ភ្នំពេញ ៖ លោកឃួង ស្រេង អភិបាលនៃគណៈអភិបាលរាជធានីភ្នំពេញ រួមជាមួយមន្ត្រីពាក់ព័ន្ធ អាជ្ញាធរដែនដីកាលពីព្រឹកថ្ងៃទី២០ ខែកក្កដា បានចុះទៅពិនិត្យមើលស្ថានភាពទឹកជំនន់ទឹកភ្លៀងនៅក្នុងតំបន់១ចំនួននៅប៉ែកខាងលិចរាជធានីភ្នំពេញក្នុងខណ្ឌពោធិ៍សែនជ័យក្នុងខណៈដែលជំនន់ទឹកភ្លៀងកំពុងតែកើនឡើងដែលធ្វើឲ្យលំនៅឋានរបស់ប្រជាពលរដ្ឋ១ចំនួនទទួលរងនូវការលិចលង់ ពិសេសប្រជាពលរដ្ឋដែលរស់នៅប្របដងស្ទឹងព្រែកត្នោត។
លោកអភិបាលបានធ្វើដំណើរតាមទូក ដើម្បីពិនិត្យស្ថានភាពជំនន់ទឹកភ្លៀងតាមទីតាំងដែលលិចលង់ និងស្វែងយល់ពីតំរូវការចាំបាច់នឹងដោះស្រាយជូនពលរដ្ឋរងគ្រោះភ្លាមៗ។ នៅពេលនេះតាមការពិនិត្យជាក់ស្តែង មានភូមិចំនួន៧ក្នុងសង្កាត់បឹងធំ ក្នុងខណ្ឌពោធិ៍សែនជ័យដែលមានភូមិសាស្ត្រនៅប្របមាត់ស្ទឹងព្រែកត្នោត ពិសេសមានភូមិដូនកុក ដែលទទួលរងការលិចខ្លាំងជាងគេ។
លោកអភិបាលបានណែនាំឲ្យមន្ត្រីជំនាញពាក់ព័ន្ធ,អាជ្ញាធរដែនដីត្រូវរួមគ្នាគិតគូរ និង ដោះស្រាយនិងដាក់ចេញវិធានការចាំបាច់ឲ្យបានទាន់ពេលវេលាជូនប្រជាពលរដ្ឋយើងដែលរងគ្រោះ រៀបចំទីទួលសុវត្ថិភាព និងរៀបចំទីតាំងស្នាក់ការកាកបាទក្រហម ដែលអាចដាំស្លររួមគ្នាបានដើម្បីសម្រួលការលំបាកដល់បងប្អូននៅពេលទឹកលិចផ្ទះសម្បែងរបស់ខ្លួន,រៀបចំឲ្យមានពេទ្យប្រចាំការនៅទីតាំងរងគ្រោះដើម្បីផ្តល់សេវាសុខាភិបាលជូនបងប្អូន។
លោកឃួង ស្រេង គិតត្រឹមព្រឹកថ្ងៃទី២០កក្កដានេះ កំពស់ទឹកស្ទឹងព្រែកត្នោតមិនទាន់មានការគំរាមកំហែងដល់រាជធានីភ្នំពេញនោះទេ។ ប៉ុន្តែបើសិនជាទឹកនៅតែបន្តឡើងទៀតនោះ ខណ្ឌដង្កោនឹងប្រឈមមុខខ្លាំងជាងគេជាជំនន់ទឹកភ្លៀងធ្លាក់មកពីខេត្តប៉ែកខាងលិចរាជធានីភ្នំពេញដូចជាខេត្តកំពង់ស្ពឺជាដើម។
លោកអភិបាល បានថ្លែងបន្តថា ផ្ទះប្រជាពលរដ្ឋ និងដីស្រែចម្ការ បានទទួលនូវការជន់លិចលង់ទាំងស្រុង ហើយជាជំហានដំបូងអាជ្ញាធរ ត្រូវជួយសង្គ្រោះជីវិតមនុស្ស និងសត្វ ដើម្បីធ្វើយ៉ាងណា ដើម្បីឲ្យមានចំណីអាហារបរិភោគគ្រប់គ្រាន់ ដោយសារពួកគាត់បានលិចផ្ទះអស់ហើយ និងផ្នែកសុខាភិបាលទទួលបានភាពល្អប្រសើរ សម្រាប់ព្យាបាលជំងឺ ដូច្នេះអាជ្ញាធររាជធានី និងអាជ្ញាធរពាក់ព័ន្ធ ត្រូវរៀបចំកិច្ចការងារនេះ ជូនប្រជាពលរដ្ឋ ជាពិសេសកាកបាទក្រហម ត្រូវដាំបាយជូនប្រជាពលរដ្ឋ ព្រោះផ្ទះលិច កន្លែងដាំបាយក៏លិចផងដែរ។ នេះមិនមែនជាការសូកប៉ាន់ក្នុងពេលបោះឆ្នោតនោះទេ ព្រោះវាជាកិច្ចការដែលអាជ្ញាធរត្រូវធ្វើតាមរយៈកាកបាទក្រហមកម្ពុជា និងសាខាកាកបាទក្រហមរាជធានីភ្នំពេញ និងថ្នាក់ខណ្ឌ។
