ភ្នំពេញ ៖ នៅក្នុងសារលិខិតរបស់លោក លី ឃឺឈាង នាយករដ្ឋមន្ត្រីចិនផ្ញើជូនសម្តេចតេជោនាយករដ្ឋមន្ត្រី ហ៊ុន សែន បានបញ្ជក់ច្បាស់ថា លោកពិតជាចង់ធ្វើការជាមួយសម្តេច ហ៊ុន សែន ដើម្បីបន្តពង្រឹងមិត្តភាពជាប្រពៃណីរវាងចិន និងកម្ពុជា ធ្វើឲ្យស៊ីជម្រៅនូវកិច្ចសហប្រតិបត្តិការតាមការអនុវត្តជាក់ស្ដែងលើគ្រប់វិស័យ។
នៅថ្ងៃទី១៩ ខែកក្កដា ឆ្នាំ២០១៨ គឺជាថ្ងៃចំថ្ងៃខួបលើកទី៦០ឆ្នាំ នៃទំនាក់ទំនងការទូតរវាងកម្ពុជា-ចិន ដែលទំនាក់ទំនងនេះបានចូលរួមចំណែកយ៉ាងសំខាន់ក្នុងការផ្តល់ផលប្រយោជន៍ជូនប្រទេសទាំងពីរ ដែលក្នុងឱកាសដ៏វិសេសវិសាលនេះ ទាំងព្រះមហាក្សត្រខ្មែរទាំងប្រធានាធិបតីចិន និងនាយករដ្ឋមន្ត្រីនៃប្រទេសទាំងពីរសុទ្ធតែបានផ្ញើសារជូនពរគ្នាទៅវិញទៅមក។
លោកនាយករដ្ឋមន្ត្រីចិនបានថ្លែងថា «ខ្ញុំចង់ធ្វើការជាមួយសម្ដេច ហ៊ុន សែន ដើម្បីបន្តពង្រឹងមិត្តភាពជាប្រពៃណីរវាងចិន និងកម្ពុជា ធ្វើឲ្យស៊ីជម្រៅនូវកិច្ចសហប្រតិបត្តិការ តាមការអនុវត្តជាក់ស្ដែងលើគ្រប់វិស័យហើយនិងលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយទៅកម្រិតថ្មីមួយទៀត»។ នេះជាសាររបស់នាយករដ្ឋមន្ត្រីចិន លោក លី ខឹឈាង ផ្ញើជូនសម្ដេចនាយករដ្ឋមន្ត្រី ហ៊ុន សែន ក្នុងឱកាសខួបលើកទី៦០នៃទំនាក់ទំនងប្រទេសទាំងពីរ។
លោក លី ខឹឈាង បានសង្កត់ធ្ងន់ថា ទំនាក់ទំនងរវាងចិន-កម្ពុជា មានការប្រាស្រ័យទាក់ទងគ្នាប្រកបដោយភាតរភាពតាំងពីបុរាណកាលមក។ ចិន និងកម្ពុជា ជាមិត្តជិតខាងស្និតស្នាលគ្នាជាប្រពៃណី ហើយព្រមទាំងជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយផងដែរ។
ទំនាក់ទំនងរវាងចិន-កម្ពុជាកន្លងមកបានសម្រេចសមិទ្ធផលជាច្រើនក្នុងកិច្ចសហប្រតិបត្តិការលើគ្រប់វិស័យដែលនាំមកផលប្រយោជន៍ដល់ប្រជាជននៃប្រទេសទាំងពីរ។
លោកបានបន្តថា ក្នុងដំណើរទស្សនកិច្ចនៅកម្ពុជាកាលពីខែមករា ឆ្នាំ២០១៨ នេះ ភាគីទាំងពីរបានចុះហត្ថលេខាលើកិច្ចព្រមព្រៀងថ្មីជាឯកច្ឆ័ន្ទស្តីពីទំនាក់ទំនងនិងកិច្ចសហប្រតិបត្តិការរវាងចិន-កម្ពុជាផងដែរ។ លោក លី ឃឺឈាង ក៏បានបញ្ជាក់ជំហរថា ចិននឹងបន្តគាំទ្រយ៉ាងពេញទំហឹងដល់កម្ពុជាក្នុងការប្រកាន់យកនូវមាគ៌ាអភិវឌ្ឍន៍ដែលសមស្របទៅតាមលក្ខខណ្ឌរបស់ខ្លួន។
ចំណែក ប្រមុខរាជរដ្ឋាភិបាលកម្ពុជា ក៏បានផ្ញើសារលិខិតមួយច្បាប់ជូនទៅលោក លី ខឺឈាង ថាសម្តេចពិតជាមានការពេញចិត្តជាទីបំផុតនូវទំនុកចិត្តនយោបាយកាន់តែរឹងមាំក៏ដូចជាកំណើនកិច្ចសហប្រតិបត្តិការប្រកបដោយផ្លែផ្កាកាន់តែស៊ីជម្រៅ និងមានវិសាលភាពកាន់តែធំក្នុងវិស័យជាច្រើនរវាងប្រជាជាតិរបស់យើងទាំងពីរ។ សារលិខិតប្រមុខរាជរដ្ឋាភិបាលកម្ពុជាធ្វើឡើងតាំងពីថ្ងៃទី ២ ខែកក្កដា។
សម្តេចតេជោ ហ៊ុន សែន បានមានប្រសាសន៍ថា ចិនមិនត្រឹមតែជាប្រទេសផ្តល់ជំនួយដ៏សំខាន់នោះ ទេតែជាប្រភពទុនវិនិយោគបរទេសធំបំផុតសម្រាប់កម្ពុជាផងដែរ ហើយក៏ឈរក្នុងលំដាប់ទី១ ក្នុងបញ្ជីទេសចរដែលមកទស្សនាកម្ពុជា។ ពាណិជ្ជកម្មទៅមករវាងប្រទេសទាំងពីរដែលបានកើនឡើងដល់ ៥,៥ ពាន់លានដុល្លារ នៅឆ្នាំ ២០១៧ មានសក្តានុពលរីកធំឡើងថែមទៀតដោយសារចិនមានឆន្ទៈនឹងសម្រួលដល់ការនាំចូលទំនិញពីកម្ពុជាឲ្យកាន់តែច្រើន។
ប្រមុខរាចរដ្ឋាភិបាលកម្ពុជា ក៏បានបង្ហាញនូវជំហរឥតងាករេក្នុងការប្រកាន់យកគោលនយោបាយចិនតែមួយ ។ សម្តេចតេជោ ហ៊ុន សែន ក៏បានថ្លែងអំណរគុណដ៏ជ្រាលជ្រៅដល់ រដ្ឋាភិបាលចិន ដែលបានគាំទ្រឯករាជ្យភាព និងដំណើការអភិវឌ្ឍកម្ពុជាស្របតាមបរិបទរបស់ផងខ្លួន។
ការអញ្ជើញមកបំពេញទស្សនកិច្ចផ្លូវការនិងធ្វើជាសហប្រធាននៃកិច្ចប្រជុំកំពូលមេគង្គ-ឡានឆាងលើកទី២របស់លោក លី ខឺឈាង នាយករដ្ឋមន្ត្រីចិននៅរាជធានីភ្នំពេញនាថ្ងៃទី ១០-១១ ខែមករាកន្លងទៅគឺជាការបើកឆាកនៃការប្រារព្ធខួប ៦០ឆ្នាំ នៃទំនាក់ទំនងការទូតកម្ពុជា-ចិន។ចាប់ពីដើមឆ្នាំ២០១៨ កម្ពុជាបានរៀបចំការសម្តែងសិល្បៈចម្រុះកម្ពុជា-ចិន ស្របពេលជាមួយពិធីបុណ្យចូលឆ្នាំចិន