អាជ្ញាធរបាននិយាយថា កាលពីថ្ងៃចន្ទប្រទេសអ៊ីរ៉ាក់ បានចាប់ខ្លួនមន្ត្រីប៉ូលិសចំនួនបីនាក់ និងបុគ្គលិកគណៈកម្មការបោះឆ្នោតម្នាក់ បន្ទាប់ពីអគ្គិភ័យបានវាយប្រហារឃ្លាំងមួយដែលផ្ទុកសន្លឹកឆ្នោតនៃការបោះឆ្នោតនីតិបញ្ញត្តិកាលពីខែឧសភា។
អ្នកនាំពាក្យក្រុមប្រឹក្សាតុលាការកំពូលលោក Abdel Sattar Bayraqdar បាននិយាយនៅក្នុងសេចក្តីថ្លែងការណ៍មួយថា ការិយាល័យរបស់រដ្ឋអាជ្ញាក្នុងសង្កាត់ Al-Russafa ភាគខាងកើតទីក្រុងបាកដាដបានចាប់ខ្លួនមនុស្សចំនួន៤នាក់ដែលសង្ស័យពាក់ព័ន្ធនឹងការលួចដុតនៅគណៈកម្មការបោះឆ្នោត។
ដំណឹងនៃការចាប់ខ្លួននេះបានកើតឡើងបន្ទាប់ពីរដ្ឋមន្ត្រីក្រសួងមហាផ្ទៃអ៊ីរ៉ាក់លោក Qassem al-Araji បាននិយាយថា “គ្មានអ្វីត្រូវសង្ស័យទេដែលថា អគ្គិភ័យនេះគឺជាទង្វើដោយចេតនា”។
អគ្គិភ័យនេះបានកើតឡើងកាលពីថ្ងៃអាទិត្យមុនការរាប់សន្លឹកឆ្នោតដែលជាហេតុជំរុញឲ្យមានការចោទប្រកាន់ពីការក្លែងបន្លំក្នុងអំឡុងពេលបោះឆ្នោតដែលគេបានមើលឃើញពីជ័យជំនះដ៏ភ្ញាក់ផ្អើលមួយសម្រាប់បព្វជិតដ៏មានប្រជាប្រិយមួយរូប។
ប្រហែល៦០ភាគរយនៃអ្នកបោះឆ្នោត២លាននាក់នៅក្នុងទីក្រុងបាកដាដគឺបានបោះឆ្នោតកាលពីថ្ងៃទី១២ខែឧសភានៅក្នុងមណ្ឌលនេះ។
វិសាលភាពនៃការខូចខាតចំពោះប្រអប់សន្លឹកឆ្នោតនៅតែមិនទាន់ច្បាស់លាស់នៅឡើយទេប៉ុន្តែមន្ត្រីមួយចំនួនបានលើកឡើងថា សន្លឹកឆ្នោតភាគច្រើនត្រូវបានទុកនៅកន្លែងផ្សេង។
អ្នកនាំពាក្យក្រសួងមហាផ្ទៃលោក Saad Maan បាននិយាយកាលពីថ្ងៃអាទិត្យថា “សម្ភារៈបោះឆ្នោតរួមទាំងសន្លឹកឆ្នោតផងដែរអាចត្រូវបានដុតឆេះប៉ុន្តែភាគច្រើននៃសន្លឹកឆ្នោតគឺត្រូវបានគេរក្សាទុកនៅក្នុងអគារមួយផ្សេងទៀត”។
គួរបញ្ជាក់ថា អគ្គិភ័យនេះបានផ្ទុះឡើងនៅពេលដែលចៅក្រម៩រូបត្រូវបានតែងតាំងដើម្បីត្រួតពិនិត្យមើលការរាប់សន្លឹកឆ្នោតឡើងវិញតាមបញ្ជារបស់រដ្ឋសភាអ៊ីរ៉ាក់ជិតផុតអាណត្តិ។
អង្គនីតិប្បញ្ញត្តិនេះក៏បានបណ្តេញគណៈកម្មការឯករាជ្យដែលមានសមាជិកចំនួន៩រូបដែលត្រួតពិនិត្យការបោះឆ្នោតនេះផងដែរ៕ AFP
Source: Kampuchea Thmey Daily
0 Comments