ភ្នំពេញ ៖ ការធ្វើបដិវត្តន៍ពណ៌ មិនត្រឹមតែជាគ្រោះថ្នាក់ប្រជាជនប៉ុណ្ណោះទេ ថែមទាំងនាំមកនូវសេចក្ដីវិនាសយ៉ាងធ្ងន់ធ្ងរមកដល់ប្រទេសជាតិថែមទៀតផង។ បើនិយាយចំពោះប្រជាជនកម្ពុជាវិញ ពួកគាត់មិនសូវជាយល់ទេថា តើអ្វីទៅគឺជាបដិវត្តន៍ពណ៌នោះ ដែលនេះជាហេតុធ្វើអោយប្រជាជនខ្មែរយើង ងាយរងគ្រោះ ដោយសារពួកអ្នកនយោបាយពង្វក់ ឬក៏ប្រើប្រាស់អោយចូលរួមក្នុងសកម្មភាពបដិវត្តន៍ពណ៌ដោយមិនដឹងខ្លួន។
និយមន័យបដិវត្តន៍ពណ៌（Color revolution）ឬក៏ហៅម្យ៉ាងទៀតថា បដិវត្តន៍ផ្កា ដោយបដិវត្តន៍នេះពួកគេជាដំបូងប្រើប្រាស់វិធីសាស្ត្រអហិង្សា ឬក៏ដោយសន្តិវិធីដើម្បីអោយកើតមាននូវការផ្លាស់ប្ដូររដ្ឋអំណាចនៅពេលនេះ បដិវត្តន៍ពណ៌ បានជ្រាបចូលដល់ក្នុងប្រទេសកម្ពុជា ហើយក្នុងគោលបំណងធ្វើអោយប្រជាជនកម្ពុជាកាន់តែយល់ច្បាស់នៃផលវិបាក នៃបដិវត្តន៍ពណ៌នឹងថែរក្សាសុខសន្តិភាព ដែលបានមកយ៉ាងលំបាករបស់ប្រទេសកម្ពុជា។ ទូរទស្សន៍ក្នុងស្រុក គឺទូរទស្សន៍អាស៊ីអាគ្នេយ៍ (SEATV) ចាប់តាំងពីថ្ងៃទី១៨ ខែឧសភា រហូតដល់ថ្ងៃទី៩ ខែមិថុនានេះ បានធ្វើការផ្សព្វផ្សាយកម្មវិធី “អ្នកគួរតែដឹង” (You Should Know) ដែលលើកយកប្រធានបទ បដិវត្តន៍ពណ៌មកផ្សព្វផ្សាយជារៀងរាល់ថ្ងៃសុក្រ និងថ្ងៃសៅរ៍ និងទទួលការស្វាគមន៍ជាខ្លាំងពីសំណាក់ទូរទស្សនិកជន។ ឆ្លងកាត់តាមកម្មវិធីនេះ ធ្វើអោយយើងដឹងថា បដិវត្តន៍ពណ៌មានលក្ខណៈខុសគ្នាបន្តិចបន្តួចជាមួយនឹងរដ្ឋប្រហារ និងបដិវត្តន៍ ប៉ុន្តែធាតុពិត គឺជាការធ្វើរដ្ឋប្រហារតាមរបៀបថ្មី ដែលប្រកបដោយភាពច្នៃប្រឌិត ពួកគេតែងតែប្រើប្រាស់ផ្កា ឬជាសញ្ញាអ្វីមួយដើម្បីប្រមូលផ្តុំប្រជាជន យុវជន សិស្សនិស្សិត កម្មករ។ល។ ធ្វើការជួបជុំចូលរួមក្នុងសកម្មភាពបដិវត្តន៍ពណ៌។ តាមការពិតទៅចាប់តាំងពីការបោះឆ្នោតអាណត្តិទីមួយមកម្ល៉េះប្រទេសកម្ពុជាយើង បានរងនូវការធ្វើបដិវត្តន៍ពណ៌ទៅហើយ ដើម្បីប្រឆាំងលទ្ធផលបោះឆ្នោត។ រហូតដល់ឆ្នាំ២០១៣សកម្មភាពបដិវត្តន៍ពណ៌មានការវិវត្តន៍ជាខ្លាំង ជាសំណាងបំផុតរបស់ប្រទេស និងប្រជាជនកម្ពុជា ដែលរាជរដ្ឋាភិបាលបានកម្ចាត់ចោលទាំងស្រុងនូវឫសគល់នៃបដិវត្តន៍ពណ៌ បញ្ឈប់បាននូវការវិវត្តន៍របស់បដិវត្តន៍ពណ៌។
ក្នុងនាមជាភ្ញៀវកិត្តិយសប្រចាំកម្មវិធី ឯកឧត្តមបណ្ឌិតសភាចារ្យរស់ចន្ត្រាបុត្រទីប្រឹក្សាផ្ទាល់សម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រី កាលពីពេលថ្មីៗនេះ នៅក្នុងកម្មវិធីទូរទស្សន៍មួយបានមានប្រសាសន៍ថា ៖ ”បើសិនជារាជរដ្ឋាភិបាល ដែលមានសម្តេចអគ្គសេនាបតីតេជោ ហ៊ុន សែន ជាប្រមុខមិនបានទប់ស្កាត់បដិវត្តន៍ពណ៌បានទាន់ពេលវេលាទេនោះ ម្ល៉េះបដិវត្តន៍ពណ៌មិនត្រឹមតែជាគ្រោះថ្នាក់ប្រជាជនប៉ុណ្ណោះទេ ថែមទាំងនាំមកនូវសេចក្តីវិនាសយ៉ាងធ្ងន់ធ្ងរមកដល់ប្រទេសជាតិថែមទៀតផង”។ បណ្ឌិតសភាចារ្យរស់ចន្ត្រាបុត្រ បានបន្តថា ការចាប់ផ្តើមនៃបដិវត្តន៍ពណ៌គឺមានលក្ខណៈជាការជួបជុំ បាតុកម្ម កូដកម្ម។ល។ ដើម្បីផ្តួលរំលំរដ្ឋាភិបាលស្របច្បាប់។ ដំណាក់កាលនៃបដិវត្តន៍ពណ៌គឺចាប់ផ្តើមពីការជួបជុំក្នុងទ្រង់ទ្រាយតូចទៅជាធំ និងវិវត្តន៍ទៅជាទ្រង់ទ្រាយកាន់តែធំឡើងៗក្លាយជាវិនាសកម្មយ៉ាងធំធេងសម្រាប់ប្រទេសជាតិទាំងមូល។ ជាទូទៅប្រជាជនជាសិស្សនិស្សិត កម្មករ។ល។ ត្រូវពួកអ្នកនយោបាយពង្វក់ ឬក៏ប្រើប្រាស់អោយចូលរួមក្នុងសកម្មភាពបដិវត្តន៍ពណ៌ដោយមិនដឹងខ្លួន។ មន្ត្រីជាន់ខ្ពស់របស់រាជរដ្ឋាភិបាលកម្ពុជាបានបញ្ជាក់ថា ប្រសិនជាប្រទេសកម្ពុជាមិនបានចាត់វិធានការទាន់ពេលវេលា ក្នុងការទប់ស្កាត់បដិវត្តន៍ពណ៌ទេនោះ ប្រហែលជាលទ្ធផលចុងក្រោយនៃបដិវត្តន៍ពណ៌នេះ ធ្វើអោយប្រទេសរងគ្រោះថ្នាក់ដ៏ធំធេង។ ជាទូទៅយើងបានឃើញយ៉ាងច្បាស់ថា បដិវត្តន៍ពណ៌នាំមកនូវលទ្ធផលចុងក្រោយគឺធ្វើអោយប្រជាជនខកចិត្តជាខ្លាំង។ តួយ៉ាងដូចជាបដិវត្តន៍ផ្កាកូលាប នៃប្រទេសហ្ស៊ក់ហ្ស៊ី(Georgia)ក្នុងឆ្នាំ២០០៣ បដិវត្តន៍ពណ៌ទឹកក្រូចនៃប្រទេសអ៊ុយក្រែន（Ukraine）ក្នុងឆ្នាំ២០០៤ និងបដិវត្តន៍ផ្កាធូលីបនៃប្រទេស ឃើគីស្ថាន（Kyrgyzstan）ក្នុងឆ្នាំ២០០៥។ល។
លោកបណ្ឌិតសភាចារ្យបានមានប្រសាសន៍ថា ៖ ក្នុងចំណោមការបះបោរទាំងឡាយ គឺមានមួយភាគប្រាំ គឺបណ្តាលអោយមានមនុស្សរងរបួស ឬក៏ស្លាប់បាត់បង់ជីវិត។ កាន់តែគួរអោយខ្លាចទៀតនោះ នៅក្នុងប្រទេសខ្លះអ្នកចូលរួមត្រូវបានគេអោយលេបថ្នាំញៀន ដើម្បីធ្វើការប្រឆាំងដោយគ្មានខ្លាចការនឿយហត់ ឬសេចក្តីស្លាប់ឡើយ។ បណ្ឌិតសភាចារ្យរស់ចន្ត្រាបុត្របានមានប្រសាសន៍បន្តថា ទោះនៅប្រទេសណា ក៏ដោយអ្នកដឹកនាំបដិវត្តន៍ពណ៌តែងសន្យាថានឹងនាំប្រទេសឈានទៅរកការផ្លាស់ប្តូរប្រកបដោយភាពវិជ្ជមានធ្វើអោយប្រទេសជាតិរីកចម្រើនថ្កុំថ្កើង តែធាតុពិតការសន្យាទាំងនោះមិនដែលកើតចេញជារូបរៀងបានឡើយ។ ក្នុងកម្មវិធីក៏បានអំពាវនាវដល់ប្រជាជនកម្ពុជាទាំងអស់ កុំអោយចូលរួមក្នុងសកម្មភាពបដិវត្តន៍ពណ៌ ហើយត្រូវចូលរួមយ៉ាងសកម្មជាមួយនឹងរាជរដ្ឋាភិបាល ក្នុងការរក្សាសុខសន្តិភាពរបស់ប្រទេសជាតិកម្ពុជាយើង ព្រោះយើងមានសន្តិភាពនៅក្មេងខ្ចីនៅឡើយ ពោលគឺចាប់តាំងពីឆ្នាំ១៩៩៨មកទើបប្រទេសជាតិយើងទទួលបាននូវសុខសន្តិភាពពេញលេញ ដូច្នេះយើងទាំងអស់គ្នាត្រូវចូលរួមការពារ គឺស្របតាមពាក្យស្លោកមួយថា ទាំងអស់គ្នាដើម្បីសន្តិភាព និងសន្តិភាពសម្រាប់ទាំងអស់គ្នា។ ឆ្លងកាត់តាមកម្មវិធីនេះធ្វើអោយប្រជាជនកម្ពុជាបានយល់ដឹងអំពីអ្វីទៅជាបដិវត្តន៍ពណ៌ ហើយដែលធ្វើអោយប្រជាជនកាន់តែយល់ច្បាស់អំពីផលវិបត្តិនៃបដិវត្តន៍ពណ៌ នឹងបន្តចូលរួមថែរក្សាសន្តិភាព និងភាពរីកចម្រើនរបស់ប្រទេសជាតិ៕
Source: Kampuchea Thmey Daily
0 Comments