បន្ទាយមានជ័យ ៖ ព្រឹក ថ្ងៃទីទី២០ ខែកក្កដា ឆ្នាំ២០១៨នេះ នាយឧត្តមសេនីយ៍ កែ គឹមយ៉ាន សមាជិកអចិន្ត្រៃយ៍គណៈកម្មាធិការកណ្តាល អ្នកតំណាងរាស្ត្រ ប្រធានក្រុមការងារថ្នាក់កណ្ដាលចុះជួយខេត្តបន្ទាយមានជ័យ បានអំពាវនាវឲ្យប្រជាពលរដ្ឋដែលគាំទ្រគណបក្សទាំង២០ទៅបោះឆ្នោតឲ្យបានគ្រប់គ្នាពិសេសបោះឆ្នោតជូន គណបក្សប្រជាជនដែលមានលេខរៀងទី២០ ស្រួលចាំ ស្រួលគិត ស្រួលគូស ថ្លែងក្នុងពិធីបុណ្យបួងសួងលើកដងជហ្វាវត្តប្រាសាទរលំជ្រៃ ស្ថិតក្នុងភូមិរលំជ្រៃ ឃុំភូមិថ្មី ស្រុកថ្មពួក ខេត្តបន្ទាយមានជ័យអមដំណើរដោយលោកសួនបវរអភិបាលខេត្តបន្ទាយមានជ័យ លោកជំទាវសុង ផល្លីន ភរិយារបស់លោកសួន បវរ អ្នកតំណាងរាស្ត្រឈរឈ្មោះទាំង១២នាក់ ក្រុមការងារថ្នាក់ជាតិ ខេត្ត ក្រុង ស្រុក និងមូលដ្ឋានដែលមានប្រជាពលរដ្ឋចូលរួម៣.៨០០នាក់។
ក្នុងឱកាសនោះ លោកនាយឧត្តមសេនីយ៍ កែ គឹមយ៉ាន បានមានមតិសំណេះសំណាលនិងពាំនាំការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំកំពូលរបស់ជាតិនិងបក្សមាន សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ប្រធានគណបក្ស សម្ដេចអគ្គមហាពញាចក្រីហេង សំរិន ប្រធានរដ្ឋសភា ប្រធានកិត្តិយសគណបក្ស។
លោកនាយឧត្តមសេនីយ៍ កែ គឹមយ៉ាន បានមានប្រសាសន៍ប្រាប់អ្នកយកព័ត៌មានឲ្យដឹងថា ប្រជាពលរដ្ឋគាំទ្រគណបក្សទាំង២០នៅថ្ងៃទី ២៩ ខែកក្កដា ឆ្នាំ២០១៨ខាងមុខនេះគឺជាថ្ងៃបោះឆ្នោតជ្រើសរើសតំណាងរាស្ត្រអាណត្តិទី៦ដូច្នេះប្រជាពលរដ្ឋដែលគាំទ្រគណបក្សទាំង២០នោះត្រូវទៅបោះឆ្នោតឲ្យបានគ្រប់គ្នាពិសេសបោះជូនគណបក្សប្រជាជនដែលមានលេខរៀងទី២០ ស្រួលចាំ ស្រួលគិត ស្រួលគូសដើម្បីឲ្យមានលទ្ធិប្រជាធិបតេយ្យនៅក្នុងប្រទេសដែលអាចទទួលយកបាន។
លោកកែ គឹមយ៉ានមានប្រសាសន៍បញ្ជាក់ទៀតថា យើងទាំងអស់គ្នាដឹងហើយថា គណបក្សប្រជាជនដឹកនាំដោយសម្តេចតេជោហ៊ុន សែន បានដាក់គោលនយោបាយប្រែក្លាយតំបន់អតីតសង្គ្រាមទាំងអស់ទៅជាទីផ្សារ និងការអភិវឌ្ឍ ហើយសព្វថ្ងៃនេះ តំបន់អតីតសមរភូមិសង្គ្រាមជាច្រើនបាននឹងកំពុងក្លាយជាតំបន់អភិវឌ្ឍន៍ និងយុទ្ធសាស្ត្រកាត់បន្ថយភាពក្រីក្របានកសាងផ្លូវថ្នល់ មន្ទីរពេទ្យ ពិសេសការដាក់ពង្រាយសាលារៀន រោងចក្រ ដល់មូលដ្ឋានដើម្បីបណ្តុះបណ្តាលធនធានមនុស្ស និងផ្តល់ឱកាសការងារជូនក្មួយៗបងប្អូនឲ្យបានកាន់តែច្រើន កាន់តែជិត និងកាន់តែងាយស្រួលបន្ថែមទៀត។
ជាមួយគ្នានេះ លោកនាយឧត្តមសេនីយ៍ កែ គឹមយ៉ាន បានថ្លែងអំណរគុណនិងដឹងគុណដល់សមាជិក សមាជិកាទាំងអស់នៃមហាគ្រួសារអ្នកបន្ទាយមានជ័យដែលបានបោះឆ្នោតគាំទ្រគណបក្សប្រជាជនកម្ពុជា ដែលដឹកនាំដោយសម្តេចតេជោហ៊ុន សែន គ្រប់ៗអាណត្តិកន្លងមក ដើម្បីសម្តេចតេជោហ៊ុន សែន បន្តមិនយកពន្ធលើដីស្រែ និងការលក់ដូរកញ្ច្រែងកញ្ជើល្អីថែមទៀត។
ជាមួយគ្នានេះដែរ ភ្ជាប់ជាមួយនឹងសុទ្ធាជ្រះថ្លា លោកនាយឧត្តមសេនីយ៍កែ គឹមយ៉ាន និងលោកជំទាវ ម៉ៅ ម៉ាល័យ កែ គឹមយ៉ាន បានបន្តចូលរួមកសាងវត្តរលំជ្រៃចំនួនទឹកប្រាក់ ២ម៉ឺនដុល្លារទៀត ដើម្បីធ្វើបង្ហើយព្រះវិហារ៕
Source: Kampuchea Thmey Daily
0 Comments