ថ្មីៗនេះគ្រូបង្វឹកក្រុមបឹងកេត លោក ហៅ សុជាតិ ត្រូវបានគណៈកម្មការវិន័យរបស់សហព័ន្ធកីឡាបាល់ទាត់កម្ពុជា (ស.ប.ក) ពិន័យមិនឲ្យដឹកនាំប្រកួតផ្លូវការចំនួន១ខែ ខណៈខ្សែការពារសំខាន់ម្នាក់របស់ក្រុមនេះបានជួបគ្រោះថ្នាក់ចរាចរណ៍ក្រោយធ្វើដំណើរត្រឡប់ពីបោះឆ្នោតនៅស្រុកកំណើតវិញ។
ប្រភពមកពីក្លិបជើងឯកលីគកំពូលកម្ពុជា ៣សម័យមួយនេះបានបញ្ជាក់ថា កីឡាករ ស្លេះ សេន ជាខ្សែការពារវ័យក្មេងប្រចាំក្លិបបានជួបគ្រោះថ្នាក់ចរាចរណ៍នៅឯស្រុកកំណើតក្នុងខេត្តកំពង់ឆ្នាំង នាល្ងាចថ្ងៃអាទិត្យ ទី២៩ ខែកក្កដា ឆ្នាំ២០១៨ ថ្មីនេះ។ គ្រោះថ្នាក់នេះធ្វើឲ្យកីឡាករខ្មែរ-ឥស្លាម ត្រូវប៉ះទង្គិចនៅផ្ទៃមុខ តែមិនទាន់ដឹងច្បាស់ពីដើមចមលម្អិតឡើយ។
លោក ហៅ សុជាតិ គ្រូបង្វឹករបស់ក្រុមបឹងកេត បានលើកឡើងក្រោយលឺដំណឹងថា កូនក្រុមជួបគ្រោះថ្នាក់ចរាចរណ៍នេះថា «ក្រុមយើងជួបបញ្ហាមិនចេះអស់មិនចេះហើយ អស់ពីខ្ញុំដែលជាគ្រូបង្វឹកត្រូវជាប់ពិន័យដល់វេនកីឡាករត្រូវជួបគ្រោះថ្នាក់ចរាចរណ៍ទៀត។ ក្រុមយើងសូមជូនពរប្អូនប្រុស ស្លេះ សេន ឆាប់ជាសះស្បើយឡើងវិញ។ មិត្តរួមក្រុម និង អ្នកគាំទ្របានផ្ញើសារជូនពរដល់អតីតកីឡាករជម្រើសជាតិក្រោមអាយុ១៩ឆ្នាំកម្ពុជា (U19) ឲ្យឆាប់ជាសះស្បើយផងដែរ។
មុនមកដល់បឹងកេត កីឡាករ ស្លេះ សេន ធ្លាប់ជាអតីតកីឡាកររបស់ក្រុមបៀលប្រាយយូណាយធីត (បច្ចុប្បន្នរំសាយក្លិប) និងក្រុមមជ្ឈមណ្ឌលកំចាត់មីនកម្ពុជា។ កីឡាកររូបនេះធ្លាប់ជាប់ឈ្មោះក្នុងក្រុមជម្រើសជាតិក្រោមអាយុ១៩ឆ្នាំកម្ពុជាកាលពីឆ្នាំ២០១៧ កន្លងទៅផងដែរ។ រូបបានបង្ហាញខ្លួនលេចធ្លោនៅពេលដែលសិស្សច្បងមួយចំនួនក្នុងក្រុមរងរបួសហើយត្រូវបានគ្រូបង្វឹកទុកចិត្តនិងជ្រើសរើសឲ្យចូលប្រកួតជាប្រចាំផងដែរ។
ក្រុមបឹងកេត បានបញ្ជាក់ថា នឹងប្តឹងឧទ្ធរណ៍ចំពោះករណីគ្រូបង្វឹករបស់ខ្លួន ដែលត្រូវពិន័យរយៈពេល១ខែទាំងក្នុងពានរង្វាន់លីគកំពូលកម្ពុជានិងពានរង្វាន់សម្តេចតេជោ ហ៊ុន សែន។ ក្រុមនេះទើបតែស្គាល់រសជាតិបរាជ័យលើកដំបូងក្នុងពានរង្វាន់លីគកំពូលកម្ពុជា គិតត្រឹម១៥សប្ដាហ៍ក្នុងរដូវកាលឆ្នាំ២០១៨នេះ ដោយថ្វីជើងក្រុមក្រសួងការពារជាតិ។ ក្រុមនេះមានអម្រែកការពារតំណែងជើងឯកក្នុងពានរង្វាន់លីគកំពូលកម្ពុជាផង និងត្រូវប្រកូតពានរង្វាន់សម្តេចតេជោ ហ៊ុន សែន វគ្គ៨ក្រុមចុងក្រោយផង៕
x
Source: Kampuchea Thmey Daily
0 Comments