ក្រុមចំណូលថ្មីវិសាខា ដែលកំពុងតែមានឈ្មោះបោះសំឡេងខ្លាំង បានធ្លាក់ត្រឹមវគ្គ១៦ក្រុមចុងក្រោយវគ្គជម្រុះជើងឯកថ្នាក់ជាតិប្រចាំពានរង្វាន់សម្តេចតេជោ ហ៊ុន សែន ឆ្នាំ២០១៨ (Hun Sen Cup 2018) ដែលជាឆ្នាំដំបូងរបស់ក្រុមមួយនេះ ក្រោយបរាជ័យក្រោយថ្វីជើងក្រុមព្រះខ័នរាជស្វាយរៀង កាលពីពេលថ្មីៗ។
លោក ហុក សុជីវ័ន បានប្រាប់អ្នកសារព័ត៌មានក្រោយអស់សិទ្ធិឡើងទៅវគ្គបន្តថា «ទម្រង់ប្រយុទ្ធរបស់យើងនៅស្ទើរគ្រប់កន្លែង ដោយសារកីឡាករមួយប៉ែកខាងលើ គាត់មិនសូវបានលេងជាមួយគ្នា នៅស្ទើរមែនទែន។ ប៉ុន្តែដូច ទិត្យ ឌីណា, កែវ ផេង, សាន គឹមហេង តាំងពីចូលមករួមជាមួយក្រុម មិនដែលបានលេងជាមួយគ្នា។ អីចឹងតំបន់លេងនៅស្ទើរ។ តែអ្វីដែលយើងដាក់ឲ្យលេង គឺគាត់ធ្វើបាន ដូចការលើកបាល់ជ្រុង និយាយទៅ set play របស់យើងបានល្អ»។
ទោះជាយ៉ាងណាលោក ហុក សុជីវ័ន ពេញចិត្តចំពោះលទ្ធផលនេះប្រកួតនេះ ដោយ មិនប៉ះពាល់ដល់អារម្មណ៍កូនក្រុមខ្លាំងឡើយ។ អស់សិទ្ធិក្នុងពានរង្វាន់សម្តេចតេជោ មែនប៉ុន្តែលោកគ្រូបង្វឹកកាន់អាជ្ញាប័ណ្ណ AFC A License រូបនេះគិតថា ក្រុមលោកងាកទៅផ្ដោតសំខាន់តែលើក្របខណ្ឌ Metfone Cambodian League វិញម្តង។ ក្រុមវិសាខា បានចាញ់ព្រះខ័នរាជស្វាយរៀង ដោយលទ្ធផល សរុប២ទល់នឹង១ ពោលគឺ ចាញ់ជើងទី១ នៅស្វាយរៀង ១ទល់នឹង០ និង ស្មើ១ទល់នឹង១ ជើងទី២ នៅកីឡដ្ឋានស្តាតចាស់។
សូមរំលឹកថា ថ្មីៗនេះក្លិបវិសាខា បានបញ្ចប់កិច្ចសន្យាជាមួយកីឡាករ៣នាក់ដោយក្នុងនោះមានកីឡាករជើងចាស់ នុត ស៊ីនួន ជាខ្សែប្រយុទ្ធ កីឡាករ ពៅ ភារិទ្ធ ជាខ្សែបម្រើ និងកីឡាករ អ៊ីវ វិមាន ជាខ្សែការពារ។ ប៉ុន្តែក្លិបបាននាំយកកីឡាករឆ្នើម៣នាក់បន្ថែមទៀតគឺ សុខ សុវណ្ណ ជាខ្សែការពារពីក្រុមបឹងកេត ខ្សែប្រយុទ្ធ កែវ សុខផេង ដែលទើបបញ្ចប់កិច្ចសន្យាមកពីប្រទេសម៉ាឡេស៊ី និងទិត្យ ឌីណា ជាខ្សែបម្រើមកពីក្លិបអគ្គស្នងការដ្ឋាននគរបាលជាតិ។
សម្រាប់ក្នុងពានរង្វាន់លីគកំពូលកម្ពុជា វិញក្រុមវិសាខា កំពុងឈរចំណាត់ថ្នាក់លេខ៣ ក្នុងចំណោមក្លិបជាសមាជិកទាំង១២ ក្រោយប្រកួត១៤លើកឈ្នះបាន១០លើក ស្មើគ្នា២លើកនិងចាញ់២លើកមាន២៣ពិន្ទុ ស្មើគ្នាជាមួយក្រុមលេខ២ណាហ្គាវើល និងចាញ់ពិន្ទុក្រុមកំពូលតារាងបឹងកេត តែ៣ពិន្ទុប៉ុណ្ណោះ។ សម្រាប់ប្រកួតបន្ទាប់ក្នុងសប្ដាហ៍ទី១៥ នៃពានរង្វាន់លីគកំពូលកម្ពុជា វិសាខា ត្រូវប៉ះម្ចាស់ផ្ទះអាស៊ីអឺរ៉ុប នៅវេលាម៉ោង៣ល្ងាចថ្ងៃសៅរ៍ ទី២១ ខែកក្កដា ឆ្នាំ២០១៨ លើទីលានកីឡដ្ឋាន AEU Sport Park។
ក្រុមវិសាខា បានបង្កើតឡើងតាំងពីថ្ងៃទី៥ ខែកុម្ភៈ ឆ្នាំ២០១៧ ក្រោមការឧបត្ថម្ភគាំទ្រពីសំណាក់ឯកឧត្ដម ស សុខា តំណាងរាស្ដ្រខេត្តព្រៃវែង និងជាអនុប្រធានសហព័ន្ធសហភាពយុវជនកម្ពុជា។ បច្ចុប្បន្នក្លឹបមានកីឡាករជិត៣០នាក់ ដែលមានលោក ហុក សុចិត្រា អតីតគ្រូបង្វឹកក្រុមជម្រើសជាតិកម្ពុជា ដើរតួធ្វើជាអ្នកចាត់ការទូទៅរបស់ក្រុម ខណៈលោក ហុក សុជីវ័ន ជាប្អូនប្រុសបង្កើតធ្វើជាគ្រូបង្វឹក៕
Source: Kampuchea Thmey Daily
0 Comments