ភ្នំពេញ ៖ មានករណីអគ្គិភ័យមួយ បានលេបត្របាក់ផ្ទះតៀមចំនួន១ខ្នង ឆេះអស់គ្មានសល់ ដែលជាប្រភេទផ្ទះតៀមទំហំ៥ម៉ែត្រគុណ១០ម៉ែត្រ ហើយមូលហេតុជំហានដំបូង គេបានដាក់ការសង្ស័យថាទុស្សេខ្សែភ្លើង។
ហេតុការណ៍នេះ បានកើតឡើងនៅតាមបណ្តោយផ្លូវជាតិលេខ៦ក្នុងភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ កាលពីវេលាម៉ោង០១និង៤៥នាទី ថ្ងៃទី៣០ ខែកក្កដា ឆ្នាំ២០១៨រហូតទល់ម៉ោងជាង២ទើបឆេះអស់ទាំងស្រុង ដោយផ្អើលរថយន្តពន្លត់អគ្គិភ័យ ១៥គ្រឿងទៅអន្តរាគមន៍ តែប្រើប្រាស់អស់តែ២គ្រឿងប៉ុណ្ណោះ។
ប្រភពពីកន្លែងកើតហេតុបានអោយដឹងថា មុនពេលកើតហេតុ ស្រាប់តែគេឃើញភ្លើងចាប់ផ្តើមឆាបឆេះពីក្នុងផ្ទះតៀមនោះ លាយឡំនឹងផ្សែង និងអំណាចខ្យល់បក់ផងនោះ អគ្គិភ័យកាន់តែបាញ់ផ្សែងខ្មួលខ្មាញ់ឡើង សន្ធោសន្ធៅ នាំអោយប្រជាពលរដ្ឋភ័យស្លន់ស្លោខ្លះរត់នាំគ្នាជួយឈឺឆ្អាលក្នុងការពន្លត់ តែដោយសារឥទ្ធិពលខ្យល់បោកបក់ខ្លាំងក្លាពេកធ្វើអោយផ្ទះ១ខ្នងត្រូវបានឆេះបំផ្លាញខ្ទេច ។
តាមការឱ្យដឹងពីអ្នកដែលស្នាក់នៅផ្ទះនោះនិយាយថា ខ្លួនឈ្មោះទុយ ហ៊ីម អាយុ៣៦ឆ្នាំ ជាមេការសំណង់ ហើយម្ចាស់ផ្ទះបានឱ្យស្នាក់នៅផ្ទះនោះ តែថ្ងៃនោះខ្លួនមិននៅផ្ទះទេ ចាក់សោចោលមកដេកតែយប់ៗ ស្រាប់តែថ្ងៃកើតហេតុក៏ត្រូវអគ្គិភ័យឆាបឆេះតែម្តង ប៉ុន្តែមិនបានបណ្តាលឲ្យនរណាម្នាក់មានគ្រោះថ្នាក់ឡើយ ដោយអគ្គិភ័យនេះគេសង្ស័យបង្កឡើងដោយការទុស្សេខ្សែភ្លើងប៉ុន្តែមិនច្បាស់ទេយើងរង់ចាំស្រាវជ្រាវបន្ត។ ទោះយ៉ាងណាទ្រព្យសម្បត្តិនៅក្នុងផ្ទះត្រូវខូចខាតឆេះខ្ទេចខ្ទីអស់ផងដែរ។
ក្នុងគ្រោះអគ្គិភ័យខាងលើនេះគេឃើញមានការដឹកនាំចូលរួមអន្តរាគមន៍ផ្ទាល់ពីអាជ្ញាធរខណ្ឌ និងអាជ្ញាធរភូមិសង្កាត់ចូលរួមបញ្ជាកម្លាំងយ៉ាងស្វិតស្វាញរហូតដល់អគ្គិភ័យមួយនេះ ត្រូវបានរលត់ជាស្ថាពរព្រោះអស់អីឆេះ៕
Source: Kampuchea Thmey Daily
0 Comments