ភ្នំពេញ ៖ មន្ត្រីជាន់ខ្ពស់ក្រសួងសុខាភិបាលបានស្នើឲ្យគ្លីនិកឯកជនទាំងអស់បញ្ឈប់ការផ្សព្វផ្សាយសេវាព្យាបាលបែបភូតកុហក និង បំផ្លើសខុសពីការពិតដែលនាំឲ្យប្រជាពលរដ្ឋ អស់ជំនឿទៅសេវាសុខាភិបាលរបស់រដ្ឋ។
លោកស្រីវេជ្ជបណ្ឌិត ឱ វណ្ឌឌីន អគ្គនាយកបច្ចេកទេសសុខាភិបាលនៃក្រសួងសុខាភិបាលមានប្រសាសន៍ថា ចាប់ពីពេលនេះតទៅក្រសួងនឹងចាត់វិធានការតាមផ្លូវច្បាប់ចំពោះគ្លីនិកឯកជនណាដែលនៅតែបន្តការផ្សព្វផ្សាយអួតអាងហួសពីការពិតដោយមិនគោរពទៅតាមច្បាប់ឬការណែនាំរបស់ក្រសួងសុខាភិបាល។
ការព្រមាននេះ បានធ្វើឡើងបន្ទាប់ពីមានគ្លីនិកឯកជនមួយចំនួននៅតែធ្វើសកម្មភាពផ្សព្វផ្សយពីការព្យាបាលជំងឺជាសះស្បើយ១០០ភាគរយ និង រាប់រយមុខ។
លោកស្រីវេជ្ជបណ្ឌិតបានបន្តថា ការផ្សព្វផ្សាយសេវាព្យាបាលអួតអាងបំផ្លើសហួសពីការពិតនេះមិនត្រឹមតែធ្វើឲ្យប៉ះពាល់ដល់បងប្អូនប្រជាពលរដ្ឋដូចជាចំណាយថវិកានិងពេលវេលានិងធ្វើឲ្យជំងឺមិនបានជាសះស្បើយប៉ុណ្ណោះទេថែមទាំងធ្វើឲ្យប្រជាពលរដ្ឋអស់ជំនឿមកលើសេវាសុខាភិបាលរបស់រដ្ឋទៀតផង។
លោកស្រីបានបន្ថែមទៀតថា កន្លងមកក្រសួងតែងតែធ្វើការតាមដានពីការផ្សព្វផ្សាយពាណិជ្ជកម្មរបស់គ្លីនិកឯកជនដែលបានផ្សាយ ឬ បង្ហោះនៅតាមវិទ្យុ ទូរទស្សន៍និងតាមអនឡាញដើម្បីត្រួតពិនិត្យមើលខ្លឹមសារស្របទៅតាមការស្នើសុំរបស់ក្រសួងសុខាភិបាលដែរ ឬ យ៉ាងណាព្រោះថាមុននឹងធ្វើការផ្សព្វផ្សាយគ្លីនិក ឬ ក្រុមហ៊ុនដែលប្រកបអាជីវកម្មលើវិស័យសុខាភិបាលត្រូវធ្វើលិខិតស្នើសុំមកក្រសួងជាមុនសិនទើបអាចយកទៅផ្សាយបាន។
ប៉ុន្តែយ៉ាងណាក៏ដោយលោកស្រីវេជ្ជបណ្ឌិត ឱ វណ្ឌឌីន បានបញ្ជាក់ថា នៅតែមានគ្លីនិកឯកជនមួយចំនួនមិនបានអនុវត្តទៅតាមការណែនាំរបស់ក្រសួងឡើយគឺនៅតែបន្តផ្សព្វផ្សាយលើសពីអ្វីដែលបានស្នើសុំមកក្រសួងដដែល។
លោកស្រីវេជ្ជបណ្ឌិតបានអំពាវនាវឲ្យម្ចាស់គ្លីនិកឯកជនទាំងអស់ត្រូវគោរពតាមច្បាប់និងការណែនាំរបស់ក្រសួងសុខាភិបាលហើយករណីគ្លីនិកណាមួយដែលមិនគោរពតាមច្បាប់ទេនោះក្រសួងនឹងអនុវត្តវិធានការទៅតាមច្បាប់ដែលបានកំណត់ ដែលមានពិន័យតាមច្បាប់រដ្ឋបាលឬផ្អាកការធ្វើអាជីវកម្មក្នុងករណីធ្ងន់ធ្ងរ។
លោក វេជ្ជបណ្ឌិត សាម សុផាន់ ប្រធានអង្គការគណៈកម្មាធិការសុខភាពកម្ពុជាបានគាំទ្រទាំងស្រុង ចំពោះវិធានការរបស់ក្រសួងសុខាភិបាលព្រោះបានជួយទប់ស្កាត់កុំឲ្យគ្លីនិកឯកជនខិលខូចមួយចំនួនឆ្លៀតឱកាសបោកប្រាស់ប្រជាពលរដ្ឋជាបន្តទៀត។
លោក វេជ្ជបណ្ឌិតបានស្នើដល់ម្ចាស់គ្លីនិកគួរតែផ្សព្វផ្សាយសេវាព្យាបាលដែលពិតប្រាកដជាជាងផ្សាយមិនពិតធ្វើឲ្យប្រជាពលរដ្ឋអស់ជំនឿមកលើគ្លីនិករបស់ខ្លួន៕
Source: Kampuchea Thmey Daily
0 Comments