ក្នុងនាមអាជ្ញាធរលោកបានស្នើសុំការជួយអន្តរាគមន៍ពីគណៈកម្មការគ្រប់គ្រងគ្រោះមហន្តរាយ និងកងរាជអាវុធហត្ថលើផ្ទៃប្រទេស ដោយបានផ្តល់នូវមធ្យោបាយដឹកជញ្ជូន ដូចជាអូប័រចំនួន២០គ្រឿង និងកងកម្លាំងត្រៀម ដើម្បីជួយសង្គ្រោះ ហើយស្នងការនគរបាលរាជធានីភ្នំពេញ និងទីបញ្ជាការដ្ឋានកងរាជអាវុធហត្ថ ក៏បានត្រៀមក្រុមការងារ មកជួយសង្គ្រោះប្រជាពលរដ្ឋ ហើយលើសពីនេះទៀត អាជ្ញាធររាជធានី បានស្នើសុំទៅដល់គណៈកម្មការគ្រប់គ្រងគ្រោះមហន្តរាយ ដើម្បីសុំអូប័របន្ថែម ក្នុងករណីចាំបាច់ត្រូវដឹកប្រជាពលរដ្ឋ មករកទីទួលសុវត្ថិភាព។ ប៉ុន្តែតាមរយៈការចុះពិនិត្យស្ថានភាពនាព្រឹកនេះ លោកឃួង ស្រេងបានបញ្ជាក់ថា ប្រជាពលរដ្ឋ មានទីទួលមួយនៅភូមិដូនកុក សម្រាប់ស្នាក់បណ្តោះអាសន្ន ហើយកាកបាទក្រហម នឹងដាំបាយនៅទីទួលនោះ ដើម្បីឲ្យប្រជាពលរដ្ឋមានស្បៀងអាហារគ្រប់គ្រាន់សម្រាប់ផ្គត់ផ្គង់ប្រចាំថ្ងៃ។
លោកបានបន្ថែមថា បើតាមការវាយតម្លៃនោះ គឺស្ថានភាពទឹកនៅចំណុចខាងលើបានស្រកហើយ ប៉ុន្តែជាធម្មតាបើទឹកនៅខាងលើស្រក គឺនៅខាងក្រោមនឹងកើនឡើង ហើយនៅក្នុងរយៈពេលប៉ុន្មានថ្ងៃខាងមុខនេះ ទឹកនៅតំបន់នេះនឹងស្រកចុះ ពីព្រោះថា ទឹកទន្លេនៅទាប ទឹកអាចហូរចូលទន្លេ ប៉ុន្តែក្នុងខណៈដែលក្នុងខែកក្កដា នេះទឹកទន្លេមិនទាន់ឡើងពេញទន្លេ ដូច្នេះហើយបានជាទឹកហូរពីស្ទឹងបានលឿន។ ប៉ុន្តែបើទឹកស្ទឹងឡើងក្នុងតុលាវិញ ច្បាស់ជារងការជន់លិចលង់ខ្លាំងជាមិនខាន ព្រោះទឹកឡើងពេញទន្លេហើយ ធ្វើឲ្យទឹកស្ទឹងចាល់ហូរចូលទន្លេមិនកើត។ លោក អភិបាលផ្តាំផ្ញើដល់បងប្អូនប្រជាពលរដ្ឋ ត្រូវមានការប្រុងប្រយ័ត្ន ហើយម្យ៉ាងទៀត ប្រជាពលរដ្ឋក្នុងតំបន់នេះ ហាក់ដូចជាស៊ាំហើយ ក្នុងការទឹកជន់លិចបែបនេះ នៅតាមសណ្តស្ទឹងព្រែកត្នោត និងបានជ្រួតជ្រាបអស់ហើយ និងបានណែនាំដល់កូនចៅ ឲ្យមានការប្រយ័ត្នប្រយែងចំពោះកូនចៅរៀនសូត្រ ហើយបញ្ហាដែលអាជ្ញាធរត្រូវប្រុងប្រយ័ត្ន គឺបញ្ហាស្បៀង និងសុខាភិបាល ដែលត្រូវបញ្ជូនបុគ្គលិកសុខាភិបាល មកបោះតង់ជាប្រចាំនៅទៅនេះ ដើម្បីជួយព្យាបាលប្រជាពលរដ្ឋ ឲ្យបានទាន់ពេលវេលា។
លោកបានអំពាវនាវឲ្យបងប្អូនមានការប្រុងប្រយ័ត្នលើផ្នែកសុខភាព និងកុំបណ្តោយឲ្យកូនចៅលេងទឹកដែលកំពុងជន់ឡើងនេះព្រោះអាច បណ្តាលឲ្យគ្រោះថ្នាក់បាន។
ដោយឡែកទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនលោកស៊ុន ចាន់ថុល ក្នុងឱកាសចុះពិនិត្យស្ថានភាពទឹកលិចកំណាត់ផ្លូវជាតិលេខ៤នាព្រឹកថ្ងៃទី២០កក្កដានេះ បានឲ្យដឹងថា ជំនន់ទឹកភ្លៀងនៅដើមរដូវវស្សានេះ បណ្តាលឲ្យផ្លូវជាតិនៅទូទាំងប្រទេសមានការខូចខាតប្រវែងសរុបប្រមាណ៨៩គីឡូម៉ែត្រ។ នៅថ្ងៃទី១៩កក្កដា រាជរដ្ឋាភិបាលក៏បានចេញសេចក្តីណែនាំស្តីពីការត្រៀមបង្ការដើម្បីកាត់បន្ថយហានីភ័យគ្រោះមហន្តរាយទឹកជំនន់មានដូចជាខេត្តកំពត,ព្រះសីហនុ,កោះកុង,កំពង់ស្ពឺ,បាត់ដំបង,និងប៉ៃលិនជាដើម៕
Source: Kampuchea Thmey Daily
0 Comments