បន្ទាយមានជ័យ ៖ ក្មេងឈាមរាវ២នាក់ដោយសាររឿងគំនុំចិត្តទ្រាំមិនបានក៏ជិះម៉ូតូតាមកាប់សត្រូវឲ្យរងរបួសធ្ងន់ម្នាក់ ក្នុងចំណោមបក្សពួក៦នាក់ ត្រូវបានកម្លាំងអាវុធហត្ថចាប់ខ្លួនបានម្នាក់នៅវេលាម៉ោង ៥ល្ងាច ថ្ងៃទី១៩ ខែកក្កដា ឆ្នាំ២០១៨នៅចំណុចចំការស្វាយ ស្ថិតក្នុងភូមិសាមគី្គមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថា ជនសង្ស័យមានឈ្មោះ ឈិន កុសល ភេទប្រុស អាយុ១៧ឆ្នាំ រស់នៅភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
បន្ទាប់ពីធ្វើការឃាត់ខ្លួន និងសាកសួរចម្លើយរួចមក លោកបានកសាងសំណុំរឿងបញ្ជូនជនសង្ស័យ ទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី។ លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ បានប្រាប់អ្នកយកព័ត៌មានឲ្យដឹងថា ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យនិងមានចម្លើយរបស់ជនរងគ្រោះឈ្មោះ ធុច លាភផេង ភេទប្រុស អាយុ១៧ឆ្នាំ រស់នៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យបានប្រាប់កម្លាំងអាវុធហត្ថថា នៅមុនពេកកើតហេតុ កាលពីថ្ងៃទី៤ ខែកក្កដា ឆ្នាំ២០១៨ វេលាម៉ោងប្រមាណ៩យប់ ខ្លួនរួមជាមួយមិត្តភ័ក្ដិចំនួន៦នាក់ផ្សេងទៀត បានជិះម៉ូតូទៅលេងនៅតារាងបាល់ទាត់ស្ពតវើលSport World ហើយបានជិះបន្តទៅលេងនៅចំការស្វាយ ស្រាប់តែមានម៉ូតូ ១គ្រឿង ម៉ាកឃ្លិក មានគ្នា ២នាក់ បានជិះពីក្រោយហើយកាប់មកលើខ្លួនត្រូវជនរងគ្រោះម្នាក់ បណ្តាលឲ្យរបួសផ្នែកក្បាលពីក្រោយ បែកឈាមហូរស្រោចពេញខ្លួន និងសន្លប់បាត់ស្មារតី ក្រោយពីកើតហេតុហើយ ជនរងគ្រោះត្រូវបានមិត្តភ័ក្ដិដឹកយកទៅសង្គ្រោះនៅមន្ទីរពេទ្យបន្ទាន់ ចំណែកជនល្មើសបានជិះគេចខ្លួនបាត់ លុះនៅថ្ងៃទី១៩ ខែកក្កដា កម្លាំងអាវុធហត្ថតាមចាប់ខ្លួនជនសង្ស័យបានម្នាក់។
ផ្អែកលើចម្លើយសារភាពរបស់ជនសង្ស័យ និងតាមរបាយការណ៍របស់មូលដ្ឋានកងរាជអាវុធហត្ថក្រុងប៉ោយប៉ែត និងការបំភ្លឺរបស់ជនរងគ្រោះ ឃើញមានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ បានប្រព្រឹត្តបទល្មើសយ៉ាងពិតប្រាកដកម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ ទៅតុលាការ ដើម្បីចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments