ភ្នំពេញ ៖ រដ្ឋបាលរាជធានីភ្នំពេញ បានចេញសេចក្ដីជូនដំណឹងមួយ ស្ដីពី ការទុកដាក់សំរាមរបស់ប្រជាពលរដ្ឋឲ្យបានត្រឹមត្រូវ ក្នុងទីតាំងលំនៅឋានរបស់ខ្លួន ក្នុងអំឡុងពេលដំណើរការ នៃការបោះឆ្នោតជ្រើសរើសតំណាងរាស្ត្រ នីតិកាលទី៦ ដោយហេតុថា កម្មករ-កម្មការិនីរបស់ក្រុមហ៊ុនស៊ីទ្រី នឹងត្រូវឲ្យឈប់សម្រាកចំនួន៣ថ្ងៃ ដោយចាប់ពីថ្ងៃទី២៨ ដល់ថ្ងៃទី៣០ ខែកក្កដា ឆ្នាំ២០១៨ ដើម្បីចូលរួមក្នុងការបោះឆ្នោតនាថ្ងៃទី២៩ កក្កដាខាងមុខនេះ។
នេះបើយោងតាមសេចក្តីជូនដំណឹង ដែលសារព័ត៌មានយើងទទួលបាននៅថ្ងៃទី២០ ខែកក្កដានេះ។ ក្នុងសេចក្តីជូនដំណឹងនេះបានបញ្ជាក់ថា ដើម្បីថែរក្សាសោភណ្ឌភាព អនាម័យ បរិស្ថានរាជធានីភ្នំពេញ ឲ្យបានស្អាតល្អ រដ្ឋបាលរាជធានីភ្នំពេញ សូមជម្រាបជូនដំណឹងដល់ម្ចាស់លំនៅឋាន ម្ចាស់អាជីវកម្ម សេវាកម្មនិងបងប្អូនប្រជាពលរដ្ឋក្នុងរាជធានីភ្នំពេញទាំងអស់ ឲ្យបានជ្រាបថា ក្នុងឱកាស នៃការបោះឆ្នោតជ្រើសរើសតំណាងរាស្ត្រ នីតិកាលទី៦ ដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ខាងមុខនេះ កម្មករ-កម្មការិនីក្រុមហ៊ុនស៊ីទ្រី ដែលបំរើការងារ សំអាតនិងដឹកជញ្ជូនសំរាមនៅក្នុងរាជធានីនឹងត្រូវឲ្យឈប់សម្រាកចំនួន៣ថ្ងៃ ដោយចាប់ពីថ្ងៃទី២៨ ដល់ថ្ងៃទី៣០ ខែកក្កដា ឆ្នាំ២០១៨ ដើម្បីធ្វើដំណើរទៅចូលរួមក្នុងការបោះឆ្នោតនៅតាមបណ្តាខេត្តនានា នៅសល់តែកម្មករ កម្មការិនី ដែលមានទីតាំងបោះឆ្នោតនៅរាជធានីភ្នំពេញ និងខេត្តដែលនៅជិតៗរាជធានីភ្នំពេញប៉ុណ្ណោះ ដែលនៅបំរើការងារតាមការស្ម័គ្រចិត្ត។ ដូច្នេះទេ ក្នុងអំឡុង៣ថ្ងៃនៃការឈប់សំរាកនេះ ការផ្គត់ផ្គង់សេវា សំអាត ប្រមូលនិងដឹកជញ្ជូនសំរាមនៅរាជធានីភ្នំពេញមិនបានពេញលេញឡើយ។
ដើម្បីថែរក្សាសោភណ្ឌភាព អនាម័យ បរិស្ថានរាជធានីភ្នំពេញ ឲ្យបានស្អាតល្អ រដ្ឋបាលរាជធានីភ្នំពេញអំពាវនាវឲ្យបងប្អូនប្រជាពលរដ្ឋទាំងអស់ ត្រូវទុកដាក់សំរាមឲ្យបានត្រឹមត្រូវ ដោយសូមរក្សាទុកសំរាមនៅក្នុងទីតាំងរបស់ខ្លួនរៀងៗខ្លួនជាបណ្ដោះអាសន្នសិន៕
Source: Kampuchea Thmey Daily
0 Comments