ភ្នំពេញ ៖ គិតត្រឹម ខែកក្កដា ឆ្នាំ២០១៨នេះ ក្រសួងសុខាភិបាលបានផ្តល់វិញ្ញាបនបត្របញ្ជាក់គោលការណ៍អនុវត្តអនាម័យល្អស្របតាមគោលការណ៍អនុវត្តអនាម័យល្អរបស់ក្រសួងដល់ម្ចាស់ភោជនីយដ្ឋាន និងអាហារដ្ឋានចំនួន១៩៨៨កន្លែង ហើយក្នុងនោះ LOGOប្រភេទAចំនួន៣៨៨កន្លែង LOGOប្រភេទB ចំនួន១១២កន្លែង LOGOប្រភេទ Cចំនួន២៦កន្លែងនិងផ្នែកអនាម័យ(Hygiene)ចំនួន១៤៦២កន្លែង។
កាលពីពេលថ្មីៗនេះនាយកដ្ឋានឱសថចំណីអាហារបរិក្ខារពេទ្យនិងគ្រឿងសំអាងនៃក្រសួងសុខាភិបាលបានផ្តល់ដល់ភោជនីយដ្ឋាននិងអាហារដ្ឋានចំនួន៣៧កន្លែងទៀត ក្នុងនោះនៅរាជធានីភ្នំពេញ មានចំនួន៣២កន្លែង.សៀមរាប៣,កែប១ និងកំពង់ស្ពឺ១ដោយបែងចែកជាLOGOប្រភេទA ចំនួន២៨ ,LOGOប្រភេទB ចំនួន៤ , LOGOប្រភេទចំនួន C ២,និងHygieneចំនួន 3។
លោក ឱសថការី អាំង ហុកស្រ៊ុន ប្រធានការិយាល័យសុវត្ថិភាពចំណីអាហារបានមានប្រសាសន៍ថា ភោជនីយដ្ឋាន អាហារដ្ឋានទាំង៣៧កន្លែងខាងលើនោះមុននិងទទួលបាន(LOGO)ល្អពីក្រសួងសុខាភិបាលនេះ ត្រូវបានវាយតម្លៃជាមុនសិនថា តើភោជនីយដ្ឋាន អាហារដ្ឋាននោះ អនុវត្តបានល្អតាមខ្លឹមសារប្រកាសរបស់ក្រសួងសុខាភិបាលបានល្អខ្ជាប់ខ្ជួនដែរឬយ៉ាងណា។
បន្ទាប់ពីធ្វើតាមលក្ខខណ្ឌរបស់ក្រសួងសុខាភិបាលបានត្រឹមត្រូវល្អគ្រប់បែបយ៉ាងហើយ ទើបនាយដ្ឋានឱសថយើង សម្រេចចេញវិញ្ញាបនបត្របញ្ជាក់ អនាម័យចំណីអាហារ និងវិញ្ញាបនបត្របញ្ជាក់គោលការណ៍អនុវត្ត អនាម័យល្អនេះជូនដល់ភោជនីយដ្ឋាន អាហារដ្ឋានទាំងនោះ។
លោកឱសថបណ្ឌិត ហេង ប៊ុនគៀត ប្រធាននាយកដ្ឋានឱសថចំណីអាហារបរិក្ខារពេទ្យនិងគ្រឿងសំអាង បានកោតសរសើរ ចំពោះអាជីវករមួយចំនួនដែលបានខិតខំយកចិត្តទុកដាក់ ពង្រឹងគុណភាពអនាម័យនៅតាមភោជនីយដា្ឋននិងអាហារដ្ឋានរបស់ខ្លួន ពីព្រោះថា បញ្ហាអនាម័យជាបញ្ហាមួយសំខាន់ណាស់របស់ក្រសួងសុខាភិបាល ហើយក្រសួងមានគោលនយោបាយមួយច្បាស់លាស់ណាស់ដើម្បីធ្វើយ៉ាងម៉េចឲ្យភោជនីយដ្ឋាន អាហារដ្ឋានរបស់យើងអនុវត្តឲ្យមានសុវត្ថិភាព បានន័យថា អ្នកហូបទទួលទានកន្លែងហុបចុករបស់យើងហ្នឹង មានសុវត្ថិភាពខ្ពស់ ដោយមិនមានជំងឺអ្វីកើតឡើងនោះទេ។
លោកបានបន្តថា «ដូចយើងឃើញស្រាប់ហើយថាកន្លងមកនោះ មានការពុលចំណីអាហារច្រើនតែកើត មានដូចកន្លែងធ្វើម្ហូបការនិង កន្លែងពិធីជប់លៀងផ្សេងៗ ដូច្នោះហើយ សូមប្រុងប្រយ័ត្នឲ្យបានខ្ពស់ទាំងអស់គ្នា។ តែសម្រាប់ភោជនីយដ្ឋាន អាហារដ្ឋានក្នុង ទាំងខេត្តនិងរាជធានីភ្នំពេញដូចជាមិនសូវមានទេ»។
លោកប្រធាននាយកដ្ឋាន បានជំរុញឲ្យម្ចាស់ភោជនីយដ្ឋាន និង អាហារដ្ឋានទាំងអស់សូមចិត្តទុកដាក់ខ្ពស់ថែមទៀតជាពិសេសភោជនីយដ្ឋាន អាហារដ្ឋាននៅរាជធានីភ្នំពេញនេះតែម្ដងដែលជាកន្លែងបេះដូងនៃប្រទេសជាតិហើយក៏ជាកន្លែងភ្ញៀវទេសចរណ៍ជាតិនិងអន្តរជាតិដ៏ច្រើនកុះករមករកទទួលទាននិង ស្នាក់ផងដែរ៕
Source: Kampuchea Thmey Daily
0 Comments