ភ្នំពេញ ៖ អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម បានប្រកាសបន្ដ យុទ្ធនាការត្រួតពិនិត្យតាមដានតម្លៃប្រេងឥន្ធនៈជារៀងរាល់ថ្ងៃ គ្រប់រាជធានី ខេត្ដទូទាំងប្រទេស ដើម្បីចូលរួមអនុវត្ដ ឲ្យមានប្រសិទ្ធភាពរបស់ប្រមុខរាជរដ្ឋាភិបាលក្នុងការដាក់ចេញនូវ បទបញ្ជា លើការកំណត់តម្លៃប្រេងឥន្ធនៈនៅលើទីផ្សារកម្ពុជា។
បើតាមលោក ឃួន សាវុធ ប្រធាននាយកដ្ឋានដោះស្រាយវិវាទ និងគោលនយោបាយទូទៅ នៃអគ្គ នាយកដ្ឋានកាំកុងត្រូលនៃ ក្រសួងពាណិជ្ជកម្ម បានឲ្យដឹងថា ដើម្បីពង្រឹងប្រសិទ្ធ ភាពក្នុងការអនុវត្តបទបញ្ជារបស់ប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន ដែល បានឯកភាពឲ្យមានការបញ្ចុះតម្លៃប្រេងឥន្ធនៈ១៦០រៀល ក្នុង១លីត្រ ពោលគឺតម្លៃ៣៩៥០រៀល សម្រាប់ ប្រេងសាំងធម្មតា និង៣៧៥០រៀល សម្រាប់ប្រេងម៉ាស៊ូតមន្ត្រីរបស់អគ្គនាយកដ្ឋានកាំកុងត្រូល នៃក្រសួងពាណិជ្ជកម្មនៅតែបន្តយុទ្ធនាការត្រួតពិនិត្យតម្លៃប្រេងឥន្ធនៈនៅតាមបណ្ដាស្ថានីយ និងដេប៉ូលក់ប្រេងឥន្ធនៈនានា។
លោកបានបន្តថា ការចុះត្រួតពិនិត្យ តម្លៃប្រេងឥន្ធនៈនេះ គឺមន្ដ្រីកាំកុងត្រូលបានធ្វើជារៀងរាល់ថ្ងៃគ្រប់រាជធានី ខេត្ដ ទូទាំងប្រទេស ដើម្បី ណែនាំឱ្យអាជីវករលក់ដុំ លក់រាយ និងម្ចាស់ស្ថានីយប្រេងឥន្ធនៈទាំងអស់ ដាក់លក់ក្នុងតម្លៃទៅតាមអន្ដរ ក្រសួងដែលបានកំណត់ដើម្បីធានាតម្លៃលក់ឱ្យបានត្រឹមត្រូវនៅលើទីផ្សារ។
គួរបញ្ជាក់ថា គិតមកត្រឹមថ្ងៃទី១៧ ខែកក្កដានៃយុទ្ធនាការនេះ មន្ត្រីរបស់អគ្គនាយកដ្ឋានកាំកុងត្រូល បានចុះទៅកាន់ស្ថានីយ និងដេប៉ូលក់ប្រេងឥន្ធនៈចំនួន៧០ស្ថានីយទូទាំងប្រទេស ដោយបាននាំ យកនូវរថយន្តមន្ទីរពិសោធន៍ចល័តផ្នែកប្រេងឥន្ធនៈ បានចុះទៅត្រួតពិនិត្យ និងណែនាំស្ថានីយប្រេងបាន ចំនួន០៨ទីតាំងក្នុងខេត្តព្រះសីហនុ ខេត្ដកណ្ដាលចំនួន២៨ទីតាំង ខេត្តក្រចេះចំនួន០៧ទីតាំង និង រាជធានីភ្នំពេញចំនួន២៧ទីតាំង។
ចំណែកលោក ស៊ាង ថៃ អគ្គនាយកនៃអគ្គនាយកដ្ឋានជំរុញពាណិជ្ជកម្ម និងជាអ្នកនាំពាក្យក្រសួងពាណិជ្ជកម្មបានបញ្ជាក់ថា នៅតាមស្ថានីយ ប្រេងឥន្ធនៈត្រូវដាក់លក់ក្នុងតម្លៃទៅតាមអន្ដរក្រសួងកំណត់ ហើយពេលដែលមន្ដ្រីកាំកុងត្រូលចុះទៅពិនិត្យឃើញលក់មិនគ្រប់លីត្រ ឬគុណភាពមិនត្រឹមត្រូវ ជាជំហានដំបូងត្រូវធ្វើការណែនាំជាមុនសិន។ បន្ទាប់មក ក្នុងករណីរកឃើញលក់ មិនគ្រប់លីត ឬគុណភាពមិនត្រឹមត្រូវទៀត មន្ដ្រីកាំកុងត្រូល ធ្វើកិច្ចសន្យាជាមួយម្ចាស់ ស្ថានីយប្រេងឥន្ធនៈ ហើយប្រសិនបើនៅតែមិនព្រមកែប្រែទៀតនោះ ក្រសួង នឹងដកអាជ្ញាប័ណ្ណ ឬផ្អាកអាជីវកម្ម តែម្ដង។
លោកបានបន្ថែមថា ចំពោះស្ថានីយ និងដេប៉ូលក់ប្រេងឥន្ធនៈ ដែលបានរកឃើញមានបញ្ហា ជាមួយតម្លៃប្រេង មន្ត្រីរបស់អគ្គនាយកដ្ឋានកាំកុងត្រូល បានធ្វើការសម្របសម្រួល និងណែនាំដល់ម្ចាស់ ស្ថានីយទាំងអស់នោះ ធ្វើការកែប្រែតម្លៃប្រេងភ្លាមៗ ទៅតាមបទបញ្ជារបស់ប្រមុខរាជរដ្ឋាភិបាល និង សេចក្តីជូនដំណឹងរបស់ក្រសួងពាណិជ្ជកម្ម ដើម្បីរួមចំណែកដោះស្រាយការលំបាក និងជួយសម្រួល ជីវភាពរស់នៅ របស់ប្រជាពលរដ្ឋទូទាំងប្រទេស៕
Source: Kampuchea Thmey Daily
0 Comments