ពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១២ (Hun Sen Cup) វគ្គ១៦ក្រុមចុងក្រោយជម្រុះថ្នាក់ជាតិ ឆ្នាំ២០១៨ ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិកម្ពុជា (CNCC) សេនាធិការរបស់សហព័ន្ធកីឡាបាល់ទាត់កម្ពុជា បានស្វែងរកឃើញក្រុមខ្លាំងឡើងទៅវគ្គ៨ក្រុមចុងក្រោយបណ្តើរៗហើយ។
លទ្ធផលនៅក្នុងជើងទី២នេះមានក្រុមអង្គរថាយហ្គឺរ ឈ្នះក្រុមសូលទីឡូអង្គរ ហើយក្រុមអាស៊ីអឺរ៉ុប ចាញ់ក្រសួងការពារជាតិ ៧ទល់១ ស្របពេលក្រុមគីរីវង់អែហ្វស៊ី ចាញ់ក្រុមអគ្គស្នងការដ្ឋាននគរបាលជាតិ (ប៉ូលីស) ខណៈភ្នំពេញក្រោន ឈ្នះក្រុមអគ្គីសនីកម្ពុជា ៤ទល់០ ក្រុមវិសាខា ស្មើគ្នាជាមួយក្រុមព្រះខ័នរាជស្វាយរៀង ១ទល់១ និងក្រុមបឹងកេត ឈ្នះក្រុមវេស្ទើនភ្នំពេញ ១ទល់០។ ចំណែកប្រកួតរវាងក្រុមក្រុមខេត្តកំពត ជាមួយក្រុមណាហ្គាវើល ត្រូវលើកពេលធ្វើឡើងនៅព្រឹកថ្ងៃព្រហស្បតិ៍ នេះវិញព្រោះថាភ្លៀងធ្លាក់ខ្លាំងទឹកដក់ពេញទីលានមិនអាចប្រកួតបាន។
ងាកមកមើលលទ្ធផលជើងទី១ កន្លងទៅដែលធ្វើឡើងនៅសប្ដាហ៍មុន ក្រុមព្រះខ័នរាជស្វាយរៀង ឈ្នះក្រុមក្រុមវិសាខា ១ទល់០ ហើយក្រុមសូលទីឡូអង្គរ ស្មើគ្នាជាមួយក្រុមអង្គរថាយហ្គឺរ ២ទល់២ ស្របពេលក្រុមអគ្គីសនីកម្ពុជា ចាញ់ក្រុមភ្នំពេញក្រោន ២ទល់១ ខណៈក្រុមណាហ្គាវើល ឈ្នះក្រុមកំពត ៥ទល់១។ ក្រុមក្រសួងការពារជាតិ ឈ្នះក្រុមអាស៊ីអឺរ៉ុប ៣ទល់១ ក្រុមអគ្គស្នងការដ្ឋាននគរបាលជាតិ ស្មើគ្នាជាមួយក្រុមគីរីវង់អែហ្វស៊ី ២ទល់២ និងក្រុមវេស្ទើនភ្នំពេញ ចាញ់ក្រុមបឹងកេត ៥ទល់១។
ចំណែក១ប្រកួតទៀតគឺជំនួបរវាងក្រុមខេត្តកោះកុង ប៉ះក្រុមយុវជនសាលាបាល់ទាត់ជាតិបាទី ត្រូវបាន CNCC សម្រេចលើកពេលប្រកួតដោយហេតុផលសមាជិកភាគច្រើនរបស់ក្រុមយុវជនសាលាបាល់ទាត់ជាតិបាទី ជាប់ប្រឡង។ ដូច្នេះជំនួបរវាងក្រុមទាំង២ជើងទី១ ធ្វើនៅថ្ងៃទី២២ខែកក្កដា និងជើងទី២ ប្តូរទៅធ្វើនៅបាទី វិញនៅថ្ងៃទី ២៨ ខែ កក្កដា។ ចំណែក៧គូផ្សេងទៀត ក្រោយប្រកួតចប់ជើងទី១ នៅថ្ងៃពុធ ទី១១ កក្កដា នេះត្រូវបន្តប៉ះគ្នាជើងទី២ នៅថ្ងៃទី១៨ កក្កដា ខាងមុខ។
