ភ្នំពេញ ៖ រដ្ឋលេខាធិការទីស្តីការគណៈរដ្ឋមន្ត្រី និងជាអ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានអះអាងថា ការចេញសេចក្ដីថ្លែងការណ៍បង្ហាញពីក្តីព្រួយបារម្ភចំពោះស្ថានភាពនយោបាយនៅកម្ពុជារបស់លោក Wong Chen តំណាងរាស្ត្រម៉ាឡេស៊ីនោះ គឺគ្រាន់តែជាក្ដីបារម្ភរបស់បុគ្គលម្នាក់ ដែលមាននិន្នាការនយោបាយប្រឆាំងកម្ពុជាតែប៉ុណ្ណោះ ហើយថែមទាំងរំលោភគោលការណ៍នៃសមាគមប្រជាជាតិអាស៊ានទៀតផង។
លោក ផៃ ស៊ីផាន បានថ្លែងយ៉ាងដូច្នេះថា “ការឆ្លើយតបរបស់ខ្ញុំ ចំពោះលោក Wong Chen ដែលលើកឡើងពីសេចក្តីបារម្ភចំពោះស្ថានភាពនយោបាយ នៅកម្ពុជា ដែលចេញជាសេចក្តីថ្លែងការណ៍នោះ គឺជាក្តីបារម្ភរបស់បុគ្គល ដែលមាននិន្នាការនយោបាយប្រឆាំងនឹងកម្ពុជាប៉ុណ្ណោះ។
អំណាះអំណាង ដែលតំណាងរាស្ត្ររូបនេះ បានលើកឡើងថា “ម៉ាឡេស៊ី ក៏មានកាតព្វកិច្ច ចូលរួមការពារ និងលើកតម្កើងលទ្ធិប្រជាធិបតេយ្យ “នៃសមាគមប្រជាជាតិសមាជិកអាស៊ាន នេះជាការយល់ច្រឡំធំមួយ ដែលមិនយល់ច្បាស់ និងរំលោភគោលការណ៍នៃសមាគមប្រជាជាតិអាស៊ាន ដែល “មិនលូកលាន់ផ្ទៃក្នុង របស់សមាជិកប្រជាជាតិណាមួយនៅក្នុងតំបន់អាស៊ាន”។
បើតាមលោក ផៃ ស៊ីផាន អ្នកតំណាងរាស្ត្ររូបនេះ មិនបានតាមដានពិតប្រាកដ នៃដំណើរការរបស់អាស៊ានជារួម ស្តីពីការគោរពសិទ្ធិមនុស្ស និងប្រជាធិបតេយ្យនោះឡើយ។ រាល់កិច្ចប្រជុំកំពូលអាស៊ានម្តងៗ សមាគមអាស៊ាន បានលើកឡើងអំពីគោលការណ៍ និងយន្តការណ៍ ច្បាស់លាស់ នៃការសម្រេចក្នុងកិច្ចអនុវត្ត នៅក្នុងវិស័យសិទ្ធិមនុស្សនិងប្រជាធិបតេយ្យជារួមនេះ។
ដូច្នេះការលើកឡើងរបស់បុគ្គលរូបនេះ មិនត្រឹមតែបង្ហាញ ភាពក្រអឺតក្រទម និងភាពល្ងង់ខ្លៅ នៅក្នុងក្រមសីលធម៌របស់សមាគមអាស៊ានតែប៉ុណ្ណោះទេ គឺបង្ហាញនូវការតាំងខ្លួនជា មេកាង មិនអៀនខ្មាស់នៅក្នុងតំបន់ទៀតផង។
ជាមួយគ្នានោះលោក ផៃ ស៊ីផាន បានរំលឹកដល់លោក Wong Chen, from People's Justice Party (PKR) ថា លោកគ្រាន់តែជាតំណាងរាស្ត្រក្នុងមណ្ឌលតូចមួយរបស់លោកតែប៉ុណ្ណោះ លោកគ្មានរូបភាព ឬអំណាចណា ដែលមានឥទ្ធិពលដល់កម្ពុជានោះឡើយ។ លោកត្រូវប្រឹងប្រែងអភិវឌ្ឍន៍សិទ្ធិមនុស្ស និងប្រជាធិបតេយ្យនៅក្នុងប្រទេសរបស់លោក Malaysia តែមួយគត់ ដែលជាដែនសមត្ថកិច្ចរបស់លោកនោះទៅ។ លោកបញ្ជាក់ថា អាស៊ានមានគោលការណ៍ និងយន្តការណ៍ក្នុងការអភិវឌ្ឍន៍សិទ្ធិមនុស្ស និងប្រជាធិបតេយ្យនៅក្នុងតំបន់ ដើម្បីរក្សាឯកភាពនៃប្រជាជាតិអាស៊ាន៕
Source: Kampuchea Thmey Daily
0 Comments