កណ្តាល ៖ កញ្ញា ធី សុវណ្ណថា ប្រធានយុវជនកិច្ចការសង្គមរបស់គណបក្សប្រជាជនកម្ពុជា និងជាអនុប្រធានទី១ នៃគណៈពង្រឹងមូលដ្ឋានឃុំត្រើយស្លា ស្រុកស្អាង ខេត្តកណ្ដាល បានសហការជាមួយអាជ្ញាធរ និងប្រជាការពារ បានបង្ក្រាបបទល្មើសនេសាទបានចំនួន៤១ករណី នៅក្នុងភូមិសាស្ត្រឃុំត្រើយស្លា នេះបើតាមការឲ្យដឹងពីកញ្ញា ធី សុវណ្ណថា។
កញ្ញា ធី សុវណ្ណថា បានបញ្ជាក់យ៉ាងនេះថា “៣ថ្ងៃនេះ នាងខ្ញុំសហការណ៍ជាមួយអាជ្ញាធរឃុំត្រើយស្លា និងប្រជាការពារ២០០នាក់ បង្ក្រាបបទល្មើសនេសាទ បាន ៤១ករណី ភូមិសាស្ត្រឃុំត្រើយស្លា ស្រុកស្អាង នៅសល់៥២ករណីទៀត នៅឃុំស្វាយប្រទាល ឃុំតាលន់ ឃុំខ្ពក និងឃុំប្រាសាទ ស្រុកស្អាង...នាងខ្ញុំ បានរាយការណ៍ជូនអាជ្ញាធរស្រុកស្អាង ខេត្តកណ្តាល និងក្រសួងជំនាញរួចរាល់ហើយ ដើម្បីចុះមកបង្រាបឲ្យទាន់ពេល សង្គ្រោះជីវិតមេត្រីពងរាប់លានក្បាល”។
សូមបញ្ជាក់ថា កញ្ញា ធី សុវណ្ណថា ត្រូវបានសម្តេចអគ្គមហាសេនាបតីតេជោ ហ៊ុន សែន ប្រធានគណបក្ស សម្រេចតែងតាំងជាអនុប្រធានទី១ នៃគណៈពង្រឹងមូលដ្ឋានឃុំត្រើយស្លា ខេត្តកណ្តាល កាលពីថ្ងៃទី០៩ ខែមីនា ឆ្នាំ២០១៨ ហើយក្រោយមកកញ្ញាបានដឹកនាំប្រជាពលរដ្ឋកសាងផ្លូវដោយចាក់បេតុងជាច្រើនខ្សែ ហើយក្នុងនោះ ក៏មានការចាក់បេតុងពង្រីកស្ពាន នៅភូមិទួលក្តីផងដែរ។
ក្រោយពីបានក្លាយជាអនុប្រធានទី១ នៃគណៈពង្រឹងមូលដ្ឋានឃុំត្រើយស្លា ខេត្តកណ្តាលរួចមក កញ្ញា ធី សុវណ្ណថា បានជួយឲ្យប្រជាពលរដ្ឋនៅឃុំត្រើយស្លា ស្រុកស្អាងទាំងអស់ ទទួលបានសេវាពិនិត្យ ព្យាបាលជំងឺទូទៅ និងសម្រាលកូននៅមណ្ឌលសុខភាពឃុំ ដោយមិនគិតថ្លៃ១០០ភាគរយ ហើយគំរោងមួយចំនួនទៀត ដូចជាការដាក់ភ្លើងបំភ្លឺផ្លូវ បន្ថែមបង្គោលភ្លើងទូទាំង៩ភូមិ គម្រោងសាងសង់ផ្លូវ ស្ពាន និងសេវាជាច្រើនទៀត ត្រូវបានផ្តល់ដល់ប្រជាពលរដ្ឋនៅទីនោះ៕
Source: Kampuchea Thmey Daily
0 Comments