ដូច្នេះគិតត្រឹមពេលនេះ CNCC បានរកឃើញក្រុមខ្លាំងឡើងទៅលេងវគ្គ៨ក្រុមជាបន្តបណ្តើៗហើយដោយក្នុងនោះមានក្រុមព្រះខ័នរាជស្វាយរៀង បឹងកេត ភ្នំពេញក្រោន អគ្គស្នងការដ្ឋាននគរបាលជាតិ ក្រសួងការពារជាតិ និងអង្គរថាយហ្គឺរ។ ចំណែក២ក្រុមទៀតកំពុងរង់ចាំអ៊ុតលទ្ធផលគូដែលនៅសល់។
យោងតាមសេចក្តីជូនដំណឹងរបស់ CNCC ពានរង្វាន់សម្តេចតេជោ ឆ្នាំនេះនឹងរៀបចំចំនួន២វគ្គដោយវគ្គទី១ ហៅថាវគ្គជម្រុះថ្នាក់ខេត្ត និងវគ្គទី២ហៅថាវគ្គជម្រុះថ្នាក់ជាតិ ដែលការប្រកួតចាប់ពីថ្ងៃទី៧ ខែមីនា រហូតដល់ថ្ងៃទី៦ខែតុលា ឆ្នាំ២០១៨។ ចំពោះវគ្គជម្រុះតាមថ្នាក់ខេត្តបែងចែក ការប្រកួតជា២វគ្គខុសគ្នាទៀតគឺវគ្គជម្រុះតាមពូល (វគ្គជម្រុះបឋម) និងជម្រុះចុងក្រោយ។
វគ្គជម្រុះតាមពូលថ្នាក់ខេត្តមានទាំងអស់២៧ក្រុមបែងចែកជា៥ពូល ជាលទ្ធផលក្រុមល្អជាងគេ ពីលេខ១ដល់លេខ៣ បូកទាំងក្រុមលេខ៤ល្អបំផុតក្នុងចំណោមពូលទាំង៥មានឈ្មោះឡើងទៅវគ្គ១៦ក្រុមចុងក្រោយ។ ចំណែកវគ្គជម្រុះជុំចុងក្រោយ យកក្រុមទាំង១៦ចាប់គូគ្នាប្រកួតជាបន្តបន្ទាប់ រហូតដល់វគ្គផ្ដាច់ព្រ័ត្រ។ ក្រុមដែលឡើងដល់វគ្គពាក់កណ្ដាលផ្ដាច់ព្រ័ត្រ (៤ក្រុមខ្លាំងជាងគេ) មានឈ្មោះឡើងទៅប្រកួតដណ្តើមជើងឯកថ្នាក់ជាតិ (យុវជនសាលាបាល់ទាត់ជាតិឈ្នះជើងឯក)។ ចំណែកក្រុមខ្លាំងជាងគេទាំង៤មាន U18សាលាបាល់ទាត់ជាតិ គីរីវង់អែហ្វស៊ី កំពត និងកោះកុង។
សម្រាប់ការប្រកួតជើងឯកថ្នាក់ជាតិវិញមានក្រុមចំនួន១២ជាសមាជិកពានរង្វាន់លីគកំពូលកម្ពុជានៅរង់ចាំបូកជាមួយក្រុមចំនួន៤ខ្លាំងជាងគេ មកពីការប្រកួតជម្រុះជើងឯកថ្នាក់ខេត្ត។ ដោយចាប់ឆ្នោតរើសគួប្រកួតប្តូរទឹកដីគ្នា (ចំនួន២លើក) ក្នុងវគ្គ៨ក្រុមចុងក្រោយរហូតដល់វគ្គផ្ដាច់ព្រ័ត្រតែម្តង។ យ៉ាងណាក្តីវគ្គពាក់កណ្ដាលផ្ដាច់ព្រ័ត្រនិងវគ្គផ្ដាច់ព្រ័ត្រធ្វើឡើងនៅពហុកីឡដ្ឋានជាតិក្នុងរាជធានីភ្នំពេញ ទាំងក្នុងវគ្គជម្រុះជើងឯកថ្នាក់ខេត្តនិងវគ្គជម្រុះជើងឯកថ្នាក់ជាតិក្នុងពានរង្វាន់នេះ៕
Source: Kampuchea Thmey Daily
0 Comments