ភ្នំពេញ ៖ នៅថ្ងៃទី១៩ ខែកក្កដា ឆ្នាំ២០១៨ គឺជាថ្ងៃនៃខួប៦០ឆ្នាំ នៃទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដែលទំនាក់ទំនងនេះ បានចូលរួមចំណែកយ៉ាងសំខាន់ក្នុងការផ្តល់ផលប្រយោជន៍ឲ្យគ្នាទៅវិញទៅមក ជាមួយគ្នានោះ ថ្នាក់ដឹកនាំនៃប្រទេសទាំងពីរ ក៏បានផ្ញើសារអបអរសាទរ ក៏ដូចជាជូនពរគ្នាទៅវិញទៅមកផងដែរ។
ដោយឡែក នៅលើលិខិតរបស់លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិកម្ពុជា ដែលបានផ្ញើជូនលោក វ៉ាង យី រដ្ឋមន្ត្រីក្រសួងការបរទេស នៃសាធារណរដ្ឋប្រជាមានិតចិនបានលើកឡើងថា ៦០ឆ្នាំនៃទំនាក់ទំនងការទូតរវាងកម្ពុជា-ចិន ស្ថិតក្នុងដំណាក់កាលល្អបំផុត ដែលមិនធ្លាប់មានពីមុនមក។
លោកបញ្ជាក់យ៉ាងនេះថា “បើក្រឡេកទៅមើលរយៈពេល៦០ឆ្នាំ នៃទំនាក់ទំនងការទូតរបស់ប្រទេសយើងទាំងពីរ ខ្ញុំអាចនិយាយដោយឥតសង្ស័យថា ទំនាក់ទំនង និងកិច្ចសហប្រតិបត្តិការរវាងប្រទេស និងប្រជាជនយើងទាំងពីរកំពុងស្ថិតក្នុងដំណាក់កាលដ៏ល្អបំផុត ដែលមិនធ្លាប់មានពីមុនមក។ ផ្អែកលើជំនឿជឿជាក់ផ្នែកនយោបាយដ៏ខ្លាំងក្លាទៅវិញទៅមក យើងតែងតែគាំទ្រ និងសហការគ្នាយ៉ាងជិតស្និទ្ធទាំងលើវេទិកាតំបន់ និងអន្តរជាតិ ដើម្បីជំរុញផលប្រយោជន៍រួមរបស់យើង ក៏ដូចជារួមចំណែកដល់សន្តិភាព ស្ថេរភាព និងការអភិវឌ្ឍន៍ សម្រាប់ទាំងអស់គ្នា”។
លោកទេសរដ្ឋមន្ត្រី ប្រាក់ សុខុន លើកឡើងទៀតថា នៅក្នុងក្របខណ្ឌទ្វេភាគី ការផ្លាស់ប្ដូរទស្សនកិច្ចជាញឹកញាប់ និងគ្រប់កម្រិត បានធ្វើឲ្យកិច្ចសហប្រតិបត្តិការលើវិស័យសេដ្ឋកិច្ច និងវប្បធម៌ និងការប្រាស្រ័យទាក់ទងរវាងប្រជាជន និងប្រជាជនរបស់ប្រទេសយើងទាំងពីរ មានភាពកាន់តែស៊ីជម្រៅ និងត្រូវបានពង្រីកកាន់តែធំឡើងធំឡើង។
តាមលោកទេសរដ្ឋមន្ត្រី ប្រាក់ សុខុន ចិន គឺជាវិនិយោគិន និងជាប្រភពទេសចរណ៍ធំជាងគេបំផុតលំដាប់លេខមួយសម្រាប់ប្រទេសកម្ពុជា។ ពាណិជ្ជកម្មរបស់ប្រទេសទាំងពីរ ក៏កំពុងតែមាននិន្នាការកើនឡើង ខណៈពេលដែលស្ថាប័នពាក់ព័ន្ធកំពុងតែសហការគ្នាពង្រីកច្រកទីផ្សារចិនសម្រាប់ផលិតផលកម្ពុជា។ ជាមួយគ្នានោះ លោកទេសរដ្ឋមន្ត្រី ប្រាក់ សុខុន បានអំណរគុណចំពោះជំនួយរបស់ចិន ដែលបានចូលរួមចំណែកយ៉ាងធំធេងដល់ការអភិវឌ្ឍរបស់កម្ពុជានិងបានជូនពរឲ្យរដ្ឋាភិបាល និងប្រជាជនចិន ទទួលបានជោគជ័យបន្ថែមទៀតក្នុងកិច្ចខិតខំប្រឹងប្រែង ដើម្បីឲ្យចិនក្លាយទៅជាប្រទេសសង្គមនិយមមួយរឹងមាំប្រកបដោយភាពសុខដុម និងវិបុលភាព។
ជាមួយនឹងការលើកឡើងខាងលើនេះ លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន ក៏បានផ្ញើលិខិតមួយច្បាប់ជូនលោកទេសរដ្ឋមន្ត្រី ប្រាក់ សុខុន វិញផងដែរ ដោយបានលើកឡើងថា ចាប់តាំងពីបានបង្កើតទំនាក់ទំនងការទូតរវាងប្រទេសយើងទាំងពីរ បានពង្រឹងពង្រីកនូវកិច្ចសហប្រតិបត្តិការ និងការផ្លាស់ប្ដូរគ្នាលើវិស័យនានា ដូចជានយោបាយ សេដ្ឋកិច្ច ពាណិជ្ជកម្ម វិទ្យាសាស្ត្រ និងវប្បធម៌ជាដើម។ ក៏ដូចជាការសម្របសម្រួលគ្នាកាន់តែជិតស្និទ្ធថែមទៀតលើកិច្ចការតំបន់និងអន្តរជាតិ។ លោកបន្តថា កិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ រវាងចិន និងកម្ពុជា សម្រេចបាននូវវឌ្ឍនភាព គួរឲ្យកត់សម្គាល់ ហើយបានក្លាយទៅជាគំរូសម្រាប់កិច្ចសហប្រតិបត្តិការ ដែលផ្ដល់ប្រយោជន៍ទៅវិញទៅមកនិងឈរលើមូលដ្ឋានស្មើភាពគ្នាក្នុងចំណោមប្រជាជាតិទាំងឡាយ។
លោក វ៉ាង យី អះអាងលើលិខិតរបស់ខ្លួនថា លោកមានបំណងសហការជាមួយលោកទេសរដ្ឋមន្ត្រី ប្រាក់ សុខុន ដោយយកឱកាសខួបអនុស្សាវរីយ៍លើកទី៦០ នេះ អនុវត្តឲ្យបានយ៉ាងសកម្ម នូវការព្រមព្រៀងគ្នាដ៏សំខាន់រវាងថ្នាក់ដឹកនាំនៃប្រទេសទាំងពីរ សំដៅរួមចំណែកដល់ការបង្កើតសហគមន៍ចិន-កម្ពុជា ដែលមានវាសនារួមជាយុទ្ធសាស្ត្រ៕
Source: Kampuchea Thmey Daily
0 Comments