ភ្នំពេញ ៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា ក្នុងនាមព្រឹទ្ធសភា ក្នុងនាមប្រជាជន នៃព្រះរាជាណាចក្រកម្ពុជា បានផ្ញើសារលិខិតជូនប្រធានសភាប្រឹក្សានយោបាយប្រជាជនចិន ក្នុងឱកាសអបអរសារទរខួបជាប្រវត្តិសាស្ត្រលើកទី៦០ នៃថ្ងៃបង្កើតទំនាក់ទំនងការទូតជាផ្លូវការរវាងព្រះរាជាណាចក្រកម្ពុជា ជាមួយសាធារណរដ្ឋប្រជាមានិតចិន។
នៅក្នុងសារលិខិតរបស់ព្រឹទ្ធសភាចុះថ្ងៃទី១២ ខែកក្កដា ឆ្នាំ២០១៨ បានបញ្ជាក់ថា ប្រជាជនចិន និងប្រជាជនកម្ពុជា មានទំនាក់ទំនងជាមួយគ្នាជាយូរលង់មកហើយ គឺតាំងពីសម័យអង្គរដ៏រុងរឿងមកម្ល៉េះ។ ទំនាក់ទំនងការទូតរវាងប្រទេសទាំងពីរបានបង្កើតឡើងនៅថ្ងៃទី ១៩ ខែកក្កដា ឆ្នាំ១៩៥៨ ក្រោមបញ្ញាញាណរបស់ព្រះករុណា ព្រះបាទសម្តេច ព្រះនរោត្តម សីហនុ “ព្រះបរមរតនកោដ្ឋ” និងអគ្គមគ្គុទេសក៍ដ៏ឆ្នើម នៃសាធារណរដ្ឋប្រជាមានិតចិន ដែលផ្តើមចេញពីជំនួបដំបូងរវាងព្រះករុណា ព្រះបាទសម្តេច ព្រះនរោត្តម សីហនុ “ព្រះបរមរតនកោដ្ឋ” ជាមួយឯកឧត្តម ជូ អេនឡាយ នៅទីក្រុងបាន់ឌុង ប្រទេសឥណ្ឌូនេស៊ី ក្នុងឆ្នាំ១៩៥៥។
ក្នុងរយៈពេល៦០ឆ្នាំកន្លងមកនេះ ថ្នាក់ដឹកនាំ និងប្រជាជន នៃប្រទេសទាំងពីរ មានមោទនភាព ហើយបានខិតខំពូនជ្រុំពង្រឹងពង្រីកឥតឈប់ឈរធ្វើឲ្យទំនាក់ទំនងមិត្តភាពកាន់តែជិតស្និទ្ធ សាមគ្គីភាពកាន់តែរឹងមាំ និងមានកិច្ចសហប្រតិបត្តិការដ៏ទូលំទូលាយប្រកបដោយផលប្រយោជន៍ទៅវិញទៅមកយ៉ាងធំធេង សម្រាប់ប្រជាជនទាំងពីរ។ ថ្នាក់ដឹកនាំកំពូលៗប្រទេសទាំងពីរ បានធ្វើការផ្លាស់ប្តូរទស្សនកិច្ចជាបន្តបន្ទាប់។ កិច្ចសហប្រតិបត្តិការលើវិស័យនយោបាយ យោធា សេដ្ឋកិច្ច ពាណិជ្ជកម្ម វិនិយោគ ទេសចរណ៍ វប្បធម៌ អប់រំ និងវិស័យផ្សេងៗទៀតកាន់តែរីកធំធាត់ និងកាន់តែមានសកម្មភាពមមាញឹក ជាពិសេសកិច្ចសហប្រតិបត្តិការរវាងប្រទេសទាំងពីរបានឈានឡើងដល់កម្រិត”កិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ”។ ទន្ទឹមនេះទំនាក់ទំនង និងកិច្ចសហប្រតិបត្តិការរវាងស្ថាប័ននីតិប្បញ្ញត្តិ និងដោយឡែករវាងសភាប្រឹក្សានយោបាយប្រជាជនចិន ជាមួយព្រឹទ្ធសភាកម្ពុជា ត្រូវបានលើកកម្ពស់ឥតឈប់ឈរ និងមានលទ្ធផលល្អប្រសើរជាបន្តបន្ទាប់។
ក្នុងទិសដៅបន្ត យើងខិតខំឲ្យមានការផ្លាស់ប្តូរទស្សនកិច្ចគ្រប់កម្រិតឲ្យបានកាន់តែច្រើន និងបន្តគាំទ្រដ៏ពេញលេញចំពោះកម្មវិធីនយោបាយរបស់រដ្ឋាភិបាលរៀងខ្លួន ក្នុងការធ្វើទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា-ចិន។
ជាមួយគ្នានេះ ខ្ញុំសូមសម្តែងនូវការអរគុណដ៏ជ្រាលជ្រៅបំផុតចំពោះរដ្ឋាភិបាល និងប្រជាជនចិន ដែលបានរួមចំណែកដ៏ធំធេងក្នុងកិច្ចខិតខំប្រឹងប្រែងរួមវិភាគទានជួយដល់រាជរដ្ឋាភិបាលកម្ពុជា ដើម្បីអភិវឌ្ឍសេដ្ឋកិច្ច-សង្គម លើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាជនកម្ពុជា។ ក្នុងនាមព្រឹទ្ធសភាកម្ពុជា ខ្ញុំសូមយកឱកាសនេះបញ្ជាក់អះអាងជាឧឡារិកជាថ្មីទៀតថា កម្ពុជាប្រកាន់ខ្ជាប់ឥតងាករេនូវគោលនយោបាយ “ចិនមួយ” ហើយជានិច្ចកាលតែងចាត់ទុកថាសាធារណរដ្ឋប្រជាមានិតចិនជាមិត្តដ៏ទុកចិត្តបំផុតរបស់កម្ពុជា។ សម្តេចប្រធានព្រឹទ្ធសភា ក៏សូមប្រសិទ្ធពរជ័យជូនបក្សកុម្មុយនីស្ត និងប្រជាជនចិនជាមិត្ត សូមប្រកបដោយវិបុលភាព វឌ្ឍនភាព និងសុភមង្គល៕
Source: Kampuchea Thmey Daily
0 Comments