ប្រកួតវគ្គ១៦ក្រុមចុងក្រោយប្រចាំពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១២ឆ្នាំ២០១៨ (Hun Sen Cup) ក្នុងប្រកួតរវាងក្រុមបាល់ទាត់ខេត្តកោះកុង តទល់យុវជនសាលាបាល់ទាត់ជាតិ អាយុក្រោម១៨ឆ្នាំ នឹងត្រូវផ្លាស់ប្ដូរវេនជាម្ចាស់ផ្ទះ ដោយសារទីលានបាល់ទាត់ខេត្តកោះកុង ដែលគ្រោងប្រកួតជើងទី១ នាថ្ងៃទី២២ កក្កដា ត្រូវបានលិចលង់ដោយជំនន់ទឹកភ្លៀង។
គណៈកម្មការប្រកួតបាល់ទាត់ជាតិកម្ពុជា (CNCC) បានជូនដំណឹងនៅថ្ងៃសុក្រ ទី២០ ខែកក្កដា ឆ្នាំ២០១៨ សប្ដាហ៍នេះថា ការប្រកួតរវាងក្រុមទាំង២ខាងលើ ជើងទី១នឹងត្រូវធ្វើឡើងនៅទីលានសាលាបាល់ទាត់ជាតិបាទី នាថ្ងៃទី២២ កក្កដា ចំណែកជើងទី២នឹងប្ដូរទៅលេងលើទីលានបាល់ទាត់ខេត្តកោះកុងវិញម្ដង នាថ្ងៃទី២៧ កក្កដាខាងមុខ។
យោងតាមរបាយការណ៍របស់ក្រសួងធនធានទឹកនិងឧតុនិយម បានបញ្ជាក់ថា ប្រទេសកម្ពុជា ទទួលសម្ពាធពីព្យុះទី៩ឈ្មោះសុន ទីញ ជាហេតុមានភ្លៀងធ្លាក់នៅតំបន់មាត់សមុទ្រ តំបន់ខ្ពង់រាប តំបន់ជួរភ្នំ និងតំបន់បណ្តាខេត្តដែលស្ថិតនៅតាមបណ្តោយព្រំដែនកម្ពុជា-វៀតណាម។ តំបន់មាត់សមុទ្រមានខេត្តកំពត កែប ព្រះសីហនុ និង កោះកុង មានភ្លៀងធ្លាក់ជាច្រើនថ្ងៃជាប់គ្នា ដែលធ្វើឲ្យតំបន់ខ្លះត្រូវលិចលង់។
សូមជម្រាបថា ប្រកួតគូទាំង២ខាងលើត្រូវធ្វើឡើងនៅដូចក្រុមទាំងគូផ្សេងទៀតដែរ ប៉ុន្តែត្រូវលើកពេលដោយហេតុផលសមាជិកភាគច្រើនរបស់ក្រុមយុវជនសាលាបាល់ទាត់ជាតិបាទី ជាប់ប្រឡង។ដូច្នេះគិតត្រឹមពេលនេះ CNCC បានរកឃើញក្រុមខ្លាំងឡើងទៅលេងវគ្គ៨ក្រុមជាបន្តបណ្តើៗហើយដោយក្នុងនោះមានក្រុមព្រះខ័នរាជស្វាយរៀង បឹងកេត ភ្នំពេញក្រោន អគ្គស្នងការដ្ឋាននគរបាលជាតិ ក្រសួងការពារជាតិ អង្គរថាយហ្គឺរនិងណាហ្គាវើល។
ពានរង្វាន់សម្តេចតេជោ ឆ្នាំនេះនឹងរៀបចំចំនួន២វគ្គដោយវគ្គទី១ ហៅថាវគ្គជម្រុះថ្នាក់ខេត្ត និងវគ្គទី២ហៅថាវគ្គជម្រុះថ្នាក់ជាតិ ដែលការប្រកួតចាប់ពីថ្ងៃទី៧ ខែមីនា រហូតដល់ថ្ងៃទី៦ខែតុលា ឆ្នាំ២០១៨។ ចំពោះវគ្គជម្រុះតាមថ្នាក់ខេត្តបែងចែក ការប្រកួតជា២វគ្គខុសគ្នាទៀតគឺវគ្គជម្រុះតាមពូល (វគ្គជម្រុះបឋម) និងជម្រុះចុងក្រោយ ហើយវគ្គជម្រុះជើងឯកថ្នាក់ជាតិ មានក្រុមខ្លាំងៗចំនួន១៦ប្រកួតគ្នាជម្រុះរហូតបន្តដល់វគ្គផ្តាច់ព្រ័ត្រតែម្តង៕
Source: Kampuchea Thmey Daily
0 Comments