងៃទី៥ ខែមិថុនាឆ្នាំមុន ប្រទេសអារ៉ាប៊ីសាអ៊ូឌីត អារ៉ាប់រួម បារ៉ែននិងអេហ្ស៊ីប បានកាត់ផ្តាច់ទំនាក់ទំនងជាមួយកាតារដោយចោទប្រកាន់ថា កាតារបានគាំទ្រដល់អំពើភេរវកម្មនិងប្រទេសអ៊ីរ៉ង់។ ទោះបីជាយ៉ាងណាក៏ដោយ រដ្ឋាភិបាលក្រុងដូហាបានបដិសេធការអះអាងនេះ។
ពួកគេក៏បានចាត់វិធានការជាច្រើនរួមទាំងរារាំងក្រុមហ៊ុនអាកាសចរណ៍របស់រដ្ឋពីការប្រើប្រាស់ដែនអាកាសរបស់ពួកគេនិងបណ្តេញពលរដ្ឋកាតាចេញពីទឹកដីរបស់ពួកគេផងដែរ។ ប្រទេសអារ៉ាប៊ីសាអ៊ូឌីតបានបិទព្រំដែនដីគោករបស់ខ្លួនជាមួយកាតារ។
កាលពីថ្ងៃចន្ទ ក្រសួងការបរទេសកាតារបានប្រកាសថ្កោលទោស “ការរំលោភសិទ្ធិមនុស្សដែលកើតឡើងពីការរើសអើងរបស់អារ៉ាប់រួមប្រឆាំងប្រទេសកាតារនិងពលរដ្ឋកាតារ”។
ក្រសួងក៏បានថ្កោលទោសផងដែរចំពោះការឡោមព័ទ្ធដែនដី ដែនសមុទ្រនិងដែនអាកាសខុសច្បាប់ប្រឆាំងកាតាដែលជាផ្នែកមួយនៃយុទ្ធនាការនៃការបង្ខិតបង្ខំនយោបាយនិងសេដ្ឋកិច្ច។
ក្រសួងបាននិយាយក្នុងសេចក្តីថ្លែងការណ៍មួយដោយដកស្រង់សម្តីរបស់រដ្ឋមន្ត្រីក្រសួងការបរទេសកាតារលោក Mohammed bin Abdulrahman Al-Thani ថា “វិធានការខុសច្បាប់ដែលដាក់ដោយអារ៉ាប់រួមបានបំបែកបំបាក់គ្រួសារជាច្រើន”។
លោកបានបន្តថា “អារ៉ាប់រួមបានដកហូតក្រុមហ៊ុនកាតាព្រមទាំងអចលនទ្រព្យនិងទ្រព្យសម្បត្តិហើយបានបដិសេធការទទួលបានជាមូលដ្ឋាននៃការអប់រំ វេជ្ជសាស្ត្រនិងយុត្តិធម៌នៅក្នុងតុលាការអារ៉ាប់រួម”។
ដោយសារតែរឿងនេះ ប្រទេសកាតារបានចាប់ផ្តើមនីតិវិធីប្រឆាំងនឹងអារ៉ាប់រួមនៅតុលាការយុត្តិធម៌អន្តរជាតិ (ICJ) ដែលមានមូលដ្ឋាននៅទីក្រុងឡាអេដែលជាតុលាការកំពូលរបស់អង្គការសហប្រជាជាតិសម្រេចក្នុងជម្លោះរវាងប្រទេសនានា។
កាតារបានស្នើឲ្យ ICJ បញ្ជាឲ្យអារ៉ាប់រួមចាត់វិធានការទាំងអស់ដើម្បីអនុវត្តតាមកាតព្វកិច្ចអន្តរជាតិរបស់ខ្លួនដោយរួមទាំងបញ្ឈប់និងដកហូតវិធានការរើសអើងនិងស្ដារឡើងវិញនូវសិទ្ធិរបស់ពលរដ្ឋកាតារផងដែរ។
សេចក្តីថ្លែងការណ៍បានបន្ថែមថា ប្រទេសកាតារក៏បានទាមទារឲ្យមានសំណងពេញលេញរួមទាំងសំណងចំពោះគ្រោះថ្នាក់ដែលទទួលរងដោយសារតែការរំលោភរបស់អារ៉ាប់រួមលើអនុសញ្ញាអន្តរជាតិស្តីពីការលុបបំបាត់រាល់ទម្រង់នៃការរើសអើងពូជសាសន៍ (CERD) ផងដែរដែលប្រទេសទាំងពីរបានចុះហត្ថលេខាផងដែរ៕ AFP
Source: Kampuchea Thmey Daily
0 Comments