ការរៀបចំពិព័រណ៍រូបថត វេទិកាធុរកិច្ចកម្ពុជា-ចិនឆ្នាំ ២០១៨ និង វេទិកាកំពូលទេសចរណ៍កម្ពុជា-ចិនលើកទី១ និងបន្តមានសកម្មភាពផ្សេងៗទៀតរហូតដល់ចុងឆ្នាំ ដូចជាការផ្លាស់ប្តូរទស្សនកិច្ចគ្រប់កម្រិត រួមទាំងការផ្លាស់ប្តូររវាងប្រជាជន និងប្រជាជន យុវជន និងយុវជន ការរៀបចំសិក្ខាសាលាស្តីពីការជំរុញវិស័យទេសចរណ៍ ពាណិជ្ជកម្មនិងវិនិយោគជាដើម។
ចំពោះកិច្ចសហប្រតិបត្តិការសេដ្ឋកិច្ច ប្រទេសចិនជាដៃគូពាណិជ្ជកម្ម និងវិនិយោគិនដ៏ចម្បងរបស់កម្ពុជា។ ទំហំពាណិជ្ជកម្មទ្វេភាគីក្នុងឆ្នាំ២០១៧មានចំនួន ៥.៥៧៧លានដុល្លារកើនឡើងជាង ២១,៧% បើធៀបនឹងឆ្នាំ ២០១៦។ ក្នុងឆ្នាំ២០១៧ ទំហំវិនិយោគចិនសរុបនៅកម្ពុជាឈរលំដាប់លេខ១ ធៀបនឹងទំហំវិនិយោគទុនពីប្រទេសដទៃទៀត ដែលមានទំហំសរុបប្រមាណ ១.៦៤៤ លានដុល្លារ។ លើសពីនេះ ប្រទេសទាំងពីរក៏បានឯកភាពគ្នាជំរុញទំហំពាណិជ្ជកម្មឲ្យកើនឡើងដល់ ៦.០០០ លានដុល្លារ នៅឆ្នាំ២០២០។ ចំពោះវិស័យទេសចរណ៍មានក្រុមហ៊ុនឤកាសចរណ៍ចំនួន ១៥ កំពុងធ្វើប្រតិបត្តិការហោះហើរទៀងទាត់រវាងកម្ពុជា និងចិន។ នៅឆ្នាំ២០១៧ ទេសចរចិន មានប្រមាណ ១,២ លាននាក់។ គិតត្រឹមត្រីមាសទី ១ ឆ្នាំ ២០១៨ នេះ កម្ពុជាបានទទួលភ្ញៀវទេសចរអន្តរជាតិសរុប ១,៧ លាននាក់ ដែលក្នុងនោះ ទេសចរចិនមានចំនួនជាង៥០ ម៉ឺននាក់។
កម្ពុជាបានវាយតម្លៃខ្ពស់ចំពោះរដ្ឋាភិបាលចិនក្នុងការគោរពឯករាជ្យអធិបតេយ្យនិងការចាត់វិធានការនានារបស់រាជរដ្ឋាភិបាលកម្ពុជា ដើម្បីការការពារសន្តិសុខ និងស្ថិរភាពសង្គម។ កម្ពុជាសូមអបអរសាទរចំពោះលទ្ធផលជាវិជ្ជមាននៃកិច្ចសហប្រតិបត្តិការ និង ផ្លែផ្កាដែលទទួលបាននាពេលកន្លងមកនិងប្តេជ្ញាបន្តលើកកម្ពស់វិសាលភាពនៃកិច្ចទំនាក់ទំនងកិច្ចសហប្រតិបត្តិការជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ចិន ឲ្យឈានដល់កម្រិតកាន់តែខ្ពស់ថែមទៀត ដើម្បីផលប្រយោជន៍នៃប្រជាជនយើងទាំងពីរ៕
Source: Kampuchea Thmey Daily
0 Comments