ភ្នំពេញ ៖ កាលពីព្រឹកថ្ងៃទី១២ ខែមិថុនា ឆ្នាំ២០១៨នេះ អតីតនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញម្នាក់ ត្រូវបានមន្ត្រីពន្ធនាគារព្រៃស ម១ បញ្ជូនខ្លួនមកសាលាដំបូងរាជធានីភ្នំពេញ ដើម្បីបើកសវនាការរឿងឃាតកម្ម(បាញ់សម្លាប់សន្តិសុខផ្សារស្ទឹងមានជ័យនៅកន្លែងហាងផឹកស៊ី)។
សវនាការនេះ ដឹកនាំដោយលោក វ៉េង ហ៊ត់ អនុប្រធានសាលាដំបូងរាជធានីភ្នំពេញ ជាប្រធានក្រុមប្រឹក្សាជំនុំជម្រះ និងលោក ហ៊ឹង ប៊ុនថន ជាតំណាងអយ្យការ។
ជនត្រូវចោទមានឈ្មោះ សាន បូរី ភេទប្រុស អាយុ៣៧ឆ្នាំ ជនជាតិខ្មែរ មុខរបរនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ស្នាក់នៅ ផ្ទះលេខ៣១២ ផ្លូវលេខ៤៤C ភូមិទ្រា សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ បានឆ្លើយសារភាពថា កាលពីថ្ងៃទី១៤ខែតុលា ឆ្នាំ២០១៧ ខ្លួនបានចូលទៅហាងផឹកស៊ីមួយ ហើយជនរងគ្រោះ ដែលបានស្លាប់នោះ បាននិយាយឌឺដងដាក់ខ្លួនថា អាប៉ូលិសមាន់ស្ងោរ គ្រាន់តែផឹកស៊ីយកអាវុធមកតាម ក៏មានទំនាស់ពាក្យសំដីតិចតួច ក៏ប្រតាយប្រតប់គ្នា ខណៈនោះជនសង្ស័យឈ្មោះ សាន បូរី បានដកអាវុធខ្លីបាញ់ឡើងលើ១គ្រាប់ និង២គ្រាប់ បានបាញ់ត្រូវជនរងគ្រោះឈ្មោះជ័យ ប៊ុនថន បណ្តាលឲ្យស្លាប់។
សូមជម្រាបថា ទោះជាយ៉ាងណារឿងក្តីឃាតកម្មខាងលើនេះ ត្រូវបានលោកចៅក្រមសម្រេចកំណត់យកថ្ងៃទី១៥ ខែមិថុនា ឆ្នាំ២០១៨ វេលាម៉ោង២រសៀលដើម្បីប្រកាសសាលក្រម។
គួររំលឹកថា ហេតុការណ៍នេះ បានកើតឡើងកាលពីថ្ងៃទី១៤ ខែតុលា ឆ្នាំ២០១៧ វេលាម៉ោង១៩និង៤០នាទី នៅចំណុច ក្នុងហាងផឹកស៊ីមួយ ផ្ទះគ្មានលេខ ផ្លូវលំ ក្រុមទី១១ ភូមិទ្រា សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ បង្កឡើងដោយឈ្មោះ សាន បូរី ភេទប្រុស អាយុ៣៧ឆ្នាំ ជនជាតិខ្មែរ មុខរបរ នគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានបាញ់សម្លាប់ជនរងគ្រោះឈ្មោះ ជ័យ ប៊ុនថន ភេទ ប្រុស អាយុ ៥០ ឆ្នាំ ជនជាតិខ្មែរ មុខរបរ សន្តិសុខផ្សារស្ទឹងមានជ័យ ស្នាក់នៅ ផ្ទះ ជួលភូមិទ្រា សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ស្លាប់នៅកន្លែងកើតហេតុ។ វត្ថុតាងចាប់យកបានរួមមាន៖ អាវុធខ្លីមួយដើមម៉ាករ៉ូឡូ ពណ៌ខ្មៅ គ្រាប់ចំនួន ០២ គ្រាប់ និង សំបកគ្រាប់ចំនួន ០៣៕
Source: Kampuchea Thmey Daily
0 Comments