អ្នក​ឡើង​ភ្នំ​ជាង​៥០០​នាក់ ​ត្រូវ​ជាប់​លើ​ភ្នំ​ បន្ទាប់ពី​ការ​រញ្ជួយ​ដី​នៅ​ឥណ្ឌូនេស៊ី

មន្ត្រី​ឧទ្យាន​ជាតិ​មួយ​ បាន​និយាយ​នៅ​ថ្ងៃ​ចន្ទ​ថា អ្នក​ឡើង​ភ្នំ​ជាង​៥០០​នាក់​ និង​អ្នក​នាំ​ផ្លូវ​របស់​ពួកគេ​នៅតែ​ជាប់គាំង​ដោយ​ការ​បាក់​ដី​លើ​ភ្នំភ្លើង​ដ៏​សកម្ម​មួយ​នៅ​កោះ Lombok មួយថ្ងៃ​ បន្ទាប់ពី​ការរញ្ជួយ​ដី​ដ៏​ខ្លាំងក្លា​មួយ​ បាន​វាយប្រហារ​កោះ​លំហែកាយ​របស់​ប្រទេស​ឥណ្ឌូនេស៊ី​មួយ​នេះ​។​
​
ឧទ្ធម្ភាគចក្រ​និង​ក្រុម​ជួយសង្គ្រោះ​ថ្មើរជើង​ត្រូវបាន​ដាក់ពង្រាយ​ដើម្បី​ស្វែងរក​នៅ​ជម្រាលភ្នំ Rinjani ដែលជា​កន្លែង​ដ៏​ពេញនិយម​និង​សម្បូរ​ទៅដោយ​អ្នកទេសចរ​ឡើង​ភ្នំ​។​
​
ប្រធាន​ឧទ្យាន​ជាតិ Rinjani លោក Sudiyono បាន​និយាយថា “​នៅតែមាន​មនុស្ស​ចំនួន​៥៦០​នាក់​ត្រូវ​ជាប់គាំង​។ មាន​មនុស្ស​ចំនួន​៥​រយ​នាក់​នៅក្នុង​តំបន់ Segara Anakan និង​៦០​នាក់​ទៀត​ស្ថិតនៅ Batu Ceper”​។​
​
មនុស្ស​ចំនួន​១៦​នាក់​ត្រូវបាន​សម្លាប់​និង​អគារ​រាប់រយ​ត្រូវបាន​បំផ្លាញ​ដោយ​ការរញ្ជួយ​ដី​កម្រិត ៦.៤​រ៉ិ​ច​ទ័​រកា​លពី​ព្រឹក​ថ្ងៃអាទិត្យ​។ ការរញ្ជួយ​ដី​នេះ​ក៏បាន​បណ្តាល​ឲ្យ​មាន​ការបាក់​ថ្ម​រាប់​តោន​និង​ភក់​ផងដែរ​លើ​ភ្នំ Rinjani ដែលជា​ហេតុ​ធ្វើ​ឲ្យ​មនុស្ស​មិនមាន​ភាពងាយស្រួល​ដើម្បី​ចុះក្រោម​។​
​
ដោយមាន​កម្ពស់​៣,៧២៦​ម៉ែត្រ​ពីលើ​នីវ៉ូ​សមុទ្រ វា​ជា​ភ្នំភ្លើង​ខ្ពស់​លំដាប់​ទី​ពីរ​នៅ​ប្រទេស​ឥណ្ឌូនេស៊ី​និង​ជាទី​ពេញនិយម​ក្នុងចំណោម​អ្នក​កម្សាន្ត​ដែល​ចង់​មើល​ទេសភាព​ដ៏​ស្រស់ត្រកាល​។​
​
ការឡើង​ភ្នំ​នេះ​ត្រូវបាន​បិទ​បន្ទាប់ពី​មានការ​រញ្ជួយ​ដី​ដោយសារតែ​ភាពភ័យខ្លាច​ថា អាច​នឹង​មានការ​រអិល​បាក់​ដី​បន្ថែមទៀត​។​
​
ក្រុម​អង្កេត​ភូ​គុ​ព្ភ​សាស្ត្រ​អាមេរិក​បាន​ឲ្យ​ដឹងថា ចំណុចកណ្តាល​នៃ​ការរញ្ជួយ​ដី​នេះ​គឺ​ស្ថិតនៅ​ចម្ងាយ​៥០​គីឡូម៉ែត្រ​ភាគ​ឦសាន​នៃ​ទីក្រុង​ធំ Mataram របស់​កោះ Lombok ដែល​នៅ​ឆ្ងាយ​ពី​ចំណុច​ទេសចរណ៍​សំខាន់ៗ​នៅ​ភាគខាងត្បូង​និង​ខាងលិច​នៃ​កោះ​នេះ​៕ AFP

​

Source: Kampuchea Thmey